Air Cooler: கொளுத்தும் கோடை; ஏர் கூலரின் செயல்திறனை ஈஸியா அதிகரிக்கலாம்- சூப்பர் டிப்ஸ்!
ஏசியை விட விலை குறைவு என்பதாலும், மின்சாரச் செலவு குறைவு என்பதாலும் பலரும் ஏர் கூலரையே பயன்படுத்துகின்றனர்.
இந்தக் கோடையில் உங்கள் ஏர் கூலரின் செயல்திறனைப் படிகாரம் எப்படி அதிகரிக்கும் என்று விரிவாகக் காணலாம்.
கொளுத்தும் கோடைக்காலம் முழு வீச்சில் தொடங்கிவிட்ட நிலையில், சுட்டெரிக்கும் வெயிலில் இருந்து தப்பிக்க நடுத்தர மக்களின் தினசரி வாழ்வில் இன்றியமையாத ஒரு கருவியாக ஏர் கூலர்கள மாறிவிட்டன.
ஏர் கூலர் ஏன்?
ஏசியை விட விலை குறைவு என்பதாலும், மின்சாரச் செலவு குறைவு என்பதாலும் பலரும் இதனையே பயன்படுத்துகின்றனர். ஆனால், கோடையின் வெப்பம் உச்சத்தை அடையும்போது, சில நேரங்களில் ஏர் கூலர்களும் குளிர்ந்த காற்றிற்குப் பதிலாக வெப்பமான காற்றையே வெளியேற்றும்.
ஏர் கூலரின் செயல்திறனை அதிகரிப்பது எப்படி?
அத்துடன், கூலரில் உள்ள தண்ணீரைத் தொடர்ந்து மாற்றாமல் விட்டால், அதில் பாசி படிந்து ஒருவித துர்நாற்றமும் வீசத் தொடங்கும். இந்தப் பிரச்சனைகளை மிக எளிதாகச் சமாளித்து, உங்கள் ஏர் கூலரின் செயல்திறனை அதிகரிக்க ஒரு எளிய பொருள் உதவுகிறது. அதுதான் வீடுகளில் பயன்படுத்தப்படும் படிகாரம் (Alum / Phitkari).
ஏர் கூலரின் தண்ணீர் தொட்டியில் சிறிய அளவு படிகாரத்தைச் சேர்ப்பதால் பல நன்மைகள் கிடைக்கின்றன. பொதுவாக, கூலரில் உள்ள தண்ணீரில் தூசுகள் மற்றும் அழுக்குகள் கலந்து பாக்டீரியா மற்றும் பாசிகள் உருவாகின்றன. இதனால் கூலரின் பக்கவாட்டில் உள்ள கூலிங் பேடுகளில் அடைப்பு ஏற்பட்டு, காற்றோட்டம் கடுமையாகப் பாதிக்கப்படும்.
நீர் சுத்திகரிப்பான்
படிகாரம் இயற்கையாகவே ஒரு சிறந்த நீர் சுத்திகரிப்பானாகச் செயல்படக்கூடியது. கூலர் தொட்டியில் உள்ள தண்ணீரில் இதனைப் போடும்போது, அது நீரில் மிதக்கும் கண்ணுக்குத் தெரியாத அழுக்குகளைப் பிரித்து தொட்டியின் அடியில் தங்கச் செய்கிறது. மேலும், கிருமிகள் மற்றும் பாசிகள் உருவாவதைத் தடுத்து, தண்ணீர் நீண்ட நேரம் தூய்மையாக இருக்க உதவுகிறது. இதன் மூலம் குளிர்ந்த காற்று வரும்போது அறையில் வீசும் துர்நாற்றம் முற்றிலும் தவிர்க்கப்படுகிறது.
தண்ணீர் சுத்தமாக இருக்கும்போதும், கூலிங் பேடுகளில் அடைப்புகள் இல்லாதபோதும், நீர் ஆவியாகும் செயல்முறை மிகச் சிறப்பாகவும் தடையின்றியும் நடைபெறுகிறது. இதன் நேரடி விளைவாக, உங்கள் ஏர் கூலர் முன்பை விட அதிகக் குளிர்ந்த, தூய்மையான மற்றும் புத்துணர்ச்சியான காற்றை வெளியேற்றும்.
பயன்படுத்துவது எப்படி?
இதனைப் பயன்படுத்துவதும் மிக எளிது. ஒரு சிறிய துண்டு படிகாரத்தை எடுத்து, அப்படியே கூலரின் தண்ணீர் தொட்டியில் போட்டுவிடலாம். அல்லது அதனை லேசாகத் தூளாக்கி, ஒரு பருத்தித் துணியில் முடிச்சாகக் கட்டி தண்ணீரில் போட்டு வைக்கலாம். இந்த எளிய மற்றும் மலிவான முறையைப் பின்பற்றுவதன் மூலம், அடிக்கடி கூலரைச் சுத்தம் செய்யும் சிரமம் குறைவதோடு, கொளுத்தும் கோடையிலும் ஏசி போன்ற குளிர்ந்த காற்றை நீங்கள் இனிமையாக அனுபவிக்க முடியும்.
தலைப்பு செய்திகள்
ட்ரெண்டிங் செய்திகள்
