5 லட்சம் காலிப்பணியிடங்களை நிரப்பும் தவெக அரசு! ஆனா, அதுக்கு முன்னாடி' தவெக தேர்தல் அறிக்கையை முதல்வர் விஜய்க்கு நினைவுபடுத்திய ஆசிரியர்கள்!

"தற்காலிகப் பணியாளர்களை நிரந்தரமாக்கிய பின்னரே எஞ்சிய காலிப்பணியிடங்களை நிரப்ப வேண்டும்" முதல்வர் விஜய்க்குப் பகுதிநேர ஆசிரியர்கள் கூட்டமைப்பு அவசரக் கோரிக்கை விடுத்துள்ளது.

செயற்கை நுண்ணறிவு சித்தரிப்பு படம்

Source : ABP

தமிழகத்தில் காலியாக உள்ள அரசுப் பணியிடங்களை நிரப்புவதற்கான ஆலோசனைகள் மேற்கொள்ளப்பட்டு வரும் நிலையில், பல ஆண்டுகளாகக் குறைந்த ஊதியத்தில் தற்காலிகமாகப் பணிபுரிந்து வரும் பகுதிநேர ஆசிரியர்கள் மற்றும் இதர துறைப் பணியாளர்களை முதலில் பணி நிரந்தரம் செய்ய வேண்டும் என்று தமிழ்நாடு பகுதிநேர ஆசிரியர்கள் கூட்டமைப்பு வலியுறுத்தியுள்ளது. இதுகுறித்து அக்கூட்டமைப்பின் மாநில ஒருங்கிணைப்பாளர் சி. செந்தில்குமார் விடுத்துள்ள விரிவான அறிக்கையில், தவெக-வின் தேர்தல் வாக்குறுதியை நிறைவேற்றக் கோரி முதலமைச்சர் ஜோசப் விஜய் பகிரங்க வேண்டுகோள் விடுத்துள்ளார்.

5 லட்சம் காலிப்பணியிடங்களும் கசிந்த புதிய தகவல்களும்

தமிழகத்தில் தற்போதைய சூழலில் பல்வேறு அரசுத் துறைகளில் சுமார் 5 லட்சம் காலிப்பணியிடங்கள் இருப்பதாகப் புள்ளிவிவரங்கள் தெரிவிக்கின்றன. முதலமைச்சர் ஜோசப் விஜய் தலைமையிலான 'தமிழக வெற்றிக் கழக' (தவெக) அரசு, இந்தக் காலிப்பணியிடங்களை விரைந்து நிரப்புவதற்கான முதற்கட்டப் பணிகளைத் திட்டமிட்டு வருவதாகத் தலைமைச் செயலக வட்டாரங்களிலிருந்து செய்திகள் கசிந்து வருகின்றன.

">

அரசின் இந்த அதிரடி நடவடிக்கை வரவேற்கத்தக்கதாக இருந்தாலும், பல ஆண்டுகளாகத் தங்களது இளமைக் காலத்தை அரசுப் பணிக்காக அர்ப்பணித்து, தற்காலிக அடிப்படையில் சொற்ப ஊதியத்தில் தவித்து வரும் ஆயிரக்கணக்கான பணியாளர்களின் வாழ்வாதாரத்தை இந்த நேரத்தில் கருத்தில் கொள்ள வேண்டும் என்ற கோரிக்கை பலமாக எழுந்துள்ளது.

துயரத்தில் தற்காலிகப் பணியாளர்கள் மற்றும் 11,773 பகுதிநேர ஆசிரியர்கள்

தற்போது தமிழ்நாடு அரசின் 83 முக்கியத் துறைகளில் பல ஆயிரக்கணக்கான ஊழியர்கள் தற்காலிக மற்றும் ஒப்பந்த அடிப்படையில் மிகக் குறைந்த தொகுப்பூதியத்தில் பல ஆண்டுகளாகப் பணியாற்றி வருகின்றனர். அதேபோல், பள்ளி கல்வித்துறையின் கீழ் மட்டும் சுமார் 11,773 பகுதிநேர ஆசிரியர்கள் நீண்ட காலமாகத் தங்களது வாழ்வாதாரத்தை இழந்து தவித்து வருகின்றனர்.

தற்காலிகப் பணியில் நீடிப்பதால், இவர்களுக்கு மருத்துவக் காப்பீடு, வருங்கால வைப்பு நிதி (PF), ஓய்வூதியம் உள்ளிட்ட எந்தவொரு அரசுப் பணப்பலன்களும் சலுகைகளும் கிடைப்பதில்லை. இதனால் இவர்களது ஒட்டுமொத்த குடும்பங்களும் பொருளாதார ரீதியாகக் கடுமையாகப் பாதிக்கப்பட்டு, எஞ்சிய வாழ்க்கை நாட்களையாவது நிம்மதியாக வாழக் காலமுறைச் சம்பளம் (Regular Scale of Pay) கிடைக்காதா என்ற ஒற்றை எதிர்பார்ப்போடு காத்துக் கிடக்கின்றனர்.

வாக்குறுதியை நிறைவேற்றுவாரா முதல்வர் விஜய்?

தமிழக வெற்றிக் கழகம் கடந்த சட்டமன்றத் தேர்தலின் போது வெளியிட்ட தங்களது அதிகாரப்பூர்வ தேர்தல் அறிக்கையில், தற்காலிகப் பணியாளர்களின் நலன் காக்கும் மிக முக்கிய வாக்குறுதி ஒன்றை அளித்திருந்தது.

தவெக தேர்தல் வாக்குறுதி

"தமிழக அரசுத் துறைகளிலும், பள்ளி கல்வித்துறையிலும் 5 ஆண்டுகளை நிறைவு செய்த அனைத்து தற்காலிக ஆசிரியர்கள் மற்றும் தற்காலிகப் பணியாளர்கள் அனைவரும் முன்னுரிமை அடிப்படையில் பணி நிரந்தரம் செய்யப்படுவார்கள்."

தற்போது தவெக ஆட்சிப் பொறுப்பேற்று, முதல்வர் விஜய் தலைமையில் அரசு இயங்கி வரும் நிலையில், தங்களுக்கு அளித்த அந்த முதன்மையான தேர்தல் வாக்குறுதியை முதல்வர் உடனடியாக நிறைவேற்ற வேண்டும் எனப் பகுதிநேர ஆசிரியர்கள் மிகுந்த எதிர்பார்ப்போடு ஆவலுடன் காத்துள்ளனர்.

சிறப்பாசிரியர்களாக மாற்ற வேண்டும்: கூட்டமைப்பு வலியுறுத்தல்

கடந்த 15 ஆண்டுகளுக்கும் மேலாகப் பள்ளி கல்வித்துறையில் தற்காலிகப் பணியில் உழன்று வரும் 11,773 பகுதிநேர ஆசிரியர்களின் நிலைமை மிகவும் பரிதாபகரமாக உள்ளது. இவர்கள் உடற்கல்வி, ஓவியம், கணினி அறிவியல், தையல், இசை, வாழ்க்கைக்கல்வி, கட்டிடக்கலை மற்றும் தோட்டக்கலை ஆகிய பாடப் பிரிவுகளில் மாணவர்களுக்குத் திறம்படப் பயிற்சி அளித்து வருகின்றனர்.

தற்போது இவர்களுக்கு வழங்கப்படும் ரூ.15,000/- என்ற மிகக் குறைந்த தொகுப்பூதியத்தை வைத்துக்கொண்டு இந்த விலைவாசி உயர்வில் குடும்பம் நடத்த முடியாமல் தவித்து வருகின்றனர். எனவே, இவர்கள் அனைவரையும் உடனடியாக முறைப்படி 'சிறப்பாசிரியர்களாக' (Special Teachers) நியமனம் செய்து, அவர்களுக்குரிய காலமுறைச் சம்பளத்தை அரசு வழங்க வேண்டும். அப்போதுதான் அவர்களின் எதிர்காலத்திற்கும், குடும்ப வாழ்வாதாரத்திற்கும் நிரந்தரப் பாதுகாப்பு கிடைக்கும் என அறிக்கையில் சுட்டிக்காட்டப்பட்டுள்ளது.

டெட் (TET) தேர்ச்சி பெற்றவர்களுக்கும் முன்னுரிமை

மேலும், ஆசிரியர் தகுதித் தேர்வு (TET) எழுதி, அரசு விதிமுறைகளின்படி தகுதி பெற்று, பல ஆண்டுகளாக ஆசிரியர் பணிக்காகக் காத்துக் கிடக்கும் தகுதியான இளைஞர்களின் கோரிக்கையையும் இந்த அரசு கனிவோடு பரிசீலிக்க வேண்டும். அரசுப் பள்ளிகளில் தற்போது காலியாக உள்ள இடைநிலை, பட்டதாரி மற்றும் முதுநிலை ஆசிரியர்களுக்கான காலிப்பணியிடங்களை நிரப்பும்போது, டெட் தேர்வில் தேர்ச்சி பெற்று சான்றிதழ் வைத்துள்ள ஆசிரியர்களுக்கு முன்னுரிமை வழங்கி அவர்களைப் பணியமர்த்த வேண்டும் எனவும் கோரப்பட்டுள்ளது.

எஞ்சிய இடங்களை மட்டும் புதியவர்களுக்கு வழங்குக!

எனவே, தமிழக அரசு தற்போது திட்டமிட்டுள்ள மாபெரும் காலிப்பணியிடங்கள் நிரப்பும் உத்தியில், ஏற்கனவே 15 ஆண்டுகளுக்கும் மேலாகப் பணியாற்றி வரும் 11,773 பகுதிநேர ஆசிரியர்கள் மற்றும் 83 துறைகளில் உள்ள தற்காலிகப் பணியாளர்களை முதலில் முழுமையாகப் பணி நிரந்தரம் செய்ய வேண்டும். அவ்வாறு அவர்களை நிரந்தரமாக்கிய பின்பு, மீதமுள்ள எஞ்சிய காலிப்பணியிடங்களை முறைப்படி புதிய தகுதியான தேர்வர்களைக் கொண்டு நிரப்ப வேண்டும் எனத் தமிழ்நாடு பகுதிநேர ஆசிரியர்கள் கூட்டமைப்பின் சார்பில் அதன் மாநில ஒருங்கிணைப்பாளர் செந்தில்குமார் தமிழக அரசுக்குக் கோரிக்கை விடுத்துள்ளார்.