வீட்டில் தனியாக இருந்த 14 வயது சிறுமி… அத்துமீறிய வாலிபர்... காத்திருந்த பேரதிர்ச்சி..! 

மயிலாடுதுறை மாவட்டம் சீர்காழியில் 14 வயது சிறுமிக்கு பாலியல் தொல்லை கொடுத்த வாலிபரை குண்டர் சட்டத்தில் கைதுசெய்து கடலூர் மத்திய சிறையில் போலீஸார் அடைத்துள்ளனர்.

எஸ்பி மற்றும் குண்டாஸில் கைதான நபர்

Source : Abp

மயிலாடுதுறை: மயிலாடுதுறை மாவட்டத்தில் 14 வயது சிறுமிக்கு பாலியல் தொந்தரவு அளித்த குற்றத்திற்காகக் கைது செய்யப்பட்ட நபரை மீது, மாவட்ட காவல் கண்காணிப்பாளரின் பரிந்துரையின் பேரில் குண்டர் தடுப்புச் சட்டம் பிரயோகிக்கப்பட்டு சிறையில் அடைக்கப்பட்டுள்ள சம்பவம் பெரும் பரபரப்பை ஏற்படுத்தியுள்ளது.

சம்பவம் குறித்த விவரம்

மயிலாடுதுறை மாவட்ட எல்லைக்குட்பட்ட பகுதியில் 14 வயது சிறுமி ஒருவர் தனது வீட்டில் தனியாக இருந்த சமயத்தைப் பயன்படுத்தி, ஒருவர் அத்துமீறி நுழைந்து அச்சிறுமியிடம் பாலியல் சீண்டலில் ஈடுபட்டுள்ளார். இதனால் அதிர்ச்சியடைந்த சிறுமி, இச்சம்பவம் குறித்துத் தனது பெற்றோரிடம் தெரிவித்துள்ளார். அதனைத் தொடர்ந்து, பாதிக்கப்பட்ட சிறுமி அளித்த புகாரின் அடிப்படையில், சீர்காழி அனைத்து மகளிர் காவல் நிலைய போலீசார் உடனடியாக வழக்குப் பதிவு செய்து தீவிர விசாரணை மேற்கொண்டனர்.

போக்சோ சட்டத்தின் கீழ் நடவடிக்கை

காவல்துறையினர் நடத்திய முதற்கட்ட விசாரணையில், தரங்கம்பாடி தாலுக்கா, ஓடக்கரை, ரயிலடி தெருவைச் சேர்ந்த மணி என்பவரின் மகன் சங்கர் (31) என்பவர்தான் சிறுமிக்கு பாலியல் தொல்லை கொடுத்த குற்றவாளி என்பது உறுதி செய்யப்பட்டது. இதனையடுத்து, சீர்காழி அனைத்து மகளிர் காவல் நிலைய ஆய்வாளர் தமிழ்செல்வி குற்றவாளி சங்கர் மீது குழந்தைகளை பாலியல் குற்றங்களிலிருந்து பாதுகாக்கும் போக்சோ (POCSO - 2012) சட்டத்தின் கீழ் வழக்குப் பதிவு செய்தார். தொடர்ந்து தீவிர புலன்விசாரணை மேற்கொண்டு வந்த காவல் ஆய்வாளர், எதிரி சங்கரைக் கைது செய்து நீதிமன்றத்தில் ஆஜர்படுத்தி நீதிமன்றக் காவலுக்கு அனுப்பி வைத்தார்.

குண்டர் சட்டத்தில் அடைக்க பரிந்துரை

பெண்கள் மற்றும் குழந்தைகளுக்கு எதிரான குற்றங்களில் ஈடுபடும் நபர்கள் மீது கடுமையான நடவடிக்கை எடுக்கப்பட்டு வருகிறது. அந்த வகையில், சிறுமியிடம் பாலியல் அத்துமீறலில் ஈடுபட்ட எதிரி சங்கரின் தொடர் குற்றச் செயல்களைக் கட்டுப்படுத்தும் நோக்கிலும், சமுதாய அமைதியைப் பேணும் வகையிலும், அவர் மீது குண்டர் தடுப்புச் சட்டத்தின் கீழ் நடவடிக்கை எடுக்க மயிலாடுதுறை மாவட்ட காவல் கண்காணிப்பாளர் Dr. B. சினேஹா ப்ரியா, தீவிர நடவடிக்கை மேற்கொண்டார். இதற்காக உரிய ஆதாரங்களுடன் மயிலாடுதுறை மாவட்ட ஆட்சியருக்குக் மாவட்ட காவல் கண்காணிப்பாளர் அவர்கள் முறைப்படி பரிந்துரை செய்தார்.

மாவட்ட ஆட்சியர் உத்தரவு & சிறையில் அடைப்பு

மாவட்ட காவல் கண்காணிப்பாளரின் பரிந்துரையையும், வழக்கில் சமர்ப்பிக்கப்பட்ட ஆவணங்களையும் ஆய்வு செய்த மயிலாடுதுறை மாவட்ட ஆட்சியர், குற்றவாளி சங்கரைத் தடுப்பு காவல் சட்டத்தின் கீழ் (குண்டர் சட்டம்) சிறையில் அடைக்க அதிரடி உத்தரவைப் பிறப்பித்தார். மாவட்ட ஆட்சியரின் உத்தரவின்படி, சீர்காழி அனைத்து மகளிர் காவல் நிலைய ஆய்வாளர் தமிழ்செல்வி தலைமயிலான காவல் ஆளிநர்கள், குற்றவாளி சங்கரை (31) கடலூர் மத்திய சிறையில் அடைத்து நடவடிக்கையை நிறைவு செய்தனர்.

நடப்பாண்டில் 55 நபர்கள் மீது பாய்ந்த குண்டாஸ்

மயிலாடுதுறை மாவட்டத்தில் சட்டம் ஒழுங்கைப் பராமரிக்கவும், குற்றச் செயல்களைத் தடுக்கவும் மாவட்ட காவல்துறை சார்பாக அதிரடி நடவடிக்கைகள் தொடர்ந்து எடுக்கப்பட்டு வருகின்றன. அதன்படி, நடப்பாண்டில் இதுவரை கொலைக் குற்றச் சம்பவங்களில் ஈடுபட்ட 5 நபர்கள், பொது அமைதிக்குப் பங்கம் விளைவித்த 18 நபர்கள், மதுவிலக்கு குற்றங்களில் ஈடுபட்ட 9 நபர்கள், கஞ்சா விற்பனையில் ஈடுபட்ட 19 நபர்கள், தடைசெய்யப்பட்ட புகையிலைப் பொருட்களான குட்கா விற்பனையில் ஈடுபட்ட ஒரு நபர் மற்றும் பாலியல் குற்றங்களில் ஈடுபட்ட 3 நபர்கள் உட்பட மொத்தம் 55 நபர்கள் மீது குண்டர் தடுப்புக் காவல் சட்டத்தின் கீழ் வழக்குப் பதிவு செய்யப்பட்டு சிறையில் அடைக்கப்பட்டுள்ளனர் என்பது குறிப்பிடத்தக்கது.

எஸ்.பி-யின் கடுமையான எச்சரிக்கை

மாவட்ட காவல் கண்காணிப்பாளர் Dr. B. சினேஹா ப்ரியா, வெளியிட்டுள்ள செய்திக்குறிப்பில், சமூக விரோதச் செயல்களில் ஈடுபடும் அனைத்து நபர்களின் செயல்பாடுகளும் காவல்துறையினரால் தீவிரமாகக் கண்காணிக்கப்பட்டு வருகிறது‌. மேலும், பொதுமக்களை அச்சுறுத்தும் வகையில் ரௌடிசத்தில் ஈடுபடுபவர்கள், பெண்கள் மற்றும் குழந்தைகளுக்கு எதிராகப் பாலியல் குற்றங்களில் ஈடுபடுபவர்கள், கஞ்சா மற்றும் தடை செய்யப்பட்ட புகையிலைப் பொருட்களைப் சட்டவிரோதமாக விற்பனை செய்பவர்கள், மற்றும் மதுவிலக்கு குற்றங்களில் ஈடுபடுவோர் யாராக இருந்தாலும் அவர்கள் மீது குண்டர் தடுப்புச் சட்டத்தின் கீழ் மிகக் கடுமையான நடவடிக்கை எடுக்கப்படும் எனத் திட்டவட்டமாக எச்சரித்துள்ளார்.