திருட்டு திமுக சொன்ன சீமானை ஸ்டாலின் ஆதரிப்பது ஏன்? சரவெடியாய் வெடிக்கும் அமைச்சர் வன்னியரசு!

Vanniyarasu Vs DMK: சீமான் பேனாவை உடைப்பேன் என்றபோது திமுகவினர் கண்டிக்கவில்லை. இப்போது மலிவான அரசியல் செய்கின்றனர் என அமைச்சர் வன்னியரசு விமர்சனம்.

அமைச்சர் வன்னியரசு

Source : twitter

விழுப்புரம் மாவட்டம் திண்டிவனம் நகராட்சியில் வடகிழக்கு பருவமழை முன்னெச்சரிக்கை நடவடிக்கைகள் குறித்த ஆய்வு கூட்டம் சமூக நீதித்துறை அமைச்சர் வன்னியரசு தலைமையில் நடைபெற்றது. இதில் மாவட்ட கலெக்டர் மற்றும் அரசு அதிகாரிகள் பங்கேற்றனர். இதனைத் தொடர்ந்து செய்தியாளர்களுக்கு பேட்டியளித்த அமைச்சர் வன்னியரசு: மழை முன்னெச்சரிக்கை குறித்து மரக்காணம் பகுதியில் எந்தெந்த பகுதிகள் பாதிக்கப்படும் என முன்பே கண்டறிந்து அதிகாரிகள் முடுக்கி விடப்பட்டுள்ளனர். மக்களை பாதுகாக்க நடவடிக்கை எடுக்கப்பட்டுள்ளது, பதற்றம் தேவையில்லை.

செஞ்சி சிறுமி மாயம்

செஞ்சி சிறுமி மாயமானது தொடர்பாக மாவட்ட கலெக்டர், எஸ்.பி.யிடம் தொடர்ந்து பேசி வருகிறேன். கண்டுபிடித்து தருபவர்களுக்கு ரூ.2 லட்சம் பரிசுத்தொகை தர தயாராக இருக்கிறோம். தனிப்படை அமைக்கப்பட்டுள்ளது. தாயின் கண்ணீரை உணர்ந்து தேடுதல் வேட்டை தீவிரமாக நடக்கிறது.
கோவை பள்ளி மாணவன் தற்கொலை ஏற்றுக்கொள்ள முடியாதது. தலைவர் திருமாவளவன் அறிக்கை கொடுத்துள்ளார். பொறுப்பு அமைச்சர், கமிஷனர், ஏ.டி.ஜி.பி. மற்றும் போராட்டக்காரர்களுடன் பேசி வருகிறோம். விரைவில் தீர்வு வரும். பள்ளிகளில் சாதிய பாகுபாட்டை ஒழிக்க ஓய்வுபெற்ற நீதியரசர் சந்துரு கமிட்டி அறிக்கையை நடைமுறைப்படுத்த வேண்டும். கயிறு கட்டுவது போன்ற அடையாளங்களை தவிர்க்கவும், உடற்பயிற்சி பீரியடை அதிகரிக்கவும் அறிவுறுத்தியுள்ளோம் என்றார்.

இதையும் படிங்க: விவசாயிகளுக்கு ஹேப்பி நியூஸ்.. 50,000 புதிய மின் இணைப்புகள்.. யாருக்கு எவ்வளவு ஒதுக்கீடு?

சீமானை ஆதரிக்கும் திமுக

பார்ப்பன கடப்பாரை கொண்டு திராவிட கோட்டையை இடிப்பேன்", "திருட்டு திமுக" என சீமான் பேசியபோது, கலைஞரை இழிவாக பேசியபோது, பேனாவை உடைப்பேன் என்றபோது திமுகவினர் கண்டிக்கவில்லை. இப்போது மலிவான அரசியல் செய்கின்றனர். ஆரிய திராவிட யுத்தத்தில் ஆரிய கோட்பாட்டை உள்வாங்கிய சீமானை ஆதரிப்பது எந்த விதத்தில் சரி என்பதே எங்கள் கேள்வி. அதற்கு பதில் சொல்லாமல் எங்களை திட்டுவது தான் திமுக நிலைப்பாடா என மக்கள் மன்றத்தில் கேட்கிறேன். நான் கேட்ட கேள்விக்கு திமுகவினர் பதில் சொல்லவில்லை, அதனை திசை திருப்பும் வகையில் தான் பேசி வருகிறார்கள்.

போதையில்லா தமிழகம் என்பதே முக்கியம். யார் செய்தாலும் உடனடியாக நடவடிக்கை எடுத்து சிறைப்படுத்தப்படுகிறது. தனிப்படை அமைக்கப்பட்டுள்ளது என்றார். இது ஜனநாயக நாடு. யாரும் கட்சி தொடங்கலாம், மக்களை சந்திக்கலாம். மக்கள்தான் முடிவு செய்வார்கள். ஆனால் அவர்களின் செயல்பாடுகள் மக்களுக்கானதாக இருக்க வேண்டும்.

இதையும் படிங்க: அள்ளிக்கொடுக்கும் தமிழக அரசு! ஆசிரியர்கள், அரசு ஊழியர்களுக்கு வெளியான ஜாக்பாட் அறிவிப்பு!

டி.ஆர்.பி. ராஜா சொல்வது  நகைச்சுவையா இருக்கு

தமிழ்நாடு அம்பேத்கர், பெரியார், அண்ணா, கலைஞர் கட்டமைத்த மதச்சார்பற்ற மாநிலம். இங்கு இஸ்லாமியர்கள், கிறிஸ்தவர்கள், சிறுபான்மையினருக்கு எதிராக குறி வைத்தால் நடக்காது. மதச்சார்பின்மையும், சமூக நீதியும் இங்கு ஆழமாக வேரூன்றியுள்ளது. அதை யாராலும் அசைக்க முடியாது.
டி.ஆர்.பி. ராஜா சொல்வது தான் இதில் நகைச்சுவையாக இருக்கிறது. எங்களைப் போன்ற ஏழை பாழைகள் தான் இன்றைக்கு அமைச்சராக இருக்கிறோம். அவரைப் போன்ற வசதி படைத்தவர்கள், மிட்டா மிராசுகள் இல்லை இன்றைக்கு. அதனால் அவர் பேசுவது ஒரு நகைச்சுவையாக இருக்கிறது" என்றார்.