குழந்தைகளையும் பாதிக்கும் கல்லீரல் கொழுப்பு.. குறைக்க முயற்சிக்க எளிய வழிகள்!

வாரத்திற்கு குறைந்தபட்சம் 150 நிமிடங்கள் நடைப்பயிற்சி, மிதிவண்டி ஓட்டுதல், நீச்சல் மற்றும் வலிமைப் பயிற்சி ஆகியவற்றின் கலவை கல்லீரல் கொழுப்பை குறைக்கும் என சொல்லப்பட்டுள்ளது.

கல்லீரல் கொழுப்பு

Source : ABP

கல்லீரல் கொழுப்பு என்பது இன்றைய காலக்கட்டத்தில் குழந்தைகள் முதல் முதியவர்கள் வரை பலரையும் பாதிக்கும் பிரச்னையாக மாறி வருகிறது. இதனை தடுக்க என்னென்ன முயற்சிகள் மேற்கொள்ளலாம் என்பதைக் காணலாம். 

Lancet Journalல் வெளியான தகவலின்படி, “உலகளவில் சுமார் 130 கோடி மக்கள் கொழுப்பு கல்லீரல் நோயால் பாதிக்கப்பட்டுள்ளனர். இந்த நோய் யாருக்கு உருவாகும் என்பதை கணிக்க முடியாது. 

கல்லீரல் கொழுப்பு நோய் 

கல்லீரல் செல்களில் அதிகப்படியான கொழுப்பு சேரும்போது கொழுப்பு கல்லீரல் நோய் ஏற்படுகிறது. உடல் பருமன், இன்சுலின் எதிர்ப்பு, வகை 2 நீரிழிவு நோய் , அதிக டிரைகிளிசரைடுகள் உள்ளிட்ட கொழுப்பு கல்லீரல் நோய்க்கான பொதுவான காரணங்களாக பார்க்கப்படுகிறது. கொழுப்பு கல்லீரலால் ஏற்படும் பாதிப்புகளைச் சரிசெய்ய மருத்துவ ரீதியாக நிரூபிக்கப்பட்ட பல்வேறு வழிகள் உள்ளன. 

என்னென்ன செய்ய வேண்டும்?

ஆலிவ் எண்ணெய், கொட்டைகள், மீன், நார்ச்சத்து மற்றும் பாலிஃபீனால் நிறைந்த உணவுகள் போன்ற பொதுவான பொருட்கள், கல்லீரலைச் சரிசெய்து, அதன் செயல்பாட்டை மேம்படுத்த உதவுகின்றன. இத்தகைய உணவுகளில் இரத்தத்தில் உள்ள குளுக்கோஸ் வளர்சிதை மாற்றத்தை மேம்படுத்த உதவும் பண்புகள் அடங்கியுள்ளன. தங்கள் உடல் கொழுப்பைக் குறைக்க விரும்புவோர், ஆரோக்கியமான கொழுப்புகள், புரதம், அத்தியாவசிய ஊட்டச்சத்துக்கள் மற்றும் தாதுக்கள் ஆகியவற்றின் சமநிலையைக் கொண்ட உணவை உட்கொள்ள வேண்டும்.

மிதமான அளவில் காபி அருந்துவது கொழுப்பு கல்லீரல் நோய் அபாயத்தைக் குறைக்கும்.  இதனை தொடர்ந்து பின்பற்றினால் கல்லீரலில் அதிகப்படியான கொழுப்பு உள்ளவர்களுக்கு 35% வரை அபாயத்தைக் குறைக்க முடியும். 

வாரத்திற்கு குறைந்தபட்சம் 150 நிமிடங்கள் நடைப்பயிற்சி, மிதிவண்டி ஓட்டுதல், நீச்சல் மற்றும் வலிமைப் பயிற்சி ஆகியவற்றின் கலவை கல்லீரல் கொழுப்பை குறைக்கும். தங்கள் கல்லீரல் கொழுப்பைக் குறைக்க விரும்புவோர் அதிகபட்ச ஆரோக்கிய நன்மைகளைப் பெறுவதற்குத் தங்களின் தினசரி உடற்பயிற்சி இலக்குகளில் கவனம் செலுத்த வேண்டும். அதிகப்படியான சர்க்கரைகள் மற்றும் சோடியம், கொழுப்பு எண்ணெய்கள், நிறைவுற்ற கொழுப்புகள் போன்ற ஆரோக்கியமற்ற பொருட்கள், நீண்ட காலப்போக்கில் கல்லீரல் செல்களை மாற்றுகின்றன.

உடல் எடை குறைப்பும் கொழுப்பு நிறைந்த கல்லீரலும் ஒன்றுக்கொன்று தொடர்புடையவை, ஏனெனில் 5-10% எடை குறைப்பு கூட கல்லீரல் கொழுப்பின் அளவை மேம்படுத்தக்கூடும்.