விநாயகர் சிலை ஊர்வல பாதையில் மதுக்கடைகள் மூடல்! - புதுச்சேரி கலெக்டர் அதிரடி அறிவுறுத்தல்

விநாயகர் சதுர்த்தி விழா சிலைகள் கரைக்கும் நிகழ்வு பொதுமக்களுக்கு பாதுகாப்பான முறையிலும், சுற்றுச்சூழலுக்கு பாதிப்பு ஏற்படாத வகையில், அமைதியான முறையில் நடைபெறுவதை அனைத்து துறைகளும் உறுதி செய்ய வேண்டும்

புதுச்சேரி

Source : whatsapp

புதுச்சேரி: புதுச்சேரி மாவட்ட நிர்வாகம் சார்பில், விநாயகர் சதுர்த்தி விழாவை முன்னிட்டு சிலைகள் வைப்பது மற்றும் பின்னர் அவற்றை கடலில் கரைப்பது தொடர்பான பாதுகாப்பு மற்றும் முன்னெச்சரிக்கை நடவடிக்கைகள் குறித்த ஆலோசனைக் கூட்டம் நடைபெற்றது.

வரும் 14-ம் தேதி விநாயகர் சதுர்த்தி விழாவும், 20-ம் தேதி விநாயகர் சிலைகள் கடலில் கரைக்கும் நிகழ்வும் நடைபெற உள்ள நிலையில், பொதுமக்களுக்கு எந்தவித இடையூறும் ஏற்படாத வகையில் மேற்கொள்ள வேண்டிய பாதுகாப்பு நடவடிக்கைகள் குறித்து கூட்டத்தில் விரிவாக ஆலோசிக்கப்பட்டது.

மாவட்ட கலெக்டர் குலோத்துங்கன் தலைமையில் நடைபெற்ற இந்தக் கூட்டத்தில், சீனியர் எஸ்.பி. கலைவாணன், எஸ்.பி. சுருதி, பேரிடர் மேலாண்மைத் துறை, வருவாய்த் துறை, பொதுப்பணித்துறை, தீயணைப்புத் துறை, மாசுக்கட்டுப்பாட்டு வாரியம், நகராட்சி நிர்வாகம் மற்றும் அனைத்து கொம்யூன் பஞ்சாயத்து ஆணையர்கள் உள்ளிட்ட பல்வேறு துறை அதிகாரிகள் கலந்து கொண்டனர்.

அனுமதி பெற்ற இடங்களில் மட்டுமே சிலைகள்

கூட்டத்தில் கலெக்டர் குலோத்துங்கன் பேசுகையில், விநாயகர் சிலைகளை வைப்பதற்கு முன்பு போலீஸ் மற்றும் நகராட்சி நிர்வாகத்திடம் உரிய அனுமதி பெற வேண்டும் என அறிவுறுத்தினார்.

பொதுமக்களுக்கு பாதிப்பு ஏற்படாத வகையிலும், போக்குவரத்துக்கு இடையூறு இல்லாத வகையிலும், நிர்வாகத்தால் ஒதுக்கப்படும் குறிப்பிட்ட இடங்களில் மட்டுமே சிலைகளை வைக்க வேண்டும் என்றும் அவர் தெரிவித்தார்.

மேலும், சிலைகள் நிர்ணயிக்கப்பட்ட குறிப்பிட்ட உயர வரம்பை மீறாமல் இருக்க வேண்டும் என்றும், சிலை அமைக்கும் இடங்களில் பாதுகாப்பு மற்றும் பொதுமக்களின் நடமாட்டம் ஆகியவற்றை கருத்தில் கொள்ள வேண்டும் என்றும் அதிகாரிகளுக்கு அறிவுறுத்தப்பட்டது.

போலீஸ் விதிமுறைகளை கடைப்பிடிக்க உத்தரவு

விநாயகர் சிலைகளை ஊர்வலமாக கடலில் கரைப்பதற்காக கொண்டு செல்லும்போது, போலீசார் விதிக்கும் சட்ட விதிமுறைகளையும் வழிகாட்டுதல்களையும் முழுமையாக கடைப்பிடிக்க வேண்டும் என கலெக்டர் கேட்டுக்கொண்டார்.

ஊர்வலம் அமைதியான முறையில் நடைபெற வேண்டும் என்றும், தேவையற்ற பிரச்சினைகள் மற்றும் போக்குவரத்து பாதிப்புகள் ஏற்படாத வகையில் ஒத்துழைக்க வேண்டும் என்றும் அறிவுறுத்தப்பட்டது.

சுற்றுச்சூழல் பாதுகாப்புக்கு முக்கியத்துவம்

விநாயகர் சிலைகளை கடலில் கரைக்கும்போது சுற்றுச்சூழல் பாதிக்கப்படாத வகையில் நடவடிக்கைகள் மேற்கொள்ள வேண்டும் என்றும் கூட்டத்தில் வலியுறுத்தப்பட்டது.

மாசுக்கட்டுப்பாட்டு வாரிய அதிகாரிகளின் அறிவுரைகளைப் பின்பற்றி, அதற்கேற்ப சிலைகளை கரைக்க வேண்டும் என கலெக்டர் தெரிவித்தார். சிலைகள் தயாரிப்பில் பயன்படுத்தப்படும் பொருட்கள் மற்றும் அவற்றை கரைக்கும் முறைகள் தொடர்பாகவும் அதிகாரிகள் தொடர்ந்து கண்காணிக்க வேண்டும் என அறிவுறுத்தப்பட்டது.

சாலைகளை சுத்தமாக வைத்திருக்க உத்தரவு

விநாயகர் சிலைகள் ஊர்வலமாக செல்லும் முக்கிய சாலைகளில் பொதுமக்களின் பாதுகாப்பை கருத்தில் கொண்டு தேவையான முன்னெச்சரிக்கை நடவடிக்கைகளை மேற்கொள்ள வேண்டும் எனவும் கலெக்டர் உத்தரவிட்டார்.

குறிப்பாக, சிலைகள் செல்லும் முக்கிய சாலைகளை பிளீச்சிங் பவுடர் தெளித்து சுத்தமாக வைத்திருக்க வேண்டும் என்றும், சாலைகளில் குப்பைகள் உள்ளிட்டவை தேங்காமல் உள்ளாட்சி அமைப்புகள் நடவடிக்கை எடுக்க வேண்டும் என்றும் அறிவுறுத்தினார்.

தாழ்வாக செல்லும் மின் கம்பிகள் சரிசெய்ய வேண்டும்

சிலைகள் ஊர்வலமாக செல்லும் பாதைகளில் தாழ்வாக செல்லும் மின் கம்பிகள் மற்றும் கேபிள் ஒயர்களால் விபத்து ஏற்படாமல் இருப்பதை மின்துறை அதிகாரிகள் உறுதி செய்ய வேண்டும் என்றும் கலெக்டர் தெரிவித்தார். தேவையான இடங்களில் தாழ்வாக உள்ள மின் கம்பிகள் மற்றும் கேபிள் வயர்களை முன்கூட்டியே சரிசெய்ய வேண்டும் எனவும் உத்தரவிடப்பட்டது.

தற்காலிக கழிப்பறைகள், மருத்துவ வசதிகள்

சிலைகள் செல்லும் முக்கிய சாலைகளில் பொதுமக்கள் அதிக அளவில் கூட வாய்ப்பு உள்ளதால், அந்த பகுதிகளில் போதுமான தற்காலிக கழிப்பறை வசதிகளை ஏற்படுத்தித் தர வேண்டும் என உள்ளாட்சி நிர்வாகங்களுக்கு அறிவுறுத்தப்பட்டது. மேலும், அவசரகால சூழ்நிலையை எதிர்கொள்ளும் வகையில் ஆம்புலன்ஸ்கள் மற்றும் மருத்துவக் குழுக்களை தயார் நிலையில் வைத்திருக்க வேண்டும் என்றும் கலெக்டர் உத்தரவிட்டார்.

ஊர்வல பாதையில் மதுபானக் கடைகள் மூடல்

விநாயகர் சிலைகள் ஊர்வலமாக செல்லும் வழித்தடங்களில் உள்ள மதுபானக் கடைகளை அன்றைய தினம் மூடுவதற்கான நடவடிக்கைகளை மேற்கொள்ள வேண்டும் எனவும் கூட்டத்தில் அறிவுறுத்தப்பட்டது. முக்கியமாக, சிலை ஊர்வலம் நடைபெறும் பகுதிகளில் சட்டம்-ஒழுங்கு பிரச்சினைகள் ஏற்படாத வகையில் போலீசார் தேவையான பாதுகாப்பு ஏற்பாடுகளை மேற்கொள்ள வேண்டும் எனவும் தெரிவிக்கப்பட்டது.

முழு கண்காணிப்பில் அதிகாரிகள்

விநாயகர் சிலைகள் கரைக்கும் நிகழ்வு நடைபெறும் பகுதிகள் மற்றும் ஊர்வலப் பாதைகளை மாசுக்கட்டுப்பாட்டு வாரிய அதிகாரிகள் தொடர்ந்து கண்காணிக்க வேண்டும் என்றும் கலெக்டர் குலோத்துங்கன் அறிவுறுத்தினார். விநாயகர் சதுர்த்தி விழாவும், சிலைகள் கரைக்கும் நிகழ்வும் பொதுமக்களுக்கு பாதுகாப்பான முறையிலும், சுற்றுச்சூழலுக்கு பாதிப்பு ஏற்படாத வகையிலும், அமைதியான முறையிலும் நடைபெறுவதை அனைத்து துறைகளும் ஒருங்கிணைந்து உறுதி செய்ய வேண்டும் என கூட்டத்தில் வலியுறுத்தப்பட்டது.