மயிலாடுதுறையில் தொடரும் குண்டாஸ்... இன்று இருவர் குண்டாஸில் கைது..!

மயிலாடுதுறை மாவட்டத்தில் தொடர் கஞ்சா மற்றும் மதுபான விற்பனையில் ஈடுபட்ட இருவரை குண்டர் தடுப்புச் சட்டத்தில் காவல்துறையினர் சிறையில் அடைத்தனர்.

குண்டாஸில் கைதானவர்கள்

Source : Abp

மயிலாடுதுறை: மயிலாடுதுறை மாவட்டத்தில் தொடர்ந்து கஞ்சா விற்பனை மற்றும் சட்டவிரோத மதுபான வியாபாரத்தில் ஈடுபட்டு வந்த இரண்டு முக்கிய நபர்களை, மாவட்ட காவல் கண்காணிப்பாளரின் பரிந்துரையின் பேரில் மாவட்ட ஆட்சியர் குண்டர் தடுப்புச் சட்டத்தின் (தடுப்புக் காவல் சட்டம்) கீழ் சிறையில் அடைக்க உத்தரவிட்டுள்ளார். இந்த உத்தரவினைத் தொடர்ந்து குற்றவாளிகள் இருவரும் தடுப்புக் காவல் சட்டத்தின் கீழ் கைது செய்யப்பட்டு சிறையில் அடைக்கப்பட்டுள்ளனர்.

கஞ்சா வியாபாரி கைது மற்றும் பின்னணி

கடந்த ஆகஸ்ட் மாதம் முதலாம் தேதி (01.08.2026) மயிலாடுதுறை நகர்ப் பகுதியில் சட்டவிரோதமாக கஞ்சா விற்பனை செய்யப்படுவதாக மதுவிலக்கு அமல்பிரிவு காவல்துறையினருக்கு ரகசிய தகவல் கிடைத்தது. அந்தத் தகவலின் அடிப்படையில் சம்பவ இடத்திற்கு விரைந்து சென்ற காவல்துறையினர் தீவிர சோதனை மேற்கொண்டனர். அப்போது மயிலாடுதுறை திருவிழந்தூர், தீப்பாய்ந்தாள் அம்மன் கோவில் தெருவைச் சேர்ந்த சந்திரசேகர் என்பவரின் மகனான ஆகாஷ் (எ) மணிகண்டன் (23) என்பவர் சட்டவிரோதமாக கஞ்சா பொட்டலங்களை வைத்து விற்பனை செய்து கொண்டிருந்தபோது கையும் களவுமாகப் பிடிபட்டார்.

அவரிடமிருந்த கஞ்சா பறிமுதல் செய்யப்பட்டு, மயிலாடுதுறை மதுவிலக்கு அமல்பிரிவு காவல் நிலையத்தின் மூலம் வழக்குப் பதிவு செய்யப்பட்டு, அவர் நீதிமன்றத்தில் ஆஜர்படுத்தப்பட்டு நீதிமன்றக் காவலுக்கு அனுப்பப்பட்டார்.

சட்டவிரோத மதுபான விற்பனையில் கைதானவர்

இதனைத் தொடர்ந்து, அடுத்த நாளான ஆகஸ்ட் இரண்டாம் தேதி (02.08.2026) மணல்மேடு காவல் சரகத்திற்குட்பட்ட பகுதியில் சட்டவிரோதமாக மதுபான விற்பனை நடப்பதாகக் கிடைத்த தகவலின் பேரில் மணல்மேடு காவல்துறையினர் சோதனை நடத்தினர். அப்போது பூதங்குடி ஆண்டவர் நகரைச் சேர்ந்த செல்வமணி என்பவரின் மகனான சிவா (எ) தொப்பி சிவா (29) என்பவர் சட்டவிரோத மது விற்பனையில் ஈடுபட்டது கண்டறியப்பட்டது. இதையடுத்து அவரைக் கைது செய்த காவல்துறையினர், விற்பனைக்காக வைக்கப்பட்டிருந்த மதுபானப் பொருட்களைப் பறிமுதல் செய்தனர். இந்தச் சம்பவம் தொடர்பாக மணல்மேடு காவல் நிலையத்தில் வழக்குப்பதிவு செய்யப்பட்டு எதிரி சிவா நீதிமன்றக் காவலுக்கு அனுப்பப்பட்டார்.

மாவட்ட ஆட்சியரின் அதிரடி உத்தரவு

கைது செய்யப்பட்ட ஆகாஷ் (எ) மணிகண்டன் மற்றும் சிவா (எ) தொப்பி சிவா ஆகிய இருவரும் தொடர்ந்து பொதுமக்களுக்கு இடையூறாகவும், சட்டம் ஒழுங்கிற்குப் பங்கம் விளைவிக்கும் வகையிலும் குற்றச்செயல்களில் ஈடுபட்டு வருவதை காவல்துறையினர் கண்டறிந்தனர். இதனையடுத்து சமூக அமைதியைப் பாதுகாக்கும் பொருட்டும், குற்றச் செயல்களைத் தடுக்கும் பொருட்டும் இவ்விருவர் மீதும் குண்டர் தடுப்புச் சட்டத்தின் கீழ் நடவடிக்கை எடுக்க மயிலாடுதுறை மாவட்ட காவல் கண்காணிப்பாளர் Dr. B. சினேஹா ப்ரியா, மாவட்ட ஆட்சியருக்குப் பரிந்துரை செய்தார். அப்பரிந்துரையை பரிசீலித்த மயிலாடுதுறை மாவட்ட ஆட்சியர், நேற்று (27.08.2026) எதிரிகள் இருவரையும் தடுப்புக் காவல் சட்டத்தின் கீழ் சிறையில் அடைக்க உத்தரவு பிறப்பித்தார். அவ்வுத்தரவின் அடிப்படையில் இன்று (28.08.2026) இரு எதிரிகளும் தடுப்புக் காவல் சட்டத்தின் கீழ் சிறையில் அடைக்கப்பட்டனர்.

நடப்பாண்டில் 45 நபர்கள் மீது குண்டாஸ் பாய்ந்தது

மயிலாடுதுறை மாவட்டத்தில் குற்றச் செயல்களைக் கட்டுப்படுத்த காவல்துறை தீவிர நடவடிக்கை எடுத்து வருகிறது. அந்த வகையில் நடப்பாண்டில் இதுவரை கொலைக் குற்றச் சம்பவங்களில் ஈடுபட்ட 5 நபர்கள், பொது அமைதிக்கு பங்கம் விளைவித்த 13 நபர்கள், மதுவிலக்கு குற்றங்களில் ஈடுபட்ட 9 நபர்கள், கஞ்சா விற்பனை குற்றங்களில் ஈடுபட்ட 15 நபர்கள், புகையிலைப் பொருட்கள் மற்றும் குட்கா விற்பனையில் ஈடுபட்ட ஒரு நபர் மற்றும் பாலியல் குற்றங்களில் ஈடுபட்ட 2 நபர்கள் என மொத்தம் 45 நபர்கள் மீது குண்டர் தடுப்புச் சட்டத்தின் கீழ் நடவடிக்கை எடுக்கப்பட்டு சிறையில் அடைக்கப்பட்டுள்ளனர்.

மாவட்ட காவல் கண்காணிப்பாளர் கடும் எச்சரிக்கை

மாவட்டத்தில் சமூக விரோதச் செயல்களில் ஈடுபடும் நபர்களின் செயல்பாடுகள் தொடர்ந்து தீவிரமாகக் கண்காணிக்கப்பட்டு வருகின்றன. பொதுமக்களை அச்சுறுத்தும் வகையில் ரௌடிசத்தில் ஈடுபடுபவர்கள், பெண்கள் மற்றும் குழந்தைகளுக்கு எதிரான பாலியல் குற்றங்களில் ஈடுபடுபவர்கள், கஞ்சா மற்றும் தடைசெய்யப்பட்ட புகையிலைப் பொருட்களை விற்பனை செய்பவர்கள், சட்டவிரோத மது விற்பனையில் ஈடுபடுவோர் மீது எவ்விதத் தாட்சணியமுமின்றி குண்டர் தடுப்புச் சட்டத்தின் கீழ் கடுமையான நடவடிக்கை மேற்கொள்ளப்படும் என்று மாவட்ட காவல் கண்காணிப்பாளர் கடுமையாக எச்சரிக்கை விடுத்துள்ளார்.