செஞ்சி சிறுமி மாயம்: திட்டமிட்ட கடத்தலா? - தமிழக அரசு வெளியிட்ட பரபரப்பு தகவல்
செஞ்சி சிறுமி மாயமான வழக்கில் எந்த தடயமும் கிடைக்கவில்லை என்று தமிழ்நாடு அரசு விளக்கம்.
செஞ்சி சிறுமி மாயமான வழக்கில் இதுவரை எடுக்கப்பட்ட நடவடிக்கைகள் குறித்து விளக்கமளித்த தமிழக அரசு, இந்த சம்பவம் திட்டமிட்டு நடத்தப்பட்டிருக்கலாம் என சந்தேகம் இருப்பதாக தெரிவித்துள்ளது.
இதுவரையிலான நடவடிக்கைகள்
அக்டோபர் 12 முதல் மாயம்
விழுப்புரம் மாவட்டம் செஞ்சி அருகே உள்ள நடுப்பட்டு கிராமத்தைச் சேர்ந்த இரண்டாம் வகுப்பு மாணவி ஹேமலதா, அக்டோபர் 12 அதிகாலை முதல் மாயமாகியுள்ளார்.
வீட்டில் கடைசியாக இருந்த சிறுமி
அக்டோபர் 11 அன்று தனது பிறந்தநாளைக் கொண்டாடிய சிறுமி, இரவு 11 மணியளவில் பெற்றோர் மற்றும் பாட்டியுடன் தூங்கச் சென்றுள்ளார். அதிகாலை 6 மணியளவில் அவர் மாயமானது குடும்பத்தினருக்குத் தெரியவந்தது.
தீவிர தேடுதல் பணி
100-க்கும் மேற்பட்ட காவல்துறையினர் 11 நாட்களாகத் தேடுதல் பணியில் ஈடுபட்டனர். ட்ரோன்கள், வெப்பக் கண்காணிப்புக் கருவிகள், மோப்ப நாய்கள், தீயணைப்பு மற்றும் மீட்புப் படையினர், தடயவியல் நிபுணர்கள் ஆகியோரின் உதவியுடன் தேடுதல் நடத்தப்பட்டது. கிணறுகள், நீர்நிலைகள், விவசாய நிலங்கள், மலைப்பகுதிகள் மற்றும் அருகிலுள்ள கிராமங்களிலும் தேடியும் எந்தத் தடயமும் கிடைக்கவில்லை.
CB-CID விசாரணை தொடக்கம்
தமிழக காவல்துறை தலைமை இயக்குநர் இந்த வழக்கை மாற்றியதைத் தொடர்ந்து, வியாழக்கிழமை குற்றப்பிரிவு குற்றப் புலனாய்வுத் துறை (CB-CID) விசாரணையைத் தொடங்கியது.
திட்டமிட்ட சம்பவமாக இருக்கலாம் எனச் சந்தேகம்
சிறுமி மாயமான சம்பவம் திட்டமிட்டு நடத்தப்பட்டிருக்கலாம் என மூத்த காவல்துறை அதிகாரி தெரிவித்துள்ளார். ஒரு கும்பல் சிறுமியைக் கடத்தி அருகிலுள்ள கிராமங்கள் வழியாகச் சென்றதா என்பது குறித்து விசாரணை நடைபெறுகிறது.
CCTV மற்றும் செல்போன் பதிவுகள் ஆய்வு
ஆலம்பூண்டி, திருவண்ணாமலை மற்றும் நடுப்பட்டு இடையிலான சாலைகளில் உள்ள CCTV கேமரா பதிவுகள் ஆய்வு செய்யப்பட்டன. அக்டோபர் 11 இரவு முதல் அக்டோபர் 12 அதிகாலை வரையிலான செல்போன் டவர் பதிவுகளும் பரிசோதிக்கப்பட்டன.
சந்தேக நபர்கள் குறித்த விசாரணை
உள்ளூர் மற்றும் அருகிலுள்ள கிராமங்களைச் சேர்ந்தவர்களின் பின்னணியைப் போலீசார் ஆய்வு செய்தனர். குற்றப் பின்னணி உள்ளவர்கள் மற்றும் போக்சோ (POCSO) வழக்குகளில் தொடர்புடையவர்கள் குறித்தும் விசாரணை நடத்தப்பட்டது. சுமார் 600 செல்போன் அழைப்புப் பதிவுகளும் ஆய்வு செய்யப்பட்டன.
குடும்பத்தினர் வேதனை
சிறுமிக்கு என்ன நடந்தது, அவர் எப்படிக் காணாமல் போனார் என்பது தெரியவில்லை என்று அவரது தாயார் தெரிவித்துள்ளார். முதலில் வீட்டிலும் அருகிலுள்ள வயல்களிலும் கால்வாய்ப் பகுதியிலும் தேடிய குடும்பத்தினர் பின்னர் காவல்துறையை அணுகினர்.
காவல்துறை உறுதி
வழக்கின் ஆவணங்கள் CB-CID குழுவிடம் ஒப்படைக்கப்படும் என்றும், விசாரணைக்குத் தேவையான கூடுதல் உதவிகள் வழங்கப்படும் என்றும் காவல்துறை தெரிவித்துள்ளது.
CB-CID விசாரணையை தொடங்கியுள்ளது
இந்த வழக்கை அனைத்துக் கோணங்களிலும் விசாரிக்கும் வகையில் CB-CID தன்னுடையை விசாரணையைத் தொடங்கியுள்ளது.
தலைப்பு செய்திகள்
ட்ரெண்டிங் செய்திகள்
