DMDK - DMK: கடைசி நேர ட்விஸ்ட்... திமுக கூட்டணியில் இணைந்த தேமுதிக.. ஷாக்கான இபிஎஸ் தரப்பு!

2026ம் ஆண்டு தமிழக சட்டமன்ற தேர்தல் நடைபெறவுள்ள நிலையில் அனைத்து கட்சிகளும் கூட்டணியை இறுதி செயும் பணிகளில் தீவிரம் காட்டி வருகிறது. இப்படியான நிலையில் தேமுதிக எந்த கூட்டணியில் இணையப்போகிறது என்ற கேள்வி எழுந்தது.

பிரேமலதா விஜயகாந்த், மு.க.ஸ்டாலின்

Source : X

தமிழக சட்டமன்ற தேர்தலில் திடீர் திருப்பமாக திமுக கூட்டணியில் தேமுதிக இணைந்துள்ளது. இதில் அதிமுக தலைமையிலான தேசிய ஜனநாயக கூட்டணிக்கு கடும் அதிர்ச்சியை ஏற்படுத்தியுள்ளது. 

2026ம் ஆண்டு தமிழக சட்டமன்ற தேர்தல் நடைபெறவுள்ள நிலையில் அனைத்து கட்சிகளும் கூட்டணியை இறுதி செயும் பணிகளில் தீவிரம் காட்டி வருகிறது. இப்படியான நிலையில் தேமுதிக எந்த கூட்டணியில் இணையப்போகிறது என்ற கேள்வி எழுந்தது. அக்கட்சியை தங்கள் கூட்டணியில் இணைக்க திமுக மற்றும் அதிமுக இடையே கடுமையான போட்டி நிலவியது.  அதிமுக கூட்டணியில் இருக்கும் பாஜக, அமமுக போன்ற கட்சியைச் சேர்ந்தவர்கள் தேமுதிக பொதுச்செயலாளர் பிரேமலதா விஜயகாந்துடன் பேச்சுவார்த்தை நடத்தினர்.

இந்த நிலையில் தேமுதிக திமுக கூட்டணியில் முதல்முறையாக இணைந்து சட்டமன்ற தேர்தலை எதிர்கொள்கிறது. கடந்த 2016ம் ஆண்டு திமுக கூட்டணியில் தேமுதிகவை இணைக்க அப்போதைய திமுக தலைவர் கருணாநிதி மிகப்பெரிய அளவில் முயற்சி மேற்கொண்டார். ஆனால் தேமுதிக தலைமையிலான மக்கள் நல கூட்டணி அமைந்து வாக்குகள் பிரிய இரண்டாவது முறையாக அதிமுக வெற்றி பெற்று ஆட்சியமைத்தது. இப்படியான நிலையில் 2026ம் ஆண்டு தேர்தல் களம் மிக கடினமாக மாறியுள்ளது.

அதனை எதிர்கொள்ள தேமுதிகவின் பங்கு தேவை என்பதை திமுக மற்றும் அதிமுக கட்சிகள் நன்கு உணர்ந்திருந்தது. அதனால் அக்கட்சியை கூட்டணியில் சேர்க்க இரு தரப்பும் பல முயற்சிகள் மேற்கொள்ளப்பட்டது. இந்த நிலையில் திடீரென பிரேமலதா தலைமையிலான தேமுதிகவினர் இன்று காலை அண்ணா அறிவாலயம் வந்தனர். தொடர்ந்து திமுக கூட்டணியில் தேமுதிக அதிகாரப்பூர்வமாக இணைந்ததாக அறிவிக்கப்பட்டது.  நிர்வாகிகள் விருப்பத்திற்கேற்ப திமுகவுடன் கூட்டணி அமைத்துள்ளதாக பிரேமலதா விஜயகாந்த் தெரிவித்துள்ளார். மேலும் போட்டியிடும் தொகுதிகள் குறித்து தேமுதிக சார்பில் அமைக்கப்படும் குழு பேச்சுவார்த்தையில் ஈடுபடும் எனவும் அவர் கூறியுள்ளார்.

தேமுதிக சட்டமன்ற தேர்தல் வரலாறு

கட்சி தொடங்கி 2006ம் ஆண்டு முதல்முறையாக தமிழக சட்டமன்ற தேர்தலை சந்தித்த தேமுதிக 2 இடங்களை வென்றது. தொடர்ந்து 2011ம் ஆண்டு அதிமுகவுடன் கூட்டணி அமைத்த தேமுதிக 29 இடங்களில் வெற்றி பெற்று எதிர்க்கட்சி அந்தஸ்தைப் பெற்றது. தொடர்ந்து 2016ம் ஆண்டு மக்கள் நல கூட்டணி அமைந்து விடுதலை சிறுத்தைகள் கட்சி, இந்திய கம்யூனிஸ்ட், மார்க்சிஸ்ட் கம்யூனிஸ்ட், மதிமுக ஆகிய கட்சிகளுடன் இணைந்து போட்டியிட்டது. ஆனால் அத்தேர்தலில் படுதோல்வியடைந்தது. தொடர்ந்து 2021 சட்டமன்ற தேர்தலை டிடிவி தினகரனின் அம்மா மக்கள் முன்னேற்றக் கழகத்துடன் இணைந்து தேமுதிக போட்டியிட்டது. ஆனால் அந்த தேர்தலில் ஒரு இடம் கூட அக்கட்சிக்கு கிடைக்கவில்லை என்பது குறிப்பிடத்தக்கது.