Lok Sabha Election 2024: அதிமுக 2ஆம் கட்ட வேட்பாளர் பட்டியல் வெளியீடு - யாருக்கெல்லாம் இடம்?
நேற்று அதிமுகவில் 16 தொகுதிகளுக்கான முதற்கட்ட வேட்பாளர் பட்டியல் வெளியானது. இன்று இரண்டாம் கட்ட வேட்பாளர் பட்டியல் வெளியாகியுள்ளது.
மக்களவை தேர்தலுக்கான அதிமுக வேட்பாளர்களின் 2ஆம் கட்ட பட்டியலை அக்கட்சியின் பொதுச்செயலாளர் எடப்பாடி பழனிசாமி வெளியிட்டார்.
மக்களவை தேர்தல் களம் சூடுபிடிக்கத் தொடங்கியுள்ளது. வரும் ஏப்ரல் 19 ஆம் தேதி நடைபெறும் முதல்கட்ட வாக்குப்பதிவில் தமிழ்நாடு மற்றும் புதுச்சேரிக்கு தேர்தல் நடைபெறும் என இந்திய தேர்தல் ஆணையம் அறிவித்துள்ளது. இதனை முன்னிட்டு திமுக, அதிமுக, பாஜக, நாம் தமிழர் கட்சி ஆகியவை நேரடியாக களம் காண்கின்றன. இதில் திமுக கூட்டணியில் அக்கட்சி 21 இடங்களில் நேரடியாக போட்டியிடுகிறது. காங்கிரஸ் கட்சிக்கு 10 இடங்களும், சிபிஐ, சிபிஎம், விசிக கட்சிகளுக்கு தலா 2 இடங்களும், மதிமுக, இந்திய யூனியன் முஸ்லீம் லீக், கொங்குநாடு மக்கள் தேசிய கட்சி ஆகியவற்றிற்கு தலா 1 இடங்களும் ஒதுக்கி தொகுதி பங்கீட்டை இறுதி செய்தது.
இதனிடையே பெரிதும் எதிர்பார்க்கப்பட்ட அதிமுகவுக்கு தேமுதிக, புதிய தமிழகம், புரட்சி பாரதம், எஸ்டிபிஐ ஆகிய கட்சிகள் ஆதரவு தெரிவித்தது. இதில் தேமுதிகவுக்கு 5 இடங்களும், எஸ்டிபிஐ மற்றும் புதிய தமிழக கட்சிக்கு 2 இடங்களும் அதிமுக ஒதுக்கீடு செய்துள்ளது. 33 இடங்களில் அதிமுக நேரடியாக போட்டியிடுகிறது. நேற்று 16 இடங்களுக்கு முதற்கட்ட வேட்பாளர் பட்டியலை பொதுச் செயலாளர் எடப்பாடி பழனிசாமி வெளியிட்டார்.
இதனைத் தொடர்ந்து இன்று 17 தொகுதிகளுக்கான இரண்டாம் கட்ட வேட்பாளர் பட்டியல் வெளியிடப்பட்டுள்ளது. இதன்மூலம் திமுக மற்றும் அதிமுக நேரடியாக 18 தொகுதிகளில் மோதுகிறது. எடப்பாடி பழனிசாமி அதிமுக பொதுச்செயலாளராக பதவியேற்றபின் நடக்கும் முதல் தேர்தல் என்பதால் அதிமுகவில் மிகப்பெரிய எதிர்பார்ப்பு நிலவுகிறது. மேலும் மக்களவை தேர்தலில் அதிமுகவில் புதுமுகங்களுக்கும் வாய்ப்பு கொடுக்கப்பட்டுள்ளது.
இதேபோல் கன்னியாகுமரி மாவட்டத்தில் உள்ள விளவங்கோடு தொகுதி சட்டமன்ற இடைத்தேர்தலுக்கான அதிமுக வேட்பாளரும் அறிவிக்கப்பட்டுள்ளார். அதன்படி இந்த தொகுதியில் ராணி போட்டியிடுகிறார்.
இரண்டாம் கட்ட வேட்பாளர் பட்டியல்
| வேட்பாளர் | தொகுதி |
| பிரேம் குமார் | ஸ்ரீபெரும்புதூர் |
| பசுபதி | வேலூர் |
| அருணாச்சலம் | திருப்பூர் |
| லோகேஷ் தமிழ்ச்செல்வன் | நீலகிரி |
| சிங்கை ராமச்சந்திரன் | கோவை |
| சிம்லா முத்துச்சோழன் | நெல்லை |
| கருப்பையா | திருச்சி |
| சந்திரமோகன் | பெரம்பலூர் |
| குமரகுரு | கள்ளக்குறிச்சி |
| அசோகன் | தருமபுரி |
| தமிழ் வேந்தன் | புதுச்சேரி |
| கலியபெருமாள் | திருவண்ணாமலை |
| பாபு | மயிலாடுதுறை |
| சேகர்தாஸ் | சிவகங்கை |
| கார்த்திகேயன் | பொள்ளாச்சி |
| சிவசாமி வேலுமணி | தூத்துக்குடி |
| பசுலியான் நசரேத் | கன்னியாகுமரி |
தலைப்பு செய்திகள்
ட்ரெண்டிங் செய்திகள்
