நீளும் பட்டியல்... மயிலாடுதுறை மாவட்டத்தில் இதுவரை 54 பேர் குண்டாஸில் சிறையில் அடைப்பு!

மயிலாடுதுறை மாவட்டத்தில் பல்வேறு குற்றச்செயல்களில் ஈடுபட்ட 54 பேரை காவல்துறையினர் குண்டர் சட்டத்தில் சிறையில் அடைத்து அதிரடி நடவடிக்கை எடுத்துள்ளனர்.

எஸ்பி மற்றும் குண்டாஸில் கைதான நபர்

Source : Abp

மயிலாடுதுறை: மயிலாடுதுறை மாவட்டம் பெரம்பூர் பகுதியைச் சேர்ந்த சரித்திர பதிவேடு குற்றவாளி ஒருவர் பொதுமக்களை கத்தியைக் காட்டி அச்சுறுத்திய வழக்கில் கைது செய்யப்பட்டு, தற்போது மாவட்ட ஆட்சியரின் உத்தரவின் பேரில் குண்டர் தடுப்புச் சட்டத்தின் கீழ் கடலூர் மத்திய சிறையில் அடைக்கப்பட்டுள்ளார். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

திரௌபதியம்மன் கோயில் அருகே நடந்த துயர சம்பவம்

மயிலாடுதுறை மாவட்டம், பெரம்பூர் காவல் நிலைய எல்லைக்குட்பட்ட ஐயனார்கோயில் தெருவைச் சேர்ந்த மாரிமுத்து என்பவரின் 19 வயது மகன் சக்திவேல் ஆவார். இவர் மீது ஏற்கனவே பெரம்பூர் காவல் நிலையத்தில் போக்கிரி சரித்திர பதிவேடு துவக்கப்பட்டு, காவல்துறையினரால் தொடர்ந்து தீவிர கண்காணிப்பில் வைக்கப்பட்டு வந்தார்.

இந்நிலையில், கடந்த ஆகஸ்ட் மாதம் 22-ஆம் தேதி (22.08.2026) கீழப்பெரம்பூர் பகுதியில் அமைந்துள்ள திரௌபதியம்மன் கோயில் அருகே சக்திவேல் கையில் கூர்மையான கத்தியை வைத்துக்கொண்டு, அவ்வழியாகச் சென்ற பொதுமக்களை கடுமையாக அச்சுறுத்தி, கொலை மிரட்டல் விடுத்துக்கொண்டிருந்தார்.

சிறப்பு உதவி ஆய்வாளர் புகார் மற்றும் கைது நடவடிக்கை

அன்றைய தினம் அப்பகுதியில் ரோந்து பணியில் ஈடுபட்டுக்கொண்டிருந்த பெரம்பூர் காவல் நிலைய சிறப்பு உதவி ஆய்வாளர், பொதுமக்களுக்கு ஆபத்தை விளைவிக்கும் வகையில் நடந்து கொண்ட சக்திவேலின் செயல்களை உடனடியாகக் கவனித்தார். இது குறித்து அவர் அளித்த புகாரின் அடிப்படையில், பெரம்பூர் காவல்துறையினர் வழக்குப் பதிவு செய்து, குற்றவாளி சக்திவேலை உடனடியாகக் கைது செய்தனர். கைது செய்யப்பட்ட அவர், நீதிமன்ற உத்தரவின்படி நீதிமன்றக் காவலுக்கு உட்படுத்தப்பட்டு சிறையில் அடைக்கப்பட்டார்.

எஸ்பி பரிந்துரையும் மாவட்ட ஆட்சியரின் உத்தரவும்

நீதிமன்றக் காவலில் இருந்த போதிலும், சக்திவேல் தொடர்ந்து பொது அமைதிக்கு கடுமையான பங்கம் விளைவிக்கும் வகையில் நடந்து கொள்வதை உணர்ந்த காவல்துறையினர், அவர் மீது மேலும் கடுமையான நடவடிக்கை எடுக்கத் திட்டமிட்டனர். இதன்படி, மயிலாடுதுறை மாவட்ட காவல் கண்காணிப்பாளர் Dr. B. சினேஹா ப்ரியா, சமூக விரோத செயல்களில் ஈடுபட்டு வரும் சக்திவேலை குண்டர் தடுப்புச் சட்டத்தின் கீழ் சிறையில் அடைக்க வேண்டும் என மயிலாடுதுறை மாவட்ட ஆட்சியருக்கு முறைப்படி பரிந்துரை செய்தார். மாவட்ட காவல் கண்காணிப்பாளரின் பரிந்துரையை பரிசீலித்த மயிலாடுதுறை மாவட்ட ஆட்சியர், சக்திவேலை தடுப்பு காவல் சட்டத்தின்படி கைது செய்ய உத்தரவு பிறப்பித்தார்.

கடலூர் மத்திய சிறையில் அடைப்பு

மாவட்ட ஆட்சியரின் உத்தரவு பெறப்பட்டதைத் தொடர்ந்து, பெரம்பூர் காவல் துறையினர் 18.09.2026 அன்று எதிரி சக்திவேலை குண்டர் சட்டத்தின் கீழ் நடவடிக்கை எடுத்து, கடலூர் மத்திய சிறைக்குக் கொண்டு சென்று அடைத்தனர். சரித்திர பதிவேடு குற்றவாளி குண்டர் சட்டத்தில் சிறையில் அடைக்கப்பட்ட சம்பவம், அப்பகுதியில் குற்றச்செயல்களில் ஈடுபட நினைப்போருக்கு ஒரு பாடமாக அமைந்துள்ளது.

நடப்பாண்டில் 54 நபர்கள் மீது குண்டாஸ் பாய்ந்தது

மயிலாடுதுறை மாவட்டத்தில் குற்றச் செயல்களைக் கட்டுப்படுத்த காவல்துறை பல்வேறு தீவிர நடவடிக்கைகளை மேற்கொண்டு வருகிறது. அதன் ஒரு பகுதியாக, நடப்பாண்டில் மட்டும் மாவட்டத்தில் பொது அமைதிக்கும் சட்டம் ஒழுங்குக்கும் பங்கம் விளைவித்த பல்வேறு குற்றவாளிகள் மீது குண்டர் தடுப்புச் சட்டம் பாய்ச்சப்பட்டுள்ளது. அதன்படி, கொலைக் குற்றச் சம்பவங்களில் ஈடுபட்ட 5 நபர்கள், பொது அமைதிக்கு பங்கம் விளைவித்த 18 நபர்கள், சட்டவிரோத மதுவிலக்குக் குற்றங்களில் ஈடுபட்ட 9 நபர்கள், கஞ்சா விற்பனை மற்றும் கடத்தலில் ஈடுபட்ட 19 நபர்கள், தடைசெய்யப்பட்ட குட்கா புகையிலைப் பொருட்கள் விற்பனை செய்த 1 நபர் மற்றும் பாலியல் குற்றங்களில் ஈடுபட்ட 2 நபர்கள் என மொத்தம் 54 நபர்கள் இதுவரையிலும் தடுப்பு காவல் சட்டத்தின் கீழ் கைது செய்யப்பட்டு சிறையில் அடைக்கப்பட்டுள்ளனர்.

மாவட்ட காவல் கண்காணிப்பாளர் எச்சரிக்கை

மாவட்டத்தில் சமூக விரோதச் செயல்களில் ஈடுபடும் நபர்களின் நடவடிக்கைகள் அனைத்தும் காவல்துறையினரால் தொடர்ந்து தீவிரமாகக் கண்காணிக்கப்பட்டு வருவதாக மாவட்ட காவல் கண்காணிப்பாளர் தெரிவித்துள்ளார். மேலும், பொதுமக்களை அச்சுறுத்தும் வகையில் ரவுடிசத்தில் ஈடுபடுபவர்கள், பெண்கள் மற்றும் குழந்தைகளுக்கு எதிரான பாலியல் குற்றங்களில் ஈடுபடும் கொடூரர்கள், கஞ்சா மற்றும் தடை செய்யப்பட்ட புகையிலைப் பொருட்களை விற்பனை செய்பவர்கள், சட்டவிரோத மதுவிலக்குக் குற்றங்களில் ஈடுபடுபவர்கள் மீது எவ்வித தாட்சண்யமும் இன்றி குண்டர் தடுப்புச் சட்டத்தின் கீழ் கடுமையான நடவடிக்கை தொடரும் என்று மாவட்ட காவல் கண்காணிப்பாளர் மிக கடுமையாக எச்சரிக்கை விடுத்துள்ளார்.