வேஸ்ட் டு வெல்த் (Waste to Wealth): பிளாஸ்டிக் கழிவுகளுக்கு பூம்புகாரில் செக் வைத்த மாவட்ட ஆட்சியர்!

மயிலாடுதுறை மாவட்டம் பூம்புகாரில் தூய்மை பாரத இயக்கம் சார்பில் கழிவுப் பொருட்களிலிருந்து கைவினைப் பொருட்கள் தயாரிக்கும் பயிற்சியை மாவட்ட ஆட்சியர் ஹெச்.எஸ்.ஸ்ரீகாந்த் தொடங்கி வைத்தார்.

பயிற்சியினை துவங்கி வைத்த மாவட்ட ஆட்சியர்

Source : Abp

மயிலாடுதுறை: மயிலாடுதுறை மாவட்டம், சீர்காழி அடுத்த புகழ்பெற்ற சுற்றுலாத் தலமான பூம்புகாரில் அமைந்துள்ள சுற்றுலாத்துறை அலுவலக வளாகத்தில் தூய்மை பாரத இயக்கம் (SBM) திட்டத்தின் கீழ் சிறப்பான பயிற்சி முகாம் நடைபெற்றது. அன்றாடம் பயன்படுத்தப்பட்டு வீணாக தூக்கி எறியப்படும் கழிவுப் பொருட்கள் மற்றும் பிளாஸ்டிக் கழிவுகளிலிருந்து பயனுள்ள கலை மற்றும் கைவினைப் பொருட்கள் (Art & Craft) தயாரிக்கும் இந்த சிறப்புப் பயிற்சியினை மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த், குத்துவிளக்கேற்றி தொடங்கி வைத்தார்.

சுற்றுச்சூழல் விழிப்புணர்வு மற்றும் பயிற்சியின் முக்கிய நோக்கம்

இன்றைய காலகட்டத்தில் பிளாஸ்டிக் மற்றும் கழிவு மேலாண்மை என்பது மிக முக்கியமான சவாலாக உருவெடுத்துள்ளது. இதனை கருத்தில் கொண்டு நடத்தப்படும் இந்தப் பயிற்சியின் முக்கிய நோக்கம், அன்றாடம் வீடுகளில் பயன்படுத்தப்பட்டு தூக்கி எறியப்படும் கழிவுப் பொருட்கள் மற்றும் பிளாஸ்டிக் கழிவுகளை முறையாகச் சேகரிப்பதாகும். அவ்வாறு சேகரிக்கப்படும் கழிவுகளை எறிந்துவிடாமல், மறுபயன்பாடு மற்றும் மறுசுழற்சி முறைகளின் மூலம் அழகிய மற்றும் பயனுள்ள கலைப் பொருட்களாக மாற்றுவது குறித்து ஆர்வமுள்ள குழந்தைகளுக்குச் செய்முறைப் பயிற்சி அளிப்பதே இதன் மையக்கருத்தாகும். இதன் மூலம் சிறுவயதிலேயே குழந்தைகளுக்குச் சுற்றுச்சூழல் குறித்த விழிப்புணர்வை ஏற்படுத்த முடிகிறது.

குழந்தைகளின் படைப்பாற்றலை ஊக்குவிக்கும் செய்முறைப் பயிற்சி

சிறார்களின் படைப்பாற்றல் மற்றும் கைவினைத் திறனை மேம்படுத்தும் வகையில், பயன்பாடற்ற பொருட்களிலிருந்து பல்வேறு அலங்காரப் பொருட்கள் மற்றும் அன்றாட வாழ்க்கைக்குப் பயன்படும் கைவினைப் பொருட்களை உருவாக்கும் எளிமையான முறைகள் இங்கு விரிவாகப் பயிற்றுவிக்கப்படுகின்றன. குறிப்பாக, சுற்றுப்புறத்தைச் மாசுபடுத்தும் பிளாஸ்டிக் பாட்டில்கள், பழைய காகிதங்கள், அட்டைப் பெட்டிகள் மற்றும் பிற பயன்படுத்தப்பட்ட பொருட்களைச் சுற்றுச்சூழலுக்கு எவ்வித பாதிப்பும் ஏற்படாத வகையில் பயன்படுத்தி, நயம்படக் கலைப்பொருட்களாக மாற்றுவது குறித்து நேரடிச் செய்முறைப் பயிற்சி வழங்கப்பட்டு வருகிறது.

கழிவுகளை வளமாக மாற்றும் விழிப்புணர்வு நடவடிக்கை

இப்பயிற்சியின் மூலம் குழந்தைகள் தங்களது ஒளிந்துள்ள படைப்பாற்றலை வெளிப்படுத்துவதுடன், வீட்டிலும் பள்ளியிலும் உருவாகும் வீண் கழிவுகளைப் பயனுள்ள வகையில் கையாளும் நற்பழக்கத்தை இயல்பாகவே வளர்த்துக்கொள்ள முடியும். இது தூய்மையான சுற்றுச்சூழலை உருவாக்குவதில் எதிர்காலத் தலைமுறையான குழந்தைகளின் பங்களிப்பை கணிசமாக அதிகரிக்கும். மேலும், பொதுமக்களிடையே கழிவு மேலாண்மை குறித்த விழிப்புணர்வை ஏற்படுத்தவும் இது பெரும் வழிகோலும். “கழிவுகளை வளமாக மாற்றுதல்” (Waste to Wealth) என்ற உன்னதமான கருத்தைச் இளைய தலைமுறையினரிடையே ஆழமாகப் பதிய வைப்பதோடு, ஒருமுறை மட்டுமே பயன்படுத்தப்படும் பிளாஸ்டிக் பொருட்களின் பயன்பாட்டைக் குறைத்தல், கழிவுகளை வீடுகளிலேயே மக்கக்கூடியவை மற்றும் மக்காதவை எனத் தரம் பிரித்துச் சேகரித்தல், மறுசுழற்சி செய்தல் மற்றும் இயற்கையைப் பாதுகாத்தல் ஆகியவற்றின் அவசியமும் தெளிவாக விளக்கப்படுகிறது.

பசுமை மாவட்டத்தை உருவாக்க எதிர்காலத் தலைமுறையின் பங்களிப்பு

எதிர்காலத் தலைமுறையினரிடம் சுற்றுச்சூழல் பாதுகாப்பு குறித்த பொறுப்புணர்வையும், சமூகக் கடமையையும் இயல்பாகவே ஏற்படுத்தி, தூய்மையான மற்றும் பசுமையான மயிலாடுதுறை மாவட்டத்தை உருவாக்குவதற்கான அரசு சாரந்த அனைத்து முயற்சிகளிலும் குழந்தைகளையும் முனைப்புடன் பங்கேற்கச் செய்வதே இந்நிகழ்ச்சியின் பிரதான இலக்காகும்.பூம்புகாரில் தொடங்கப்பட்ட இந்த விழிப்புணர்வு முயற்சி, அப்பகுதி மக்களிடையே பெரும் வரவேற்பைப் பெற்றுள்ளது.

அரசு அலுவலர்கள் மற்றும் ஒருங்கிணைப்பாளர்கள் பங்கேற்பு

மிகவும் பயனுள்ள வகையில் அமைந்த இந்நிகழ்ச்சியின் போது, மயிலாடுதுறை மாவட்ட கூடுதல் ஆட்சியர் (வளர்ச்சி) கோகுல், உதவி திட்ட அலுவலர் சங்கர், தூய்மை பாரத இயக்கத்தின் மாவட்ட ஒருங்கிணைப்பாளர், வட்டார ஒருங்கிணைப்பாளர்கள், உள்ளாட்சி அமைப்புகளின் பிரதிநிதிகள் மற்றும் ஊராட்சி செயலாளர் உட்பட அரசுத் துறை அலுவலர்கள், ஆசிரியர்கள், பொதுமக்கள் பலர் கலந்துகொண்டு சிறப்பித்தனர்.