அதிகாரிகளை மிரளச் செய்த ரேஷன் அரிசி கடத்தல்! லாரியுடன் அரிசி மூட்டைகள் பறிமுதல்.. ஒருவர் கைது.
மயிலாடுதுறையில் சட்டவிரோதமாக மதுரைக்குக் கடத்தப்பட்ட ரேஷன் அரிசி பறிமுதல் செய்யப்பட்டதுடன், தொடர்புடைய நபர் கைது செய்யப்பட்டுள்ளார்.
மயிலாடுதுறையில் சட்டவிரோதமாக மதுரைக்குக் கடத்தப்பட்ட ரேஷன் அரிசி பறிமுதல் செய்யப்பட்டதுடன், தொடர்புடைய நபர் கைது செய்யப்பட்டுள்ளார்.
மயிலாடுதுறை: மயிலாடுதுறை மாவட்டம் சீர்காழி மற்றும் அதன் சுற்றுவட்டாரப் பகுதிகளில் பொதுமக்களுக்கு விநியோகிக்கப்படும் விலையில்லா ரேஷன் அரிசி முறைகேடான முறையில் வெளி மாவட்டங்களுக்குக் கடத்தப்படுவதாகக் குடிமைப் பொருள் வழங்கல் குற்றப் புலனாய்வுத்துறை மற்றும் வருவாய்த் துறையினருக்குத் தொடர்ந்து ரகசியத் தகவல்கள் வந்துகொண்டு இருந்தன.
குறிவைக்கப்பட்ட கடற்கரை கிராமங்கள்
இப்பகுதிகளில் உள்ள கடற்கரை கிராமங்களை மையமாகக் கொண்டு இந்தச் சட்டவிரோதச் செயல்கள் அரங்கேறி வருவதாகப் புகார்கள் எழுந்ததைத் தொடர்ந்து, அதிகாரிகள் தீவிரக் கண்காணிப்பில் ஈடுபட்டு வந்தனர். அதன் அடிப்படையில், சீர்காழி அருகே அமைந்துள்ள திருமுல்லைவாசல், தொடுவாய், பழையார் உள்ளிட்ட பல்வேறு மீனவர் கிராமப் பகுதிகளில் குடிமைப் பொருள் வழங்கல் வட்டாட்சியர் சண்முகம் தலைமையிலான வருவாய்த் துறை அதிகாரிகளும் காவல்துறையினரும் இணைந்து திடீர் சோதனையில் ஈடுபட்டனர்.
பதுக்கி வைக்கப்பட்டிருந்த ரேஷன் அரிசி மூட்டைகள்
அப்போது, குறிப்பிட்ட ஒரு பகுதியில் பொதுமக்களிடம் இருந்து குறைந்த விலைக்குப் பெறப்பட்டு சட்டவிரோதமாகப் பதுக்கி வைக்கப்பட்டிருந்த பெருமளவிலான ரேஷன் அரிசி மூட்டைகள் லாரியில் ஏற்றப்படுவது அதிகாரிகளின் திடீர் சோதனையில் கண்டறியப்பட்டது. உடனடியாகச் செயல்பட்ட அதிகாரிகள் அந்த இடத்தைச் சுற்றி வளைத்துச் சோதனையை மேற்கொண்டதில், பொதுமக்களுக்கு விநியோகிக்கப்பட வேண்டிய அரசு ரேஷன் அரிசி லாரியில் பதுக்கப்பட்டு வேறு மாவட்டத்திற்குக் கடத்தப்படுவது உறுதியானது. இதனையடுத்து, அங்கு நின்றுகொண்டிருந்த மதுரை மாவட்டத்தைச் சேர்ந்த குமார் என்பவரை காவல்துறையினர் மடக்கிப் பிடித்துக் கைது செய்தனர்.
லாரி மற்றும் அரிசி மூட்டைகள் பறிமுதல்
மேலும், இந்தச் கடத்தல் சம்பவத்திற்குக் பயன்படுத்தப்பட்ட லாரியையும், அதில் ஏற்றி வைக்கப்பட்டிருந்த ஏராளமான ரேஷன் அரிசி மூட்டைகளையும் அதிகாரிகள் முழுமையாகப் பறிமுதல் செய்தனர். பறிமுதல் செய்யப்பட்ட ரேஷன் அரிசி மற்றும் வாகனத்தின் சந்தை மதிப்பு சுமார் ஒரு லட்சம் ரூபாய் இருக்கும் என்று முதற்கட்ட விசாரணையில் மதிப்பிடப்பட்டுள்ளது.
தீவிர புலன்விசாரணை
இச்சம்பவம் குறித்துக் கைது செய்யப்பட்ட குமாரிடம் தீவிர விசாரணை நடத்தப்பட்டு வருவதோடு, இந்தச் சட்டவிரோதக் கடத்தல் நெட்வொர்க்கில் தொடர்புடைய மற்ற நபர்கள் யார், உள்ளூர் அளவிலும் வெளி மாவட்ட அளவிலும் இவர்களுக்கு உடந்தையாக இருந்த இடைத்தரகர்கள் எவரேனும் உள்ளனரா? என்பது குறித்தும் காவல்துறையினர் மற்றும் குடிமைப் பொருள் வழங்கல் துறையினர் விரிவான புலனாய்வை மேற்கொண்டு வருகின்றனர்.
பொதுமக்களுக்குச் சென்று சேர வேண்டிய அவசியப் பொருட்களைத் துஷ்பிரயோகம் செய்து இதுபோன்று சட்டவிரோதமாகக் கடத்துவோர் மீது கடுமையான சட்ட நடவடிக்கைகள் எடுக்கப்படும் என்று மாவட்ட நிர்வாகத்தின் சார்பில் எச்சரிக்கப்பட்டுள்ளதுடன், இது போன்ற சமூக விரோதச் செயல்கள் குறித்துத் பொதுமக்கள் உரிய தகவல்களை உடனடியாகத் தெரிவிக்கலாம் எனவும் அறிவுறுத்தப்பட்டுள்ளது.
பொதுமக்களின் நலனுக்காக அரசு வழங்கும் விலையில்லாப் பொருட்களைச் சட்டவிரோதமாகக் கடத்துவோர் மீது மாவட்ட நிர்வாகம் மற்றும் குடிமைப் பொருள் வழங்கல் துறையினர் தொடர்ந்து கடுமையான நடவடிக்கைகளை எடுத்து வருகின்றனர். இதுபோன்ற சமூக விரோதச் செயல்களில் ஈடுபடும் நபர்களைக் கண்டறிந்து உரிய தண்டனை வழங்குவதுடன், எதிர்காலத்தில் இது போன்ற குற்றங்கள் நடைபெறாமல் இருக்கத் தீவிரக் கண்காணிப்புப் பணிகளை அதிகாரிகள் மேலும் துரிதப்படுத்த வேண்டும் என்பதே அனைவரின் எதிர்பார்ப்பாகும்.
தலைப்பு செய்திகள்
ட்ரெண்டிங் செய்திகள்
