“காலம் போட்ட கணக்கு... மடியில் வந்து விழுந்தது!” கூட்டணி அரசியல் குறித்து திருமாவளவன் பேசியது என்ன?
விடுதலைச் சிறுத்தைகள் கட்சியின் கொள்கை, கோட்பாடுகளில் நேர்மையாக இருந்ததால், இன்று அமைச்சரவையில் இடம்பெறக்கூடிய கட்சியாக விசிக உயர்ந்துள்ளது - திருமாவளவன்
விழுப்புரம்: விடுதலைச் சிறுத்தைகள் கட்சியின் கொள்கை, கோட்பாடுகளில் நேர்மையாக இருந்ததால், இன்று அமைச்சரவையில் இடம்பெறக்கூடிய கட்சியாக விசிக உயர்ந்துள்ளது என்றும், கூட்டணி ஆட்சி அமைய வேண்டும் என விரும்பிய நிலையில், அதற்காகத் தாங்கள் எதுவும் செய்யாமலேயே வாய்ப்பு தேடி வந்ததாகவும் விசிக தலைவர் தொல். திருமாவளவன் தெரிவித்துள்ளார்.
திண்டிவனத்தில் விசிக பொதுக்கூட்டம்
விழுப்புரம் மாவட்டம், திண்டிவனத்தில் விடுதலைச் சிறுத்தைகள் கட்சி சார்பில் தமிழ்த்தேசிய எழுச்சி மாநாட்டுத் தீர்மான விளக்கப் பொதுக்கூட்டம் நடைபெற்றது. கட்சித் தலைவர் தொல். திருமாவளவன் தலைமையில் நடைபெற்ற இந்தக் கூட்டத்தில் சமூக நலத்துறை அமைச்சர் வன்னியரசு, நாடாளுமன்ற உறுப்பினர் ரவிக்குமார், விசிக மாநிலப் பொருளாளர் பாலாஜி உள்ளிட்ட கட்சி நிர்வாகிகள் மற்றும் தொண்டர்கள் பங்கேற்றனர்.
இந்தக் கூட்டத்தில் திருமாவளவன் பேசியதாவது:
'விசிகவில் புதிய தலைமுறை இளைஞர்களின் எழுச்சி!'
இந்தியாவிலேயே கட்சி நிர்வாகிகளைத் தங்களது கூட்டத்திற்கு வர வேண்டாம் என்று கூறக்கூடிய இயக்கமாக விசிக இருப்பதாகக் குறிப்பிட்ட திருமாவளவன், கட்சியில் புதிய தலைமுறை இளைஞர்கள் இணைந்து வருவதாகத் தெரிவித்தார்.
தமிழ்த்தேசிய அரசியல் திசைமாறிச் செல்வது குறித்து உளுந்தூர்பேட்டையில் பேச வந்தபோது, தன்னால் அந்தக் கருத்தை முழுமையாகப் பேச முடியாமல் போனதாகவும், அதற்குத் தானே ஒரு தவறு செய்துவிட்டதாகவும் அவர் குறிப்பிட்டார்.
மேடையின் குறுக்கே நடைமேடை அமைக்கப்பட்டிருந்த நிலையில், புதிய தலைமுறையைச் சேர்ந்த இளைஞர்கள் அதன் வழியாக மேடைக்கு வந்ததாகவும், இது அவர்களிடையே ஏற்பட்டுள்ள ஆர்வம், எழுச்சி மற்றும் புதிய ஆற்றலின் வெளிப்பாடு என்றும் அவர் தெரிவித்தார்.
விடுதலைச் சிறுத்தைகள் கட்சியின் மாநாட்டில் பொதுச் சொத்துகளுக்குச் சேதம் ஏற்படுத்தப்படவில்லை என்றும், பொதுமக்களுக்கு எந்தவிதப் பாதிப்பும் ஏற்படாத வகையில் கட்டுக்கோப்பாக நிகழ்ச்சி நடைபெற்றதாகவும் அவர் கூறினார்.
மேடையில் சிலர் ஏறியதை ஒழுங்கீனமாகச் சித்தரித்ததாகவும், மூச்சுத்திணறல் ஏற்பட்டதைச் சிலர் கேலியாகப் பேசியதாகவும் குறிப்பிட்ட அவர், தங்களது இயக்கத்தின் வளர்ச்சியையும் எழுச்சியையும் விரும்பாதவர்கள் இத்தகைய விமர்சனங்களை முன்வைப்பதாகக் கூறினார்.
'கொள்கையில் நேர்மையாக இருந்ததால் அமைச்சரவையில் இடம்பெறும் நிலை!'
சூழ்ச்சிகள், வஞ்சகங்கள் மற்றும் காழ்ப்புணர்ச்சிகளுக்கு மத்தியில் அரசியல் செய்து வருவதாகக் குறிப்பிட்ட திருமாவளவன், அவற்றை எதிர்கொண்டு கொள்கை, கோட்பாடுகளில் நேர்மையாக இருந்ததன் காரணமாகவே விசிக இன்று அமைச்சரவையில் இடம்பெறக்கூடிய கட்சியாக உயர்ந்துள்ளதாகத் தெரிவித்தார்.
திமுக கூட்டணியில் விசிக இடம்பெற்றிருந்த காலத்தில், சாதியவாதக் கட்சிகள் தங்களைத் திமுகவின் ஆதரவாளர்கள் என்றும், கொத்தடிமைகள் என்றும் விமர்சித்ததாகக் குறிப்பிட்டார். இருப்பினும், தங்களது கொள்கை நிலைப்பாட்டில் இருந்து விலகாமல் தொடர்ந்து அரசியல் செய்து வருவதாக அவர் தெரிவித்தார்.
'காலம் போட்ட கணக்கு; தேடி வந்து மடியில் விழுந்த வாய்ப்பு!'
விசிகவுக்குத் தற்போது அமைந்துள்ள அரசியல் சூழலை விளக்குவதற்காக, காக்கை அமர்ந்ததால் பழம் விழுந்ததாகக் கூறப்படும் கதையை திருமாவளவன் உதாரணமாகக் குறிப்பிட்டார். காக்கை அமர்ந்ததால்தான் பழம் விழுந்தது என்று கூற முடியாது; காக்கை அமர்ந்திருந்த நேரத்தில் பழம் விழுந்தது என்பதே உண்மை என்ற பொருளில் அவர் பேசினார்.
அதேபோல், விசிகவுக்கு தற்போது அமைந்திருப்பது காலம் போட்ட கணக்கு என்றும், கூட்டணி ஆட்சி அமைய வேண்டும் எனத் தாங்கள் விரும்பியதாகவும், அதற்காகத் தாங்கள் எதுவும் செய்யாமலேயே அந்த வாய்ப்பு தானாகவே தேடி வந்து மடியில் விழுந்ததாகவும் தெரிவித்தார். திமுக கூட்டணியில் விசிகவைத் தொடர்ந்து தக்கவைத்துக் கொள்ளாததுதான் தங்களது விமர்சனம் என்றும் அவர் குறிப்பிட்டார்.
கூட்டணிக் கணக்கில் சிறிய கட்சி, பெரிய கட்சி என்ற வேறுபாடு இல்லை!
திமுக கூட்டணியில் காங்கிரஸ் கட்சிதான் முதலில் வெளியேறியதாகக் குறிப்பிட்ட திருமாவளவன், இடைத்தேர்தலில் இரண்டாவது இடத்தைப் பிடித்ததை திமுக பெருமையாகக் கூறுவதாக விமர்சித்தார்.
தேர்தலில் முதலிடம் பெற வேண்டும் என்றால் கூட்டணிக் கட்சிகளின் ஆதரவு அவசியம் என்பதைச் சுட்டிக்காட்டிய அவர், கூட்டணியில் உள்ள கட்சிகளின் பங்களிப்பை மதிப்பிடுவதற்கான அரசியல் புரிதல் திமுகவில் உள்ளதா என்ற கேள்வியையும் எழுப்பினார். கூட்டணிக் கணக்கில் சிறிய கட்சி, பெரிய கட்சி என்ற வேறுபாட்டைவிட, தேர்தலில் வெற்றி பெற்று ஆட்சியைக் கைப்பற்றுவதே முக்கியம் என்று அவர் தெரிவித்தார்.
ஆளுங்கட்சியாக இருந்தவர்கள் தேர்தலில் இரண்டாவது இடத்தைப் பிடித்ததைப் பெருமையாகக் கூறுவது, அவர்களின் அரசியல் மனநிலையை வெளிப்படுத்துவதாகவும் விமர்சித்தார். திமுக கூட்டணியில் இருந்து விலகுவது தொடர்பாக விசிக அவசரப்பட்டு முடிவெடுக்கவில்லை என்றும் அவர் கூறினார்.
'பாமக ஆதரவு அளிக்காதபோதும் தவெக வெற்றிக்கு விசிகதான் காரணமா?'
மதுராந்தகம் இடைத்தேர்தலில் எந்தக் கட்சிக்கும் ஆதரவு அளிக்கவில்லை என்று பாமக அறிவித்திருந்த நிலையில், தவெக வெற்றிக்கு விசிகதான் காரணம் எனச் சிலர் கூறுவதாகத் திருமாவளவன் தெரிவித்தார்.
பாஜக, பாமக இடம்பெற்றிருக்கும் கூட்டணியில் விசிக இடம்பெறாது என்பதைத் தொடர்ந்து வலியுறுத்தி வருவதாகவும் அவர் குறிப்பிட்டார். அதே நேரத்தில், பாமக கூட்டணியில் விசிக இடம்பெறாது என்று தொடர்ந்து கூறுவதன் மூலம், வன்னியர் சமூகத்தினரை பாமக அணியில் ஒருங்கிணைக்க உதவுவதாகவும் அவர் கருத்துத் தெரிவித்தார்.
பாமக மூன்று தொகுதிகளில் மட்டுமே வெற்றி பெற்றிருந்த காலகட்டத்தில், ஆதிதிராவிடர் மக்களின் வாக்குகள்தான் அந்த வெற்றிக்குக் காரணம் என்று மருத்துவர் ராமதாஸ் தன்னிடம் கூறியதாகவும் திருமாவளவன் தெரிவித்தார். மேலும், நாடகக் காதல் திருமணங்கள் நடைபெறுவதற்கு திருமாவளவன்தான் காரணம் என்று ராமதாஸ் தமிழகத்தின் 38 மாவட்டங்களிலும் நடைபெற்ற கூட்டங்களில் பேசியதாகவும் அவர் குற்றம்சாட்டினார்.
தமிழ்நாட்டு அரசியலில் திருமாவளவனுக்கு முக்கியத்துவம் கிடைக்கக் கூடாது என்ற நோக்கில் சிலர் செயல்படுவதாகவும் அவர் விமர்சித்தார்.
நாம் தமிழர் கட்சி குறித்தும் விமர்சனம்
நாம் தமிழர் கட்சியை விமர்சித்துப் பேசிய திருமாவளவன், அக்கட்சியில் சீமானைத் தவிர மற்றவர்களுக்குப் போதிய அரசியல் அறிவு இல்லை என்ற கருத்தை முன்வைத்தார். மேலும், சீமானின் தலைமையின் கீழ் செயல்படுபவர்கள் கட்சியைச் சாதியவாதக் கட்சியாக மாற்றிவிட்டதாகவும் விமர்சித்தார். தமிழ்த்தேசியம் பேசும் நாம் தமிழர் கட்சி, தமிழரசன் குறித்துப் பேசியுள்ளதா என்றும் அவர் கேள்வி எழுப்பினார்.
'அரசியலமைப்புச் சட்டத்தைப் பாதுகாக்கவே காங்கிரசுடன் இணைந்துள்ளோம்!'
இந்தியா சாதியப் பாகுபாடுகளும் வன்கொடுமைகளும் நிறைந்த நாடாக இருப்பதாகக் குறிப்பிட்ட திருமாவளவன், அரசியலமைப்புச் சட்டத்தையும் அதன் விழுமியங்களையும் பாதுகாக்கும் வலிமை ராகுல் காந்திக்கும் காங்கிரஸ் கட்சிக்கும் இருப்பதாகத் தெரிவித்தார்.
அரசியலமைப்புச் சட்டத்தைப் பாதுகாப்பதற்காகவே காங்கிரசுடன் இணைந்து இருப்பதாகவும் அவர் கூறினார்.
தமிழ்த்தேசியம் வளர வேண்டும்; அதேபோல் மலையாளத் தேசியமும், கன்னடத் தேசியமும் வளர வேண்டும் என்று குறிப்பிட்ட அவர், இந்தி தேசியம் இந்தி பேசும் பகுதிகளில் மட்டும் வளரட்டும் என்ற கருத்தையும் முன்வைத்தார்.
தெலுங்கு மொழி பேசும் மக்களால் தமிழ் மொழி அழிந்து வருவதாக ஒரு தரப்பினர் கூறுவதாகக் குறிப்பிட்ட அவர், தமிழ்நாட்டில் சிலர் சாதியவாதத்தை மறைமுகமாக முன்னெடுத்து வருவதாகவும் விமர்சித்தார்.
தமிழ்த்தேசியம், சமூக நீதி, சாதி ஒழிப்பு, அரசியலமைப்புச் சட்டப் பாதுகாப்பு மற்றும் கூட்டணி அரசியல் உள்ளிட்ட பல்வேறு விவகாரங்கள் குறித்து திருமாவளவன் பேசிய கருத்துகள், திண்டிவனத்தில் நடைபெற்ற விசிக பொதுக்கூட்டத்தில் அரசியல் முக்கியத்துவம் பெற்றன.
தலைப்பு செய்திகள்
ட்ரெண்டிங் செய்திகள்
