"கலெக்டருக்கு இரக்கமே இல்லையா?" - மழையில் நனைந்தபடி சென்ற மாணவர்கள்.. கொந்தளிக்கும் பெற்றோர்கள்!

மயிலாடுதுறை மாவட்டத்தில் தொடர் மழை பெய்து வரும் நிலையில் பள்ளி, கல்லூரிகளுக்கு விடுமுறை அளிக்காத மாவட்ட நிர்வாகத்தின் மீது பெற்றோர்கள் கடும் கண்டனம் தெரிவித்துள்ளனர்.

மழையில் நனைந்த மாணவர்கள்

Source : Abp

மழையும் விடல... கலெக்டர் லீவும் விடல! மயிலாடுதுறை பள்ளி மாணவர்களின் பரிதாப நிலை!

மயிலாடுதுறை:வங்கக்கடலில் உருவான ஆழ்ந்த காற்றழுத்தத் தாழ்வு மண்டலம் புயலாக வலுப்பெற்றுள்ள நிலையில், மயிலாடுதுறை மாவட்டம் முழுவதும் இரவு முதல் விடாமல் கொட்டி தீர்த்து வரும் தொடர் மழையால் பொதுமக்களின் இயல்பு வாழ்க்கை முழுமையாகப் பாதிக்கப்பட்டுள்ளது. நேற்று இரவு முதல் மயிலாடுதுறை மாவட்டத்தின் பல்வேறு பகுதிகளில் தொடரும் கனமழையின் காரணமாக மக்களின் இயல்பு இயக்கம் முடங்கியுள்ளது. 

குறிப்பாக, தரங்கம்பாடி, சீர்காழி மற்றும் அதன் சுற்றுவட்டாரப் பகுதிகளில் பெய்து வரும் மழையின் காரணமாகத் தாழ்வான சாலைகளில் மழைநீர் பெருக்கெடுத்து ஓடுகிறது. இதனால் அந்த வழியாக அலுவலகங்களுக்கும், அவசர தேவைகளுக்கும் செல்லும் பொதுமக்கள் மற்றும் வாகன ஓட்டிகள் பெரும் சிரமத்திற்கு ஆளாகியுள்ளனர். இத்தகைய மோசமான வானிலை நிலவும் சூழலில், மாவட்டத்தின் பாதுகாப்பைக் கருத்தில் கொள்ளாமல் மாவட்ட ஆட்சியர் பள்ளி மற்றும் கல்லூரிகளுக்கு விடுமுறை அறிவிக்கத் தவறியது மாணவர்கள் மற்றும் பெற்றோர்கள் மத்தியில் பெரும் கொந்தளிப்பையும், காரசாரமான விவாதங்களையும் ஏற்படுத்தியுள்ளது.

மயிலாடுதுறை மாவட்டத்தில் விடிய விடிய பெய்த தொடர் மழையால் சாலைகளில் மழைநீர் குளம் போல் தேங்கியதுடன், மக்களின் அன்றாட நடவடிக்கைகளும் கடுமையாகப் பாதிக்கப்பட்டன. நள்ளிரவு முதல் தொடர்ந்து பெய்து வந்த மழையைக் கவனித்த பெற்றோர்களும், மாணவ-மாணவர்களும் இன்று காலை எப்படியும் மாவட்ட ஆட்சியர் பள்ளி மற்றும் கல்லூரிகளுக்கு விடுமுறை அறிவிப்பார் என்று பெரிதும் எதிர்பார்த்து காத்திருந்தனர். ஆனால், மாவட்ட நிர்வாகம் தரப்பிலிருந்து எந்தவிதமான முன்னெச்சரிக்கை அறிவிப்பும் வெளியாகாததாலும், உரிய நேரத்தில் விடுமுறை அளிக்கப்படாததாலும் அனைவரும் மிகுந்த ஏமாற்றம் அடைந்தனர். 

இதன்காரணமாக, கொட்டும் மழையிலும், குளிர்காற்றிலும் சிறுவர்களும், இளம் வயது மாணவர்களும் குடை பிடித்தபடியும், மழையில் நனைந்தவாறே பள்ளி மற்றும் கல்லூரிகளுக்குச் செல்லும் பரிதாப நிலைக்குத் தள்ளப்பட்டனர். இயற்கைச் சீற்றத்தை உணராமல் நிர்வாகம் காட்டிய இந்த மெத்தனப்போக்கு குழந்தைகளின் பாதுகாப்பைக் கேள்விக்குறியாக்கியுள்ளதாகப் பொதுமக்கள் குற்றம் சாட்டுகின்றனர்.

மயிலாடுதுறை மாவட்டத்தின் பல்வேறு கிராமப் பகுதிகளில் இருந்து நகர்ப்புறங்களுக்கு கல்வி கற்கச் செல்லும் மாணவ-மாணவிகள் படும் இன்னல்கள் வார்த்தைகளால் விவரிக்க முடியாதவை ஆகும். குறிப்பாக, பழையாறு, பூம்புகார் போன்ற கடலோர மற்றும் கிராமப்புறப் பகுதிகளில் இருந்து அரசு மற்றும் தனியார் பேருந்துகளில் நீண்ட தூரம் பயணம் செய்து நகர்ப்பகுதி கல்வி நிலையங்களுக்குச் செல்லும் மாணவ மாணவிகள் இந்த மழையில் பெரும் அவதிக்கு உள்ளாகினர். பேருந்து நிறுத்தங்களிலும், சேறும் சகதியுமான சாலைகளிலும் நின்று கொண்டு மாணவர்கள் சிரமப்பட்டதைப் பார்த்த பெற்றோர்களின் மனம் பதைபதைத்தது.

தொடர் மழையில் குழந்தைகள் நனைந்து கொண்டே பள்ளிக்குச் செல்வதால் அவர்களுக்குச் சளி, காய்ச்சல், வைரஸ் தொற்று மற்றும் உடல்நலக் குறைவு போன்ற நோய் பாதிப்புகள் ஏற்படும் அபாயம் உள்ளதாகப் பெற்றோர்கள் தங்களது கடுமையான வேதனையையும் ஆத்திரத்தையும் வெளிப்படுத்தியுள்ளனர். இயற்கைப் பேரிடர் காலங்களில் கூட மாணவர்களின் நலனை முதன்மையாகக் கருதாமல், ஆட்சியர் அலுவலகம் காலம் தாழ்த்தி எடுக்கும் முடிவுகளும், அலட்சியப் போக்கும் கண்டிக்கத்தக்கவை என்று பலரும் குரல் கொடுத்து வருகின்றனர்.

பள்ளி செல்லும் பச்சிளம் குழந்தைகள் மற்றும் பள்ளி மாணவ-மாணவிகளின் உடல்நலம் மற்றும் பாதுகாப்பில் மாவட்ட ஆட்சியர் எவ்விதக் கவனமும் செலுத்தாமல் அலட்சியம் காட்டியுள்ளதாகக் கூறி பெற்றோர்களும் சமூக ஆர்வலர்களும் தங்களது கடும் கண்டனங்களைத் தெரிவித்து வருகின்றனர். அருகில் உள்ள மாவட்டங்களில் தொடர் மழையை முன்னிட்டு முறையான முன்னெச்சரிக்கை நடவடிக்கைகளும், விடுமுறை அறிவிப்புகளும் வெளியிடப்பட்ட நிலையில், மயிலாடுதுறை மாவட்ட நிர்வாகம் மட்டும் உரிய நேரத்தில் முடிவெடுக்கத் தவறியது ஏன் என்று பொதுமக்கள் கேள்வி எழுப்புகின்றனர்.

இனிவரும் காலங்களிலாவது மாவட்ட ஆட்சியர் இது போன்ற அவசர மற்றும் மழைக்கால சூழல்களில் குழந்தைகளின் எதிர்காலம் மற்றும் பாதுகாப்பைக் கருத்தில் கொண்டு, எந்தவிதத் தாமதமும் இன்றி உடனுக்குடன் பள்ளி மற்றும் கல்லூரிகளுக்கு விடுமுறை அளிக்க வேண்டும் என்று கோரிக்கை விடுத்துள்ளனர். இல்லையெனில், மாவட்ட நிர்வாகத்தின் இந்த அலட்சியப்போக்குக்கு எதிராகப் பெற்றோர்களைத் திரட்டி மாபெரும் கண்டனப் போராட்டங்களை முன்னெடுக்கப் போவதாகவும் பொதுமக்களும் சமூக அமைப்பினரும் எச்சரித்துள்ளனர்.