"இந்த மண்ணிற்கு எது தேவை என்பதைத் தமிழகத்தின் அறிவார்ந்த சமூகம் வரும் தேர்தலில் முடிவு செய்யும்," - மயிலாடுதுறையில் சீமான் ஆவேச உரை!
"இந்த மண்ணிற்கு எது தேவை என்பதைத் அறிவார்ந்த சமூகம் வரும் தேர்தலில் முடிவு செய்யும்," என மயிலாடுதுறையில் பெரியாரைப் போற்றுவோம் என்ற தலைப்பில் நடைபெற்ற பொதுக்கூட்டத்தில் சீமான் தெரிவித்துள்ளார்.
மயிலாடுதுறை நகரின் முக்கியப் பகுதியான சின்னக்கடை வீதியில், நாம் தமிழர் கட்சி சார்பில் 'பெரியாரைப் போற்றுவோம்' என்ற தலைப்பில் பிரம்மாண்ட பொதுக்கூட்டம் நேற்று மாலை நடைபெற்றது. இதில் அக்கட்சியின் தலைமை ஒருங்கிணைப்பாளர் சீமான் கலந்து கொண்டு, திராவிட இயக்கங்கள் மற்றும் திமுகவின் அரசியல் நிலைப்பாடுகளைக் கடுமையாகச் சாடி சிறப்புரையாற்றினார்.
பெரியார் யார்? - சீமானின் புதிய விளக்கம்
கூட்டத்தில் உரையாற்றிய சீமான், 'பெரியார்' என்ற சொல்லுக்குப் புதிய பரிமாணத்தை விளக்கினார். "நஞ்சில்லாத உணவை நமக்கு அளித்த அய்யா நம்மாழ்வார் ஒரு பெரியார்; நெல் ரகங்களை மீட்டெடுத்த நெல் ஜெயராமன் ஒரு பெரியார்," என்று பட்டியலிட்ட அவர், தமிழ் மொழி இறந்துவிடக் கூடாது என்பதற்காகத் தன் உயிரைத் தியாகம் செய்த கீழப்பளூர் சின்னசாமி, தாளமுத்து மற்றும் நடராஜன் ஆகியோரே உண்மையான பெரியார்கள் என்று உணர்ச்சிபொங்கப் பேசினார்.
மேலும், "தமிழர் கழகம் என்று தொடங்கப்பட வேண்டிய இயக்கம், ஏன் 'திராவிடர் கழகம்' எனப் பெயர் மாற்றப்பட்டது? இது கொள்கைக்காக அல்ல, பதவிக்காகவே தொடங்கப்பட்டது," என்று கேள்வி எழுப்பிய அவர், மாற்றுக்கருத்துக்களைக் கருத்தாக எதிர்கொள்ளும் முதிர்ந்த அரசியல் பண்பு திராவிட இயக்கத்தினரிடம் துளியும் இல்லை என்று குற்றம் சாட்டினார்.
யார் உண்மையான பி-டீம்? - திமுகவிற்குப் பதிலடி
நாம் தமிழர் கட்சியை பாரதிய ஜனதா கட்சியின் 'பி-டீம்' (B-Team) என்று விமர்சிப்பவர்களுக்குச் சீமான் ஆதாரங்களுடன் பதிலடி கொடுத்தார்.
* கூட்டணி அரசியல்: "திமுக 1962-லேயே ஆர்.எஸ்.எஸ் இயக்கத்தின் முன்னோடியான 'ஜன சங்கத்துடன்' கூட்டணி அமைத்தது. பின்னர் ராஜாஜியுடன் கைகோர்த்தது. அப்படியென்றால் திமுகதான் உண்மையான ஏ-டீம் (A-Team)," என்று சாடினார்.
* பாஜக ஆதரவு: மறைந்த முன்னாள் முதல்வர் ஜெயலலிதா பாஜக ஆட்சியைக் கவிழ்த்தபோது, அந்த ஆட்சிக்கு ஐந்து ஆண்டுகள் முட்டுக் கொடுத்துத் தூக்கிப் பிடித்தது யார்? ஆர்.எஸ்.எஸ் என்பது ஒரு கொள்கை இயக்கம் என்று சான்றிதழ் கொடுத்தது யார்? என்று அடுக்கடுக்கான கேள்விகளை எழுப்பினார்.
*இரட்டை நிலைப்பாடு: "எதிர்க்கட்சியாக இருக்கும்போது 'கோ பேக் மோடி' (Go Back Modi) எனப் பதிவிட்டு கருப்புக்குடை பிடிப்பதும், ஆளுங்கட்சியான பிறகு வெள்ளை குடை பிடித்து வரவேற்பு அளிப்பதும் இவர்களது வாடிக்கை. ராஜ்நாத் சிங்கை அழைத்து நாணயம் வெளியிட்டது யார்? நிதி ஆயக் கூட்டத்தைப் புறக்கணித்தவர்கள், ஒரு 'இடி' (ED) ரெய்டு வந்தவுடன், 'வேண்டாம் இடி, வருகிறோம் மோடி' என்று ஓடிச் சென்றார்கள்," என விமர்சித்தார்.
2026 சட்டமன்ற வேட்பாளர்கள் அறிவிப்பு
இந்தக் கூட்டத்தின் முக்கிய நிகழ்வாக, மயிலாடுதுறை மாவட்டத்தைச் சுற்றியுள்ள நான்கு சட்டமன்றத் தொகுதிகளுக்கான 2026-ஆம் ஆண்டு வேட்பாளர்களைச் சீமான் மேடையிலேயே அறிமுகம் செய்து வைத்தார்:
* மயிலாடுதுறை - காசிராமன் (சமூக செயல்பாட்டாளர்)
* பூம்புகார் - இளைய நகுலன்
*சீர்காழி - அம்பேத்ராஜன்
* திருவிடைமருதூர் - திவ்யபாரதி
அறிவார்ந்த சமூகம் முடிவு செய்யும்
தனது உரையின் நிறைவாகப் பேசிய சீமான், "இன்று தமிழகத்தில் திமுக, அதிமுக மற்றும் தமிழக வெற்றி கழகம் ஆகிய அனைத்தும் 'திராவிடம்' என்ற ஒரே குடையின் கீழ் உள்ளன. ஆனால், 'நாம் தமிழர்' என்ற தனித்துவமான இடத்தில் நாம் நிற்கிறோம். இந்த மண்ணிற்கு எது தேவை என்பதைத் தமிழகத்தின் அறிவார்ந்த சமூகம் வரும் தேர்தலில் முடிவு செய்யும்," என்று கூறி உரையை நிறைவு செய்தார்.
இந்தக் கூட்டத்தில் மயிலாடுதுறை மாவட்ட நாம் தமிழர் கட்சி நிர்வாகிகள், தொண்டர்கள் மற்றும் பொதுமக்கள் எனப் பல்லாயிரக்கணக்கானோர் திரளாகப் பங்கேற்றனர். இதனால் அப்பகுதி முழுவதும் பலத்த போலீஸ்பாதுகாப்பு போடப்பட்டிருந்தது.
தலைப்பு செய்திகள்
ட்ரெண்டிங் செய்திகள்
