Vikaravandi by election : விக்கிரவாண்டி இடைத்தேர்தல் - பாமகவின் ஆலோசனை தொடங்கியது

விக்கிரவாண்டி இடைத்தேர்தலுக்கான வேட்பு மனுத்தாக்கல் நாளை தொடங்க உள்ளதால் பாமக சார்பில் வேட்பாளர் இறுதி செய்யப்பட்டு வெளியிட வாய்ப்புள்ளதாக தகவல் வெளியாகியுள்ளது.

பாமக நிர்வாகிகள் ஆலோசனை கூட்டம்

விழுப்புரம்: விக்கிரவாண்டி இடைத்தேர்தலில் பாமக போட்டியிடுவது தொடர்பான மாநில நிர்வாகிகள் ஆலோசனை கூட்டம் தைலாபுரம் பாமக நிறுவனர் ராமதாஸ் இல்லத்தில் நடைபெற்று வருகிறது. 

விழுப்புரம் மாவட்டம், விக்கிரவாண்டி இடைத்தேர்தலுக்கான வாக்குப்பதிவு வருகின்ற ஜூலை 10 ஆம் தேதி நடைபெறுகிறது. இடைத்தேர்தலில் திமுக சார்பில் போட்டியிடும் வேட்பாளர் அறிவிக்கப்பட்டுள்ள நிலையில் பாஜக கூட்டணியிலுள்ள பாமக போட்டியிடுவது குறித்த நிர்வாகிகள் ஆலோசனை கூட்டம் திண்டிவனத்தை அடுத்த தைலாபுரம் பாமக நிறுவனர் ராமதாஸ் இல்லத்தில் பாமக நிறுவனர் ராமதாஸ் தலைமையில் நடைபெற்று வருகிறது.

இக்கூட்டத்தில் பங்கேற்பதற்காக பாமக தலைவர் அன்புமணி ராமதாஸ், கெளரவ தலைவர் ஜி.கே மணி, மாநில நிர்வாகிகளான வடிவேல் ராவணன், தர்மபுரி எம்எல்ஏ வெங்கடேசன், முன்னாள் மத்திய அமைச்சர் ஏகே மூர்த்தி, முன்னாள் சட்டமன்ற உறுப்பினர் திருக்கைச்சூர் ஆறுமுகம், பாமக முன்னாள் பொதுச்செயலாளர் தீரன், மாநில வன்னியர் சங்க தலைவர் பூத அருள்மொழி, பாமக முன்னாள் எம்பி மருத்துவர் செந்தில், பாமக வழக்கறிஞர் பாலு, மாநில பொருளாளர் திலகபாமா உள்ளிட்டோர் கலந்து கொண்டு விக்கிரவாண்டி இடைத்தேர்தலில் வேட்பாளர் நிறுத்துவது தொடர்பான கருத்துக்களை தெரிவித்து வருகின்றனர்.

விக்கிரவாண்டி இடைத்தேர்தலுக்கான வேட்பு மனுத்தாக்கல் நாளை தொடங்க உள்ளதால் பாமக சார்பில் வேட்பாளர் இறுதி செய்யப்பட்டு வெளியிட வாய்ப்புள்ளதாக தகவல் வெளியாகியுள்ளது.