மயிலாடுதுறை: சீர்காழி, பூம்புகார் தொகுதிகளில் முதல் நாள் வேட்புமனு தாக்கல்! யார் யார் தெரியுமா? பரபரப்பு தகவல்!

சீர்காழி, மயிலாடுதுறை மற்றும் பூம்புகார் சட்டமன்றத் தொகுதிகளுக்கான முதல் நாள் வேட்புமனுத் தாக்கலில், நாதக மற்றும் சுயேச்சை வேட்பாளர்கள் உட்பட 8 பேர் மனுத்தாக்கல் செய்துள்ளனர்.

முதலில் வேட்புமனு தாக்கல் செய்த நாதகவினர்

Source : ABP

மயிலாடுதுறை: தமிழக சட்டமன்றத் தேர்தலுக்கான வேட்புமனுத் தாக்கல் நேற்று அதிகாரப்பூர்வமாகத் தொடங்கியது. மயிலாடுதுறை மாவட்டத்தில் உள்ள மயிலாடுதுறை, சீர்காழி (தனி) மற்றும் பூம்புகார் ஆகிய மூன்று சட்டமன்றத் தொகுதிகளிலும் முதல் நாளான நேற்று வேட்பாளர்கள் மிகுந்த ஆர்வத்துடன் தங்களது மனுக்களைத் தாக்கல் செய்தனர். முதல் நாளில் மட்டும் மாவட்டம் முழுவதும் உள்ள மூன்று தொகுதிகளிலும் சேர்த்து மொத்தம் 8 வேட்பாளர்கள் தேர்தல் நடத்தும் அலுவலர்களிடம் மனுக்களை சமர்ப்பித்தனர்.

சீர்காழி (தனி) தொகுதி நிலவரம்

160-வது தொகுதியான சீர்காழி (தனி) சட்டமன்றத் தொகுதியில், முதல் நாளான நேற்று நாம் தமிழர் கட்சி சார்பில் இரண்டு வேட்பாளர்கள் மனுத் தாக்கல் செய்தனர். இத்தொகுதியின் தேர்தல் நடத்தும் அலுவலரிடம், நாம் தமிழர் கட்சியின் முதன்மை வேட்பாளராக ஆர். சுபாஷ் என்பவர் தனது மனுவை வழங்கினார். அவரைத் தொடர்ந்து, அதே கட்சியின் மாற்று வேட்பாளராக (Dummy Candidate) ஆர். சக்திவேல் என்பவர் மனுத் தாக்கல் செய்தார். தனித் தொகுதியான இங்கு முதல் நாளிலேயே அரசியல் கட்சியினர் மனுத் தாக்கல் செய்ததால் தொகுதிப் பகுதியில் தேர்தல் களம் சூடுபிடிக்கத் தொடங்கியுள்ளது.

மயிலாடுதுறை தொகுதி நிலவரம்

161-வது தொகுதியான மயிலாடுதுறை சட்டமன்றத் தொகுதியிலும் நாம் தமிழர் கட்சியினரே முன்னிலை வகித்தனர். மயிலாடுதுறை வட்டாட்சியர் அலுவலகத்தில் அமைக்கப்பட்டிருந்த தேர்தல் நடத்தும் அலுவலர் அலுவலகத்தில், அக்கட்சியின் வேட்பாளர் கே. காசிராமன் தனது ஆதரவாளர்களுடன் வந்து மனுத் தாக்கல் செய்தார். இவருக்கு மாற்று வேட்பாளராக கே. சுப்பிரமணியன் என்பவர் தனது மனுவை அதிகாரிகளிடம் சமர்ப்பித்தார்.

பெரிய கட்சிகளின் வேட்பாளர்கள் இன்னும் மனுத் தாக்கல் செய்யாத நிலையில், நாம் தமிழர் கட்சியினர் முதல் நாளிலேயே மனுத் தாக்கல் செய்து தேர்தல் பணிகளில் தீவிரமாக இறங்கியுள்ளனர்.

பூம்புகார் தொகுதி: சுயேச்சைகள் ஆர்வம்

162-வது தொகுதியான பூம்புகார் சட்டமன்றத் தொகுதியில் அதிகப்படியாக 4 வேட்பாளர்கள் இன்று மனுத் தாக்கல் செய்தனர். இங்கு அரசியல் கட்சிகளை விட சுயேச்சை வேட்பாளர்கள் முதல் நாளில் ஆர்வம் காட்டினர்.

எம். மாயவெங்கடேசன், எம். மாதவன், மற்றும் டி. இன்பராஜ் ஆகிய மூவர் சுயேச்சை வேட்பாளர்களாகத் தனித்தனியே மனுத் தாக்கல் செய்தனர். இவர்களைத் தவிர, நாம் தமிழர் கட்சி சார்பில் கே. இளையநகுலன் என்பவர் தனது வேட்புமனுவை தேர்தல் நடத்தும் அலுவலரிடம் சமர்ப்பித்தார்.

கட்டுப்பாடுகளும் பாதுகாப்பு ஏற்பாடுகளும்

வேட்புமனுத் தாக்கலை முன்னிட்டு மூன்று தொகுதிகளின் தேர்தல் நடத்தும் அலுவலர் அலுவலகங்களிலும் பலத்த போலீஸ் பாதுகாப்பு போடப்பட்டிருந்தது. தேர்தல் ஆணையத்தின் விதிகளின்படி, வேட்புமனுத் தாக்கல் செய்ய வரும் வேட்பாளருடன் குறிப்பிட்ட எண்ணிக்கையிலான நபர்கள் மட்டுமே அலுவலகத்திற்குள் அனுமதிக்கப்பட்டனர்.

வட்டாட்சியர் அலுவலகங்களைச் சுற்றி 100 மீட்டர் தொலைவிற்குத் தடுப்புகள் அமைக்கப்பட்டு தீவிர கண்காணிப்பு மேற்கொள்ளப்பட்டது. மேலும், வேட்புமனுத் தாக்கல் செய்யும் நிகழ்வுகள் அனைத்தும் வீடியோ பதிவு செய்யப்பட்டன.

எதிர்பார்ப்பில் அரசியல் களம்

மாவட்டத்தில் உள்ள பிரதான கட்சிகளான திமுக மற்றும் அதிமுக கூட்டணிகளின் வேட்பாளர்கள், வரும் நாட்களில் நல்ல நேரம் பார்த்து மனுத் தாக்கல் செய்யத் திட்டமிட்டுள்ளதாகத் தெரிகிறது. முதல் நாளில் நாம் தமிழர் கட்சி அனைத்துத் தொகுதிகளிலும் களமிறங்கியிருப்பது அக்கட்சியினரிடையே உற்சாகத்தை ஏற்படுத்தியுள்ளது.

வரும் ஏப்ரல் 7-ம் தேதி வரை வேட்புமனுத் தாக்கல் தொடர உள்ள நிலையில், அடுத்தடுத்த நாட்களில் முக்கிய அரசியல் பிரமுகர்கள் மனுத் தாக்கல் செய்ய வருவார்கள் என்பதால் மயிலாடுதுறை மாவட்டத் தேர்தல் களம் மேலும் விறுவிறுப்படையும் என எதிர்பார்க்கப்படுகிறது. இன்றைய தினம் மகாவீரர் ஜெயந்தி அரசு விடுமுறை என்பதால் வேட்புமனு தாக்கல் நடைபெற வில்லை என்பது குறிப்பிடத்தக்கது.