Thirumavalavan VCK: உள்நோக்கம் ஏதுமில்லை.. மாற்றுத்திறனாளிகள் பொறுத்தருளவும்; வருத்தம் தெரிவித்த திருமாவளவன்

விடுதலை சிறுத்தைகள் கட்சித் தலைவர் திருமாவளவன் மாற்றுத்திறனாளிகளிடம் வருத்தம் தெரிவித்து ட்வீட் செய்துள்ளார்.

திருமாவளவன் எம்.பி

விடுதலை சிறுத்தைகள் கட்சித் தலைவர் திருமாவளவன் மாற்றுத்திறனாளிகளிடம் வருத்தம் தெரிவித்து ட்வீட் செய்துள்ளார். 

மேலவளவுப் போராளிகளின் வீரவணக்க நினைவேந்தல் நிகழ்வில் விடுதலை சிறுத்தைகள் கட்சித் தலைவரும் சிதம்பரம் தொகுதி மக்களவை உறுப்பினருமான திருமாவளவன் பேசியது, மாற்றுத்திறனாளிகள் மத்தியில் அதிருப்தியை ஏற்படுத்தியது. இது சர்ச்சையான நிலையில், தற்போது வருத்தம் தெரிவித்து ட்வீட் செய்துள்ளார். இது தொடர்பாக அவர் வெளியிட்டுள்ள டிவிட்டர் பதிவில், 

”கடந்த சூன்-30 அன்று மேலவளவில் நடந்த "மேலவளவுப் போராளிகளின் வீரவணக்க நினைவேந்தல்" நிகழ்வில் உரையாற்றும் போது மாற்றுத் திறனாளிகள் மனம்நோகும் வகையில் ஓரிரு சொற்கள் தவறி விழுந்துவிட்டன. அப்போதே அதற்கு எனது வருத்தத்தையும் தெரிவித்தேன். மாற்றுத்திறனாளிகளின் நலன்களுக்காகவும் உரிமைகளுக்காகவும் தொடர்ந்து குரல்கொடுத்து வருகிற இயக்கம் விடுதலைச் சிறுத்தைகள் கட்சி. நான் ஒருபோதும் மாற்றுத்திறனாளிகளைக் காயப்படுத்தும் உள்நோக்கமோ, அவர்களைப்பற்றி இளக்காரமான மதிப்பீடோ கொண்டவனுமில்லை. இதனை மாற்றுத் திறனாளிகளுக்கான இயக்கத்தை நடத்தும் முன்னணி பொறுப்பாளர்கள் பலரும் அறிவர்” எனவும், 

”என்னைப்பற்றி தனிப்பட்டமுறையில் அவதூறுபரப்பும் ஒருசில அற்பர்களைக் கண்டிக்கும் வகையில் நான் ஆதங்கப்பட்டு எனது உரையின் போக்கிலேயே தன்னிலை விளக்கம் அளித்தேன். அப்போது அச்சொற்கள் என்னையும் அறியாமல் தவறுதலாக நாக்கு தவறி வந்து விழுந்தன. அதற்காக உடனே எனது வருத்தத்தையும் வெளிப்படுத்தினேன். இனி அவ்வாறு நிகழாவண்ணம் பார்த்துக்கொள்கிறேன். வருந்துகிறேன். மாற்றுத்திறனாளிகள் தோழர்கள் பொறுத்தருளவும்” என குறிப்பிட்டுள்ளார்.