Vaiko: ம.தி.மு.க. பொதுச்செயலாளராக வைகோ மீண்டும் தேர்வு - நாளை மறுநாள் அதிகாரப்பூர்வ அறிவிப்பு

ம.தி.மு.க உட்கட்சி தேர்தலில் பொதுச்செயலாளராக வைகோ மீண்டும் அப்பதவிக்கு போட்டியின்றி தேர்வாகி உள்ளார்.

வைகோ

ம.தி.மு.க உட்கட்சி தேர்தலில் பொதுச்செயலாளராக உள்ள வைகோ மீண்டும் அப்பதவிக்கு போட்டியின்றி தேர்வாகிறார்.

பொதுச்செயலாளர் வைகோ:

ம.தி.மு.கவின் உட்கட்சி தேர்தல் வரும் ஜூன் 14-ம் தேதி நடைபெற உள்ளது. இதில் கட்சியின் தலைவர், பொதுச்செயலாளர், துணை பொதுச்செயலாளர், பொருளாளர் உள்ளிட்ட பதவிகளுக்கான தேர்தல் நடைபெற உள்ளது. இதில் மதிமுகவைச் சேர்ந்த பலரும் போட்டியிட மனுத்தாக்கல் செய்துள்ளனர். இந்த நிலையில் வேட்புமனுத்தாக்கல் செய்ய இன்று நடைபெற்றது.

இதனிடையே  சென்னை எழும்பூரில் உள்ள ம.தி.மு.க. தலைமை அலுவலகத்தில், இன்று மதிமுக பொதுச்செயலாளர் வைகோ மீண்டும் அப்பதவிக்கு போட்டியிடுவதை முன்னிட்டு வேட்பு மனு தாக்கல் செய்தார். அவர் தனது மனுவை தேர்தல் பொறுப்பாளர்கள் வழக்கறிஞர் பிரியகுமார், ஆ.வந்தியதேவன், ஆவடி அந்திரி தாஸ், தாயகம் ருத்திரன் ஆகியோரிடம் வழங்கினார்.

உறுப்பினர்கள்:

அதேசமயம் தொடர்ந்து, அவைத் தலைவர் பதவிக்கு அர்ஜுன ராஜ், பொருளாளர் பதவிக்கு செந்தில் அதிபன், முதன்மைச் செயலாளர் பதவிக்கு துரை வைகோ, துணைப் பொதுச்செயலாளர் பதவிக்கு மல்லை சத்யா, ஆடுதுறை மணி, ராஜேந்திரன், ரொஹையா சேக் முகமது, ஆட்சி மன்ற குழு உறுப்பினர் பதவிக்கு கிருஷ்ணன், ராணி செல்வின், கே.ஏ.எம்.நிஜான், கழக குமார், ஜெய்சங்கர், சுப்பையா, பூவை பாபு, தணிக்கைக்குழு தலைவர் பதவிக்கு அருணாசலம், பழனிச்சாமி, அருணாசலம், செந்தில்செல்வன், பாசறை பாபு, குணா, பாண்டியன் ஆகியோர் வேட்பு மனு தாக்கல் செய்தனர்.

இதற்கிடையில் ஜூன் 3 ஆம் தேதியை வேட்புமனுவை திரும்ப பெற கடைசி நாளாகும்.  ஆனால் பொதுச்செயலாளர் பதவிக்கு வைகோ தவிர வேறு யாரும் வேட்புமனுத்தாக்கல் செய்யவில்லை என்பதால் அவர் போட்டியின்றி தேர்வாகிறார். மேலும் வேட்புமனு தாக்கல் செய்த அனைவரும் போட்டியின்றி தேர்வாவார்கள் என கூறப்படுகிறது. இதற்கான அதிகாரப்பூர்வ அறிவிப்பு ஜூன் 3 ஆம் தேதி வெளியாகவுள்ளது. 

வாரிசு அரசியல்:

இதற்கிடையில் வேட்புமனுவுக்குப் பின் செய்தியாளர்களை சந்தித்த வைகோ, மதிமுகவில் எத்தனை புயல் வீசினாலும் இந்த இயக்கத்தை மன உறுதியுடன் நடத்தி வருகிறோம். என்னுடைய மகன் துரை வைகோ வாக்கெடுப்பு மூலமாகவே தேர்ந்தெடுக்கப்பட்டார். மதிமுகவில் வாரிசு அரசியல் என்றோ பேச்சுக்கே இடமில்லை. வரும் காலத்திலும் இதில் எந்தவொரு மாற்றமும் இருக்காது. மதிமுகவில் இளைஞர்கள் அதிகமாக இணைகிறார்கள். இதனால் ஒளிமயமான எதிர்காலத்தை நோக்கி மதிமுக பயணிக்கும் என்றார்.