ரூ.36 லட்சம் வழிப்பறி !! ஸ்கெட்ச் போட்ட முன்னாள் பெண் ஊழியர் - சென்னையில் பரபரப்பு
மளிகைக் கடை மேலாளரைத் தாக்கி ரூ. 36 லட்சம் பறித்துச் சென்ற சம்பவத்தில் , அதே கடையில் முன்பு வேலை பார்த்த பெண் உள்பட 5 பேர் அதிரடியாகக் கைது
"ரூ.36 லட்சம் பணம் பறிப்பு"
சென்னை கொளத்தூர் சாஸ்திரி நகர் மெயின் ரோட்டைச் சேர்ந்த கந்தன் ( வயது 52 ), பாரிமுனை வரதமுத்தப்பா தெருவில் உள்ள மொத்த விலை மளிகைக் கடையில் மேலாளராக வேலை செய்து வருகிறார். கடந்த 14-ம் தேதி மதியம் , முந்தைய நாள் வியாபாரமான ரூ.36 லட்சத்தை வங்கியில் செலுத்துவதற்காக , கடை ஊழியர் கணேசனுடன் பணப்பையை எடுத்துக்கொண்டு பாரிமுனை குடோன் தெருவில் நடந்து சென்று கொண்டிருந்தார்.
அப்போது அங்கு பைக்குகளில் வந்த மர்ம நபர்கள், கந்தனை ஹெல்மெட்டால் தாக்கினர். தொடர்ந்து கணேசனைக் கத்தியைக் காட்டி மிரட்டி, அவர் வைத்திருந்த ரூ.36 லட்சம் அடங்கிய பணப்பையை பறித்துக்கொண்டு தப்பிச் சென்றனர்.
"வழிப்பறிக்கு மூளையாக செயல்பட்டவர்கள் கைது"
இந்த தாக்குதலில் ரத்தக் காயமடைந்த கந்தன், ராஜீவ்காந்தி அரசு மருத்துவமனையில் சிகிச்சை பெற்று வருகிறார். இது குறித்து பூக்கடை போலீஸார் வழக்குப்பதிவு செய்து விசாரணை நடத்தினர். கண்காணிப்பு கேமரா காட்சிகளை ஆய்வு செய்து வழிப்பறியில் ஈடுபட்டவர்களை அடையாளம் கண்டனர்.
இதையடுத்து , வழிப்பறியில் ஈடுபட்ட சென்னை வியாசர்பாடியைச் சேர்ந்த பாலாஜி ( வயது 28 ), பிராட்வேயைச் சேர்ந்த சீனிவாசன் ( வயது 29 ), கல்யாணபுரத்தைச் சேர்ந்த விக்னேஷ் ( வயது 30 ), விழுப்புரம் மாவட்டம் விக்கிரவாண்டியைச் சேர்ந்த ஜெகன் ( வயது 19 ), தண்டையார்பேட்டையைச் சேர்ந்த ஷாலினி ( வயது 27 ) ஆகிய 5 பேரை கைது செய்தனர்.
அவர்களிடமிருந்து வழிப்பறி செய்யப்பட்ட பணத்தில் ரூ.1 லட்சம் மீட்கப்பட்டது. மேலும், குற்றச் செயலுக்கு பயன்படுத்தியதாக ஒரு ஆட்டோவும் பறிமுதல் செய்யப்பட்டது. போலீஸ் விசாரணையில், ஷாலினி ஏற்கெனவே சம்பந்தப்பட்ட மளிகைக் கடையில் வேலை செய்து, சில ஆண்டுகளுக்கு முன்பு பணியை விட்டு நின்றவர் என்பது தெரிய வந்தது.
மேலும், இவர் தான் வழிப்பறிக்கு மூளையாக செயல்பட்டுள்ளார் என போலீஸார் தெரிவித்தனர். கைது செய்யப்பட்ட மற்றவர்கள் மீதும் குற்ற வழக்குகள் இருப்பதும் விசாரணையில் தெரிய வந்தது. கைது செய்யப்பட்ட 5 பேரும் சிறையில் அடைக்கப்பட்டனர்.
தலைப்பு செய்திகள்
ட்ரெண்டிங் செய்திகள்
