Puducherry Election 2026: புதுச்சேரியில் உடைகிறதா கூட்டணி? - 6 தொகுதிகளில் திமுகவை எதிர்க்கும் காங்கிரஸ் வேட்பாளர்கள்!
திமுக போட்டியிடும் தொகுதிகளில் வேட்புமனுத் தாக்கல் செய்துள்ள 6 காங்கிரஸ் அதிருப்தி வேட்பாளர்கள் மீது ஒழுங்கு நடவடிக்கை எடுக்கப்படும்!
புதுச்சேரி: புதுச்சேரி சட்டமன்றத் தேர்தலுக்கான களம் சூடுபிடித்துள்ள நிலையில், காங்கிரஸ் கட்சி போட்டியிடும் 16 தொகுதிகளுக்கான அதிகாரப்பூர்வ வேட்பாளர் பட்டியலை மாநிலத் தலைவர் வைத்திலிங்கம் வெளியிட்டார். அதே வேளையில், கட்சித் தலைமையின் உத்தரவை மீறி மனுவைத் திரும்பப் பெறாத 6 வேட்பாளர்கள் மீது ஒழுங்கு நடவடிக்கை எடுக்கப்படும் என அவர் அறிவித்துள்ளார்.
காங்கிரஸ் கட்சி வேட்பாளர் பட்டியல் வெளியீடு
புதுச்சேரி சட்டமன்றத் தேர்தலுக்கான களம் சூடுபிடித்துள்ள நிலையில், காங்கிரஸ் கட்சி தனது அதிகாரப்பூர்வ 16 வேட்பாளர்களின் பட்டியலை வெளியிட்டுள்ளது. அதே சமயம், கூட்டணிக் கட்சியான திமுக போட்டியிடும் தொகுதிகளில் வேட்புமனுத் தாக்கல் செய்துள்ள 6 காங்கிரஸ் அதிருப்தி வேட்பாளர்கள் மீது ஒழுங்கு நடவடிக்கை எடுக்கப்படும் என மாநிலத் தலைவர் ஏ.வி. வைத்திலிங்கம் அதிரடியாக அறிவித்துள்ளார்.
கூட்டணி தர்மமும் அதிருப்தி வேட்பாளர்களும்
புதுச்சேரியில் காங்கிரஸ், திமுக, விடுதலைச் சிறுத்தைகள் மற்றும் கம்யூனிஸ்ட் கட்சிகள் ஓரணியில் திரண்டு தேர்தலைச் சந்திக்கின்றன. இதில் திமுகவிற்கு ஒதுக்கப்பட்ட 6 தொகுதிகளில், காங்கிரஸ் கட்சியைச் சேர்ந்த பிரமுகர்களும் போட்டி வேட்பாளர்களாக மனுத் தாக்கல் செய்தது கூட்டணியிடையே பெரும் அதிர்ச்சியை ஏற்படுத்தியது.
வேட்புமனுக்களைத் திரும்பப் பெற நேற்று கடைசி நாள் என்ற நிலையில், கட்சியின் தலைமை அறிவுறுத்தியும் முன்னாள் அமைச்சர் ஷாஜகான் உள்ளிட்ட 6 பேர் மனுக்களை வாபஸ் பெறவில்லை. இதனால், 16 தொகுதிகளில் கூட்டணியாகவும், 6 தொகுதிகளில் கூட்டணி இல்லாமலும் காங்கிரஸ் போட்டியிடும் அசாதாரண சூழல் உருவாகியுள்ளது.
தலைவர் வைத்திலிங்கத்தின் கடும் எச்சரிக்கை
இது தொடர்பாக செய்தியாளர்களிடம் பேசிய மாநில காங்கிரஸ் தலைவர் வைத்திலிங்கம் தெரிவித்ததாவது:
"வேட்புமனுக்களைத் திரும்பப் பெற தலைமை அறிவுறுத்தியும் கேட்காத 6 பேர் மீது கட்சி ரீதியான நடவடிக்கை எடுக்கப்படும். அவர்கள் எக்காரணம் கொண்டும் காங்கிரஸ் கட்சியின் பெயரையோ, கொடியையோ அல்லது சின்னத்தையோ பயன்படுத்தக் கூடாது. காங்கிரஸ் தொண்டர்கள் யாரும் அவர்களுக்கு ஆதரவாக வாக்குச் சேகரிக்கச் செல்லக் கூடாது."
மேலும், மங்கலம் தொகுதி வேட்பாளர் ரகுபதி 6 நிமிடம் தாமதமாகச் சென்றதால் தொழில்நுட்ப ரீதியாக மனுவைத் திரும்பப் பெற முடியவில்லை என்றும் அவர் விளக்கம் அளித்தார்.
நாராயணசாமியின் விளக்கம்
முன்னாள் முதல்வர் நாராயணசாமி இந்தப் பட்டியல் வெளியீட்டின் போது உடனிருந்தார். தான் தேர்தலில் போட்டியிடாதது குறித்துப் பேசிய அவர், "கூட்டணி தர்மத்தைக் காக்க வேண்டும் என்பதற்காகவே நெல்லித்தோப்பு தொகுதியில் போட்டியிட விருப்ப மனு அளித்திருந்தும், தலைமையின் முடிவிற்குக்கட்டுப்பட்டு அதனை வாபஸ் பெற்றேன். இதில் எனக்கு எவ்வித வருத்தமும் இல்லை" எனத் தெரிவித்தார்.
காங்கிரஸ் கட்சி போட்டியிடும் 16 தொகுதிகளுக்கான வேட்பாளர் பட்டியல்
1). மன்னாடிபட்டு தொகுதி - முன்னாள் துணை சபாநாயகர் டி.பி.ஆர் செல்வம்
2). உசுடு தொகுதி - பி.கார்த்திகேயன்
3). இந்திரா நகர் தொகுதி - என்.ராஜாகுமார்
4). தட்டாஞ்சாவடி தொகுதி - வி. வைத்திலிங்கம்
5). காமராஜர் நகர் தொகுதி - பி.கே.தேவதாஸ்
6) முத்தியால்பேட்டை தொகுதி - ஈரம் ராஜேந்திரன்
7) அரியாங்குப்பம் தொகுதி - விஜயலட்சுமி ஜெயமூர்த்தி
8) லாஸ்பேட்டை - எம்.வைத்தியநாதன்
9) மனவெளி தொகுதி - ஆர்.கே.ஆர்.அனந்தராமன்
10) ஏம்பலம் தொகுதி (தனி) - எம்.கந்தசாமி
11) நெட்டப்பாக்கம் (தனி) - ஜி.அன்பரசன்
12) நெடுங்காடு (தனி) - தினேஷ்குமார்
13) திருநள்ளாறு தொகுதி - ஆர்.கமலக்கண்ணன்
14) காரைக்கால் வடக்கு - ஏ.எம்.ரஞ்சித்
15) மாகே - ரமேஷ் பரம்பத்
16) ஏனாம் - கொள்ளப்பள்ளி சீனிவாச அசோக்
என 16 வேட்பாளர்கள் காங்கிரஸ் கட்சி சார்பில் போட்டியிடுவதாக மாநில தலைவர் வைத்திலிங்கம் தெரிவித்துள்ளார்.
இந்த அறிவிப்பைத் தொடர்ந்து புதுச்சேரி அரசியல் களம் மேலும் சூடுபிடித்துள்ளது. அதிருப்தி வேட்பாளர்களின் செயல்பாடு கூட்டணியின் வெற்றி வாய்ப்பைப் பாதிக்குமா என்பது தேர்தல் முடிவிலேயே தெரியவரும்.
தலைப்பு செய்திகள்
ட்ரெண்டிங் செய்திகள்
