காவிரி படுகையில் புதைக்கப்படும் ராட்சத எரிவாயு குழாய்கள் - இந்தியன் ஆயில் கார்ப்பிரேஷனுக்கு எதிராக மனு

எண்ணூரிலிருந்து தூத்துக்குடிக்கு எரிவாயு எடுத்துச் செல்லத்தான் வேண்டும் என்றால், அதை கடலில் குழாய் அமைத்து படுகையை பாதிக்காத வகையில் கொண்டு செல்ல முயற்சிக்கலாம்

காவிரி படுகையில் வைக்கப்பட்டுள்ள எரிவாயு குழாய்கள்

காவிரிப்படுகையில் எரிவாயு குழாய் பதிப்புகளைத் தடுத்து நிறுத்த மயிலாடுதுறை மாவட்ட ஆட்சியர் இரா.லலிதாவிடம் மீத்தேன் திட்ட எதிர்ப்புக் கூட்டமைப்பினர் வலியுறுத்தினர். இதுகுறித்து, அக்கூட்டமைப்பின் தலைமை ஒருங்கிணைப்பாளர் பேராசிரியர் த.ஜெயராமன் ஆட்சியரிடம் அளித்த கோரிக்கை மனு அளித்துள்ளார். 

அம்மனுவில் எண்ணூர் - தூத்துக்குடி எரிவாயுக் குழாய் பதிப்பு திட்டம் இந்தியன் ஆயில் கார்ப்பரேஷன் லிமிடெட் நிறுவனத்தால் நடைமுறைப்படுத்தப்படுகிறது. தற்சமயம் மயிலாடுதுறை வட்டம் நீடூர் அருகே வை.பட்டவர்த்தி கிராமத்தில் கிராமமக்களின் போராட்டத்தை பொருட்படுத்தாமல் ராட்சத குழாய்களைக் கொண்டு வந்து அந்நிறுவனம் இறக்கியுள்ளது. இதேபோல், செம்பனார்கோயில் அருகே கடலி - திருவிளையாட்டத்திலும் ஐஓசிஎல் நிறுவனத்திற்குச் சொந்தமான குழாய்கள் கொண்டு வந்து அடுக்கப்பட்டுள்ளன.  

கடந்த 2020ஆம் ஆண்டு பிப்ரவரி 21ஆம் தேதியன்று பாதுகாக்கப்பட்ட வேளாண் மண்டலம் என்று சட்ட பூர்வமாக அறிவிக்கப்பட்டது. எண்ணூர் - தூத்துக்குடி எரிவாயுக் குழாய்ப் பதிப்புத் திட்டம் என்பது இன்றளவும் நடைமுறைப்படுத்தப்படவில்லை. இப்போதுதான் நிலம் கையகப்படுத்தப்படுகிறது. பாதுகாக்கப்பட்ட வேளாண் மண்டலம் என்று காவிரிப்படுகை சட்டபூர்வமாக அறிவிக்கப்பட்ட பிறகு இங்கே எண்ணெய் - எரிவாயுக் குழாய்களை அமைப்பது சட்டத்திற்குப் புறம்பானதாகும். வயல்களின் ஊடாக குழாய் அமைப்பது காவிரிப்படுகையின் வேளாண்மையை முற்றிலுமாக பாதிக்கும். 

2017 ஆம்  ஆண்டு பிப்ரவரி 17 ஆம் தேதி அன்று இந்திய பிரதமர் இத்திட்டத்தை நாட்டுக்கு அர்ப்பணிப்பதாக கூறினார். அப்போதும் கூட இங்கு நிலம் ஏதும் கையகப்படுத்தப்பட்டு குழாய் பதிக்கப்படவில்லை. இப்போது குழாய் பதிப்பு என்பது வேளாண் மண்டல பாதுகாப்பு சட்டத்திற்கு எதிரானது. ஆகவே பாதுகாக்கப்பட்ட வேளாண் மண்டலம் சட்டத்திற்குப் புறம்பான எந்த பணியும் இங்கே நடத்த அனுமதிக்கக்கூடாது. எண்ணூரிலிருந்து தூத்துக்குடிக்கு எரிவாயு எடுத்துச் செல்லத்தான் வேண்டும் என்றால், அதை கடலில் குழாய் அமைத்து படுகையை பாதிக்காத வகையில் கொண்டு செல்ல முயற்சிக்கலாம். 

வை.பட்டவர்த்தியில் கொண்டுவந்து வைத்திருக்கக்கூடிய ராட்சச குழாய்களை மக்களுடைய கருத்துக்கு  மதிப்பளித்து உடனடியாக அப்புறப்படுத்தி காவிரிப்படுகைக்கு வெளியில் கொண்டு செல்ல வேண்டும் என அந்த மனுவில் தெரிவித்துள்ளார்.அப்போது, மனிதநேய மக்கள் கட்சியின் மாவட்ட தலைவர் ஓ.ஷேக்அலாவுதீன், மாவட்ட பொருளாளர் பி.எம்.பாஷித், திராவிடர் விடுதலைக் கழக மாவட்ட செயலாளர் தெ.மகேஷ், தமிழர் உரிமை இயக்க அமைப்பாளர் சுப்பு.மகேசு, எஸ்டிபிஐ மாவட்ட தலைவர் அ.பைசல் ரஹ்மான், விசிக ஒன்றிய அமைப்பாளர் மோகன்குமார், பாப்புலர் பிரண்ட் ஆஃப் இந்தியா மாவட்ட செயலாளர் நவாஸ் மற்றும் மீத்தேன் திட்ட எதிர்ப்புக் கூட்டமைப்பு நிர்வாகிகள் உடன் இருந்தனர்.