விசிகவுக்கு வந்த ஆஃபர்? எந்த கொம்பனும் பிறக்கவில்லை – மேடையில் திருமா ஆவேசம்

நாம் கோரிக்கை வைக்கக்கூடியவர்களாக மட்டும் இருக்கக்கூடாது. கோட்பாடுகளை பாதுகாக்கக்கூடியவர்களாகவும் இருக்க வேண்டும்

விசிக திருமா

Source : twitter

என்ன விலை பேச இந்த மண்ணில் யாரும் பிறக்கவில்லை என விடுதலை சிறுத்தைகள் கட்சித் தலைவர் திருமாவளவன் தெரிவித்துள்ளார்.

சென்னை வள்ளுவர் கோட்டத்தில் மருத்துவர் சமூக நல சங்கமும்  முடி திருத்தும் தொழிலாளர் சங்கமும் இணைந்து கவன ஈர்ப்பு ஆர்ப்பாட்டம் நடத்தினர். இதில் விடுதலை சிறுத்தைகள் கட்சி தலைவர் திருமாவளவன் கலந்து கொண்டு பேசினார். அப்போது பேசிய அவர், “இனிமேல் உங்கள் ஒவ்வொரு முடிதிருத்தம் செய்யும் இடத்திலும் பெரியாரின் படத்தை நீங்கள் வைக்க வேண்டும். பெரியாரை அழிக்க நினைப்பவர்கள் யாராக இருந்தாலும் இந்த மண்ணில் இருந்து விரட்டியடிக்கப்பட வேண்டும்.

அரசியலில் என்னை பகடை காயாக பயன்படுத்த சிலர் நினைத்தனர். என்னை விலை பேச இந்த மண்ணில் யாரும் பிறக்கவில்லை. என்னை யாரும் விலைபேச முடியாது. எந்த கொம்பனும் பிறக்கவில்லை. தமிழக அரசை கவிழ்க்க தொடர்ச்சியாக சதி நடக்கிறது.

நாம் கோரிக்கை வைக்கக்கூடியவர்களாக மட்டும் இருக்கக்கூடாது. கோட்பாடுகளை பாதுகாக்கக்கூடியவர்களாகவும் இருக்க வேண்டும்” என ஆவேசமாக பேசினார்.

முன்னதாக, பெரியார் குறித்து நாம் தமிழர் கட்சியின் தலைமை ஒருங்கிணைப்பாளர் சீமான் தொடர்ந்து அவதூறு கருத்துக்களை பரப்பி வருகிறார். இதற்கு எதிர்க்கட்சித் தலைவர்கள் கடும் கண்டனங்களை பதிவு செய்து வருகின்றனர்.

இதனிடையே அம்பேத்கர் குறித்த புத்தக வெளியீட்டு விழாவில் தவெக தலைவர் விஜயும் விடுதலை சிறுத்தைகள் கட்சித் தலைவர் திருமாவளவனும் கலந்து கொள்வதாக இருந்தது. ஆனால் திமுகவுடன் கூட்டணியில் இருந்ததால் திருமாவளவன் இந்த விழாவில் பங்கேற்க கூடாது என திமுக அழுத்தம் கொடுத்ததாக சொல்லப்பட்டது. ஆனால் திமுக தரப்பும் திருமா தரப்பும் இல்லவே இல்லை என மறுப்பு தெரிவித்தது. திருமா அந்த விழாவில் பங்கேற்றால் பாசிச சக்திகளுக்கு நாமே வழி விட்டது போலும் என சொல்லி விழாவை புறக்கணித்தார்.

ஆனால் அந்த மேடையில் பேசிய விஜய் திருமா எங்கு இருந்தாலும் அவரின் மனது இன்று நம்மை நோக்கியே இருக்கும் என சொல்லி உரையை முடித்தார். அவர் பங்கேற்காமல் போனதிற்கு திமுகவில் கூட்டணியில் இருப்பதே காரணம் என்பது போன்று விஜய் பேசியிருந்தார்.

மேலும், 2026ஆம் ஆண்டு சட்டப்பேரவைத் தேர்தலில் கூட்டணிக்கு வருபவர்களுக்கு ஆட்சியிலும் அதிகாரத்திலும் பங்கு என விஜய் அறிவிப்பு வெளியிட்டிருந்தார்.

விஜய் பேசியிருந்த இந்த கோட்பாடு ஏற்கெனவே நீண்ட காலமாக விசிகவின் திருமா எடுத்து வைத்து வந்த கோரிக்கை ஆகும். ஆனால் ஆட்சியில் பங்கு என்பது திமுக வரலாற்றிலேயே கிடையாது என திமுக தரப்பு விளக்கம் அளித்தது.