வாக்குறுதியை மீறிய தனியார் நிறுவனம்! - மயிலாடுதுறை பெரியார் அரசு மருத்துவமனையில் எழும் கூலித்திருட்டு குற்றச்சாட்டு!

தேர்தல் வாக்குறுதியின் படி 5 ஆண்டுகள் பணிமுடித்தவர்களைப் பணி நிரந்தரம் செய்ய உழைப்போர் உரிமை இயக்கம் வலியுறுத்தியுள்ளது.

அரசு மருத்துவமனை தொழிலாளிகள் போராட்டம்

Source : Abp

மயிலாடுதுறை: மயிலாடுதுறை அரசினர் பெரியார் மாவட்ட தலைமை மருத்துவமனையில் ஒப்பந்த அடிப்படையில் பணிபுரிந்து வரும் தூய்மைப் பணியாளர்கள் உள்ளிட்ட தொழிலாளர்கள், தங்களுக்கு ஒப்பந்தப்படி முழுமையான ஊதியம் வழங்கக் கோரியும், நீண்ட நாள் கோரிக்கையான பணி நிரந்தரத்தை வலியுறுத்தியும் திடீரென பணிகளைப் புறக்கணித்து மருத்துவமனை வளாகத்திற்குள் உள்ளிருப்புப் போராட்டத்தில் ஈடுபட்டு வருகின்றனர். இதனால் மருத்துவமனையின் அன்றாடச் சுகாதாரப் பணிகள் பெரிதும் பாதிக்கப்படும் சூழல் உருவாகியுள்ளது.

ஒப்பந்த மீறலும் கூலிக்குறைப்பும்

மயிலாடுதுறை அரசு தலைமை மருத்துவமனையில் சுமார் 160 தூய்மைப் பணியாளர்கள் ஒப்பந்த அடிப்படையில் பணியாற்றி வருகின்றனர். தமிழ்நாடு மருத்துவக் கவுன்சிலுடன் ஒப்பந்தம் செய்துள்ள ஸ்மித் என்ற தனியார் நிறுவனம், இங்கு பணியாற்றும் ஒரு தொழிலாளிக்கு மாத ஊதியமாக ரூ.18,894 வழங்க வேண்டும் என்பது விதியாகும். ஆனால், இந்தத் தொகையை முழுமையாக வழங்காமல் தொடர்ந்து குறைத்து வழங்கி வந்ததாகப் பணியாளர்கள் குற்றம்சாட்டுகின்றனர். இந்த ஒப்பந்தத்தை முறையான முறையில் நடைமுறைப்படுத்தி நிலுவையின்றி முழுச் சம்பளத்தையும் வழங்கக் கோரி, உழைப்போர் உரிமை இயக்கம் சார்பில் கடந்த ஆகஸ்ட் 28-ஆம் தேதி போராட்டம் நடத்தப்படும் என அறிவிக்கப்பட்டது.

தோல்வியில் முடிந்த அமைதி பேச்சுவார்த்தை

போராட்ட அறிவிப்பைத் தொடர்ந்து, கடந்த ஆகஸ்ட் 27-ஆம் தேதி மயிலாடுதுறை கோட்டாட்சியர் அலுவலகத்தில் இருதரப்பினரையும் அழைத்து அமைதி பேச்சுவார்த்தை நடத்தப்பட்டது. இந்த அதிகாரப்பூர்வப் பேச்சுவார்த்தையின் போது, ஒப்பந்தத்தில் குறிப்பிட்டுள்ள முழுத் தொகையையும் தொழிலாளர்களுக்குச் சம்பளமாக வழங்குவதாக சம்பந்தப்பட்ட தனியார் நிறுவனம் ஒப்புக்கொண்டது. இருப்பினும், உறுதியளித்தபடி நடக்காமல், சமீபத்தில் வழங்கப்பட்ட ஊதியத்தில் தொழிலாளி ஒருவருக்கு ரூ.3,000 வரை குறைத்து வழங்கப்பட்டுள்ளது. இதனால் அதிர்ச்சியடைந்த தொழிலாளர்கள், தனியார் நிறுவனத்தின் வாக்குறுதி மீறலைக் கண்டித்து மீண்டும் போராட்டப் பாதையைத் தேர்ந்தெடுக்க நேரிட்டுள்ளதாக கூறியுள்ளனர்.

பணிகளைப் புறக்கணித்து தீவிர போராட்டம்

மயிலாடுதுறை அரசு மருத்துவமனையில் மொத்தம் உள்ள 160 ஒப்பந்தத் தொழிலாளர்கள் மூன்று சுழற்சி முறைகளில் (Shift) பணியாற்றி வருகிறார்கள். இந்நிலையில், நிறுவனத்தின் அநீதியைக் கண்டித்து காலை சுழற்சியில் பணியில் ஈடுபட வேண்டிய 50-க்கும் மேற்பட்ட தொழிலாளர்கள் தங்களின் பணிகளைப் புறக்கணித்தனர். மருத்துவமனை வளாகத்திற்குள் ஒன்றுதிரண்ட அவர்கள், தங்கள் உரிமைகளை வலியுறுத்தி உள்ளிருப்புப் போராட்டத்தில் ஈடுபட்டனர். இப்போராட்டம் குறித்துத் தகவலறிந்த மயிலாடுதுறை காவல் ஆய்வாளர் சிவசெந்தில்குமார் தலைமையிலான காவல்துறையினர் சம்பவ இடத்திற்கு விரைந்து வந்து, போராட்டத்தில் ஈடுபட்டுள்ள தொழிலாளர்களிடம் பேச்சுவார்த்தை நடத்தி நிலைமையைச் சீரமைக்கும் முயற்சியில் ஈடுபட்டு வருகின்றனர்.

இயக்கத்தின் கண்டனமும் கோரிக்கைகளும்

இப்போராட்டம் குறித்து உழைப்போர் உரிமை இயக்கத்தின் மாநிலச் செயலாளர் வீரச்செல்வன் கூறுகையில், ஸ்மித் நிறுவனம் ஒப்பந்தத் தொழிலாளர்களுக்குத் தருவதாக உறுதியளித்த சம்பளத்தை வழங்காமல் தொடர்ந்து கூலித்திருட்டில் ஈடுபட்டு வருவதாகக் கடுமையாகக் குற்றம்சாட்டினார். அத்துடன், தொழிலாளர்களின் உழைப்பைச் சுரண்டும் இந்த நிறுவனம் உடனடியாக மயிலாடுதுறை அரசு பெரியார் மருத்துவமனையை விட்டு வெளியேற வேண்டும் என்றும் வலியுறுத்தினார். மேலும், மருத்துவமனையில் பல ஆண்டுகளாகச் பணியாற்றி வரும் தூய்மைப் பணியாளர்கள், பிளம்பர், எலக்ட்ரீசியன், சலவைத் தொழிலாளி மற்றும் சமையல் தொழிலாளி உள்ளிட்ட அனைத்துப் பிரிவு தொழிலாளர்களையும் எவ்வித நிபந்தனையுமின்றி உடனடியாகப் பணி நிரந்தரம் செய்ய அரசு நடவடிக்கை எடுக்க வேண்டும் எனக் கேட்டுக்கொண்டார்.

தமிழக முதலமைச்சரின் தேர்தல் வாக்குறுதியின்படி, 5 ஆண்டுகளைப் பூர்த்தி செய்த அனைத்துத் தூய்மைப் பணியாளர்களையும் பணி நிரந்தரம் செய்ய வேண்டும் என்ற முதன்மையான கோரிக்கையை முன்வைத்தே உழைப்போர் உரிமை இயக்கம் சார்பில் இந்த வேலைநிறுத்தமும் உள்ளிருப்புப் போராட்டமும் முன்னெடுக்கப்பட்டுள்ளதாகத் தெரிவித்தார். தொழிலாளர்களின் நியாயமான கோரிக்கைகள் முழுமையாக நிறைவேற்றப்படும் வரை இந்த உள்ளிருப்புப் போராட்டம் ஓயாது என அவர் உறுதியளித்துள்ளார்.