30 வருட ஆன்மீகக் காதல்! வீட்டில் 3000 விநாயகர் சிலைகளை குவித்து வைத்த பக்தை..!

மயிலாடுதுறை காவேரி நகரில் 3,000-க்கும் மேற்பட்ட விநாயகர் சிலைகளுடன் வீட்டில் பிரம்மாண்ட கொலு வைத்து நடத்தப்பட்ட விநாயகர் சதுர்த்தி விழா அனைவரது கவனத்தையும் ஈர்த்துள்ளது.

3000 விநாயகர் சிலைகளுடன் வழிபாடு

Source : Abp

மயிலாடுதுறை: ஆன்மீகச் சிறப்பும் வரலாற்றுப் பெருமையும் மிக்க மயிலாடுதுறை நகரத்தில், விநாயகர் சதுர்த்தி விழாவைக் முன்னிட்டு வீடே விநாயகர் மயமாய் மாறும் வகையில் அமைக்கப்பட்ட பிரம்மாண்டமான கொலு பொதுமக்களின் கவனத்தை வெகுவாக ஈர்த்து வருகிறது. மயிலாடுதுறை காவேரி நகர் பகுதியில் வசித்து வரும் ராஜி பாஸ்கரன் என்ற பெண்மணி, விநாயகர் மீது கொண்ட அளப்பரிய பக்தி காரணமாகத் தனது இல்லத்தில் 3000-க்கும் மேற்பட்ட விநாயகர் சிலைகளைக் கொண்டு இந்த அற்புதக் கொலுவை அமைத்துள்ளார். தொடர்ந்து மூன்றாவது ஆண்டாக அமைக்கப்பட்டுள்ள இந்த விநாயகர் கொலுவைக் காண அப்பகுதி பொதுமக்கள் மற்றும் உறவினர்கள் திரண்டு வந்து தரிசனம் செய்து வருகின்றனர்.

முப்பதாண்டு ஆன்மீகப் பயணம்

காவேரி நகரைச் சேர்ந்த ராஜி பாஸ்கரன் கடந்த 30 ஆண்டுகளாகத் தனது இல்லத்தில் நவராத்திரி கொலுவை மிகச் சிறப்பாக அமைத்து வழிபடுவதை வழக்கமாகக் கொண்டுள்ளார். நாளடைவில் விநாயகப் பெருமான் மீது ஏற்பட்ட தீவிர பக்தியின் காரணமாக, நாட்டின் பல்வேறு பகுதிகளுக்குப் பயணிக்கும் போதெல்லாம் விதவிதமான விநாயகர் சிலைகளைச் சேகரிப்பதை ஒரு நற்பணியாகவே செய்து வந்துள்ளார். அதன் விளைவாக, கடந்த 3 ஆண்டுகளாக நவராத்திரி கொலுவைப் போலவே விநாயகர் சதுர்த்தி விழாவிற்கும் பிரத்யேகமாக 'விநாயகர் கொலு' அமைத்து அசத்தி வருகிறார்.

3000 சிலைகளின் பிரமிப்பூட்டும் அணிவகுப்பு

இந்த ஆண்டு அமைக்கப்பட்டுள்ள கொலுவில் ஒரு இன்ச் அளவிலான மிகச்சிறிய சிலைகள் முதல் 3 அடி உயரமுள்ள பெரிய சிலைகள் வரை சுமார் 3,000 விநாயகர் சிலைகள் நேர்த்தியாக அடுக்கப்பட்டு காட்சிப்படுத்தப்பட்டுள்ளன. வீட்டின் கொலுப்படிகள் மட்டுமின்றி, வரவேற்பறை மற்றும் ஷோ-கேஸ் முழுவதும் நிரம்பி வழியும் சிலைகளால் ராஜியின் இல்லமே ஒரு விநாயகர் அருங்காட்சியகம் போலக் காட்சியளிக்கிறது. கடந்த ஆண்டு 2500 சிலைகளுடன் கொலு அமைக்கப்பட்ட நிலையில், இந்த ஓராண்டிற்குள் மட்டும் 500-க்கும் மேற்பட்ட புதிய சிலைகளை அவர் சேகரித்தும், சுயமாக உருவாக்கியும் இதில் சேர்த்துள்ளார் என்பது குறிப்பிடத்தக்கது.

கவனம் ஈர்க்கும் புதிய வரவுகள்

இந்த ஆண்டின் கொலுவில் பல அரிய மற்றும் வினோதமான விநாயகர் வடிவங்கள் இடம்பெற்றுள்ளன. குறிப்பாக முழுத் தேங்காயைப் பயன்படுத்தித் தத்ரூபமாக உருவாக்கப்பட்ட விநாயகர் சிலை பார்வையாளர்களை வியப்பில் ஆழ்த்துகிறது. மேலும், சமுதாயத்திற்கு நல்ல கருத்துகளை உணர்த்தும் வகையில் "தீயதைப் பார்க்காதே, தீயதைப் பேசாதே, தீயதைக் கேட்காதே" என்ற தத்துவத்தின் அடிப்படையில் வடிவமைக்கப்பட்ட மூன்று விநாயகர் சிலைகள் அனைவரின் கவனத்தையும் ஈர்த்து வருகின்றன. இதுதவிர மண்ணால் ஆன சிலைகள், மரச்சிலைகள், உலோகப் படிமங்கள் எனப் பல வண்ணங்களிலும் வடிவங்களிலும் உள்ள விநாயகர்கள் பக்தர்களைப் பரவசப்படுத்துகின்றனர்.

பொதுமக்கள் மற்றும் உறவினர்கள் திரள்

இன்று முதல் தொடர்ந்து 5 நாட்களுக்குப் பொதுமக்கள் பார்வையிடும் வகையில் இந்த கொலு ஏற்பாடு செய்யப்பட்டுள்ளது. மயிலாடுதுறை காவேரி நகர் மற்றும் அதனைச் சுற்றியுள்ள தெருக்களைச் சேர்ந்த பொதுமக்கள், பெண்கள், குழந்தைகள் மற்றும் உறவினர்கள் திரளாக வருகை தந்து இந்த ஆன்மீகக் காட்சியைக் கண்டு ரசித்து வருகின்றனர். கொலுவைப் பார்வையிட வந்த பக்தர்கள் விநாயகப் பெருமானின் புகழ்பாடும் திருப்பாடல்களை மனமுருகப் பாடி வழிபாடு செய்து மகிழ்ந்தனர். தனிநபர் ஒருவர் விநாயகர் மீது கொண்ட தூய பக்தியால் வீடே ஆன்மீகக் கூடமாக மாறியுள்ள இந்த நிகழ்வு, மயிலாடுதுறை மக்களிடையே பெரும் வரவேற்பையும் பாராட்டையும் பெற்றுள்ளது.