India Corona Spike: இந்தியாவில் கொரோனா பாதிப்பு எண்ணிக்கை 35,000 -ஐ கடந்தது.. மாநிலங்களில் கட்டுப்பாடுகள் தீவிரம்..

இந்தியாவில் கொரோனா தொற்று பாதிக்கப்பட்டவர்களின் எண்ணிக்கை 35,199 ஆக உயர்ந்துள்ளது என மத்திய சுகாதார துறை தரப்பில் தெரிவிக்கப்பட்டுள்ளது.

கோப்பு புகைப்படம்

இந்தியாவில் கொரோனா தொற்று பாதிக்கப்பட்டவர்களின் எண்ணிக்கை 35,199 ஆக உயர்ந்துள்ளது என மத்திய சுகாதார துறை தரப்பில் தெரிவிக்கப்பட்டுள்ளது. 

கடந்த 2020ஆம் ஆண்டு கொரோனா தொற்று பரவத் தொடங்கியது. சீனாவில் பரவத் தொடங்கிய கொரோனாவால் உலகம் முழுவதும் கோடிக்கணக்கில் உயிரிழப்புகள் ஏற்பட்டன. சுகாதார ரீதியாக மட்டும் இன்றி பொருளாதார ரீதியாகவும் பெரும் தாக்கங்களை ஏற்படுத்தியது. தடுப்பூசிகள் பயன்பாடு மற்றும் விஞ்ஞான உலகின் தொடர் முயற்சிகள் காரணமாக பெருந்தொற்று ஒரு வழியாகக் கட்டுக்குள் கொண்டு வரப்பட்டது.

கடந்த சில மாதங்களாக கொரோனா பரவல் குறைந்து வந்த நிலையில் தற்போது அது மீண்டும் அதிகரிக்கத் தொடங்கியுள்ளது. கடந்த 6 மாதங்களில் அதிகபட்ச பாதிப்பு ஏப்ரல் 8ஆம் தேதி பதிவானது. சனிக்கிழமையன்று தினசரி தொற்று பாதிப்பு 6 ஆயிரத்தை கடந்தது. நேற்றைய நிலவரப்படி தினசரி தொற்று பாதிப்பு 5,357 ஆக இருந்தது. ஏப்ரல் 8ஆம் தேதியை ஒப்பிடும்போது இது சற்று குறைவாகும். கடந்த 24 மணி நேரத்தில் 5,880 பேருக்கு புதிதாக கொரோனா  தொற்று உறுதி செய்யப்பட்டுள்ளது. இதனால் மொத்த தொற்று பாதிப்பு 35,199 ஆக உயர்ந்துள்ளது. நேற்று 85,076 பேருக்கு ஆர்டிபிசிஆர் பரிசோதனை மேற்கொள்ளப்பட்டுள்ளது.

தொற்று பாதிப்பு ஏற்பட்டு சிகிச்சை முடிந்து வீடு திரும்புவர்களில் சதவீதம் 98.73 சதவீதமாக உள்ளது. தினசரி தொற்று பாதிப்பு சதவீதம் 3.39 சதவீதமாக உயர்ந்துள்ளது. வாராந்திர தொற்று பாதிப்பும் 3.54 சதவீதமாக உயர்ந்துள்ளது. இறப்பு விகிதம் 1.19 சதவீதமாக உள்ளது என மத்திய சுகாதார துறை தரப்பில் தெரிவிக்கப்பட்டுள்ளது. இந்தியாவில் அதிகபட்சமாக கேரளாவில் 12,433 பேருக்கு கொரோனா தொற்று பாதிப்பு ஏற்பட்டுள்ளது.  மகாராஷ்டிராவில் 4587 பேரும், டெல்லியில் 2460 பேரும், குஜராத்தில் 2013 பேரும், தமிழ்நாட்டில் 1900 பேரும் தொற்றால் பாதிக்கப்பட்டுள்ளனர்.

கடந்த மாதம் இன்ஃப்ளூயன்சா காய்ச்சல் பரவி வந்த நிலையில் தற்போது கொரோனா பரவல் அதிகரித்து வருகிறது. பருவக்கால காய்ச்சலும் பரவுகிறது. இதனை கட்டுப்படுத்த பல மாநிலங்களில் முகக்கவசம் கட்டாயம் அணிய வேண்டும் என தெரிவிக்கப்பட்டுள்ளது. இந்த வாரம், மத்திய சுகாதாரத்துறை அமைச்சர் மன்சுக் மாண்டவியா தலைமையில் கொரோனா ஆய்வு கூட்டம் நடத்தப்பட்டது. அதில், சுகாதார உள்கட்டமைப்புகளை வலுப்படுத்தும்படி மாநில அரசுகளுக்கு அறிவுறுத்தல் வழங்கப்பட்டது. 

ஹரியானா, புதுச்சேரி உள்ளிட்ட இடங்களில் கட்டாயம் முகக்கவசம் அணிய வேண்டும் என அறிவிக்கப்பட்டுள்ளது. அதிக பாதிப்பு இருக்கும் கேரளாவில் கர்ப்பிணி பெண்கள், முதியவர்கள், பிற நோயால் பாதிக்கப்பட்டவர்கள் முகக்கவசத்தை கட்டாயமாக அணிய வேண்டும் என உத்தரவு பிறப்பிக்கப்பட்டுள்ளது.  தேசிய தலைநகரான டெல்லியில் மருத்துவமனைகள், பாலிகிளினிக்குகள் மற்றும் மருந்தகங்களில் கொரோனா பரிசோதனையை அதிகரிக்குமாறு சுகாதாரத் துறையால் அறிவுறுத்தப்பட்டுள்ளது. தமிழ்நாட்டிலும் மக்கள் அதிகம் கூடும் இடங்களில் முகக்கவசம் அணிய அறிவுறுத்தப்பட்டுள்ளது. மேலும் கொரோனா பரவலை தடுக்கும் வகையில் அனைத்து முன்னெச்சரிக்கை நடவடிக்கைகளும் எடுக்கப்பட்டுள்ளது என சுகாதார துறை தரப்பில் தெரிவிக்கப்பட்டுள்ளது.