தூக்கக் கலக்கத்தால் வந்த வினை! மயிலாடுதுறை அருகே மின்கம்பத்தில் மோதி நொறுங்கிய வேன் - 12 பக்தர்கள் படுகாயம்!

மயிலாடுதுறை அருகே ஓட்டுநர் தூக்கக் கலக்கத்தால் ஏற்பட்ட விபத்தில் வேனில் பயணித்தகள் படுகாயமடைந்த சம்பவம் பெரும் சோகத்தை ஏற்படுத்தியுள்ளது.

விபத்துக்குள்ளான வேன்

Source : Abp

மயிலாடுதுறை: சேலம் மாவட்டத்தைச் சேர்ந்த 22 பக்தர்கள் அடங்கிய குழுவினர், மயிலாடுதுறை மாவட்டத்தில் உள்ள புகழ்மிக்க வைத்தீஸ்வரன் கோயில் வைத்தியநாத சுவாமியை தரிசனம் செய்வதற்காக இன்று அதிகாலை வேனில் புறப்பட்டு வந்துகொண்டிருந்தனர். ஆன்மீகப் பயணமாக உத்வேகத்துடன் தொடங்கிய இவர்களின் பயணம், இலக்கை அடைவதற்கு சில மணி நேரங்களுக்கு முன்பாக எதிர்பாராதவிதமாக பெரும் விபத்தில் முடிந்தது.

சேலத்தில் இருந்து புறப்பட்ட இவர்கள், மயிலாடுதுறை பகுதியை நோக்கிப் பயணித்துக் கொண்டிருந்த வேளையில், அதிகாலை நேரத்தில் சாலையில் போக்குவரத்து மிகவும் குறைவாகவே காணப்பட்டது.

சேத்திரபாலபுரத்தில் கட்டுப்பாட்டை இழந்த வேன்

மயிலாடுதுறை மாவட்டம் குத்தாலம் அருகே உள்ள சேத்திரபாலபுரம் பகுதியில் அதிகாலை வேன் வந்துகொண்டிருந்தது. அப்போது வேனை சேலம் வலைகொம்பை பகுதியைச் சேர்ந்த 32 வயதான சத்ரியன் என்பவர் இயக்கி வந்தார். நீண்ட நேரத் தொடர் பயணத்தின் காரணமாக சத்ரியன் கடுமையான தூக்கக் கலக்கத்திலும் அசதியிலும் இருந்ததாகக் கூறப்படுகிறது.

எதிர்பாராதவிதமாக ஓட்டுநர் கண்ணயர்ந்ததால், வேகம் குறைந்த நிலையில் இருந்த வேன் திடீரென ஓட்டுநரின் கட்டுப்பாட்டை இழந்து, சாலையின் ஓரத்தில் அமைந்திருந்த மின்கம்பத்தின் மீது பலமாக மோதியது.

மின்கம்பம் மற்றும் கோயில் கொட்டகையில் மோதி நொறுங்கிய வாகனம்

மின்சாரக் கம்பத்தின் மீது மோதிய வேகத்தில் வேன் நிற்காமல், அதற்கு அருகிலேயே அமைந்திருந்த ஜீவசமாதி அடைந்த உறிகட்டி சுவாமிகள் கோயிலின் கொட்டகைக்குள்ளும் சீறிப் பாய்ந்து மோதியது. அதிகாலை நேர அமைதியை கிழிக்கும் வகையில் உருவான பயங்கர சத்தத்தைக் கேட்டு, அப்பகுதியில் இருந்த கிராம மக்கள் அதிர்ச்சியடைந்து அலறியடித்துக் கொண்டு வீடுகளை விட்டு வெளியே ஓடி வந்தனர். மின்கம்பம் உடைந்த நிலையிலும், கோயில் கொட்டகையின் ஒரு பகுதி பலத்த சேதமடைந்த நிலையிலும் வேன் உருக்குலைந்து நிற்பதைக் கண்டு உடனடியாக அவர்கள் மீட்புப் பணிகளில் இறங்கினர்.

12 பேர் படுகாயம்: ஆம்புலன்ஸ் மூலம் அரசு மருத்துவமனைக்கு மாற்றம்

இந்த கொடூர விபத்தில் வேனை இயக்கிய ஓட்டுநர் சத்ரியன் பலத்த காயமடைந்தார். மேலும் வேனுள் பயணித்த சேலத்தைச் சேர்ந்த சரண்யா (34), ஜனார்த்தனன் (13), விஜயலட்சுமி (60), ஞானம் (70), கதிர்வேல் (28), சித்ரா (24) ஆகியோரும், திருச்சி மண்ணச்சநல்லூர் பகுதியைச் சேர்ந்த கிருஷ்ணவேணி (66), சந்திரசேகர் (74) உள்ளிட்ட மொத்தம் 12 பக்தர்கள் உடலின் பல்வேறு இடங்களில் பலத்த காயமடைந்தனர். விபத்து நடந்த இடத்தை உடனடியாக அடைந்த பகுதி பொதுமக்கள், வேனுக்குள் சிக்கி அலறிய காயமடைந்தவர்களை ஒவ்வொன்றாக மீட்டு வெளியே கொண்டு வந்தனர். உடனடியாக 108 ஆம்புலன்ஸ் சேவைக்குத் தகவல் தெரிவிக்கப்பட்டு, அனைத்துக் காயமடைந்தவர்களும் அவசர அவசரமாக மயிலாடுதுறை அரசு மருத்துவமனைக்குச் சிகிச்சைக்காக அனுப்பி வைக்கப்பட்டனர்.

ஓட்டுநர் தஞ்சாவூருக்கு மாற்றம்: குத்தாலம் போலீசார் வழக்குப்பதிவு

மயிலாடுதுறை அரசு மருத்துவமனையில் காயமடைந்த பக்தர்களுக்குப் தீவிர சிகிச்சை அளிக்கப்பட்டு வருகிறது. இருப்பினும், பலத்த காயமடைந்த ஓட்டுநர் சத்ரியனின் உடல்நிலை தீவிர கவலைக்கிடமாக இருந்ததால், மேல் சிகிச்சைக்காக அவர் உடனடியாக தஞ்சாவூர் அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டார். இச்சம்பவம் குறித்துத் தகவல் அறிந்த குத்தாலம் காவல் நிலையப் பகுதியின் போலீசார் உடனடியாக சம்பவ இடத்திற்கு விரைந்து வந்து பார்வையிட்டு விசாரணை மேற்கொண்டனர். விபத்து தொடர்பாகக் வழக்குப்பதிவு செய்துள்ள குத்தாலம் போலீசார், ஓட்டுநரின் தூக்கக் கலக்கமே விபத்திற்குக் காரணமா அல்லது வாகனத்தில் ஏதேனும் இயந்திரக் கோளாறு ஏற்பட்டதா என்பது குறித்தும் தொடர்ந்து விசாரணை நடத்தி வருகின்றனர். ஆன்மீகப் பயணம் மேற்கொண்டு வந்த இடத்தில் 12 பக்தர்கள் காயமடைந்த சம்பவம் அப்பகுதியில் பெரும் பரபரப்பையும் சோகத்தையும் ஏற்படுத்தியுள்ளது.