தவெகவுக்கு செக் வைத்த கம்யூனிஸ்ட்டுகள்! இடைத்தேர்தலில் தனித்து போட்டி ஏன்? - வெளியான பரபரப்பு பின்னணி!
தாராபுரம், மதுராந்தகம் ஆகிய தொகுதி இடைத்தேர்தலில் தவெகவுக்கு ஏன் ஆதரவு இல்லை? ஏன் தனித்து போட்டியிடுகிறது என்பது குறித்து கம்யூனிஸ்ட் கட்சிகள் விளக்கமளித்துள்ளது.
வரவிருக்கும் சட்டமன்ற இடைத்தேர்தலில் இடதுசாரி கட்சிகள் இணைந்து போட்டியிடப் போவதாக இந்திய கம்யூனிஸ்ட் கட்சி அதிகாரப்பூர்வமாக அறிவித்துள்ளது. தாராபுரம் தொகுதியில் சிபிஐ, மதுராந்தகம் தொகுதியில் சிபிஎம் களம் காண்கின்றன.
சென்னை பாலன் இல்லத்தில் கடந்த இரண்டு நாட்களாக நடைபெற்று வந்த இந்திய கம்யூனிஸ்ட் கட்சியின் மாநில நிர்வாகக் குழுக் கூட்டம் நிறைவடைந்தது மாநிலச் செயலாளர் மு. வீரபாண்டியன் தலைமையில் நடைபெற்ற ஆலோசனைக் கூட்டத்திற்குப் பிறகு செய்தியாளர்களைச் சந்தித்த அவர் கட்சியின் முக்கிய முடிவுகளை அறிவித்தார்.
செய்தியாளர்களிடம் பேசிய மு. வீரபாண்டியன்
தற்போதைய அரசியல் சூழலில் எந்தக் கூட்டணியிலும் இணையாமல் தனித்து நிற்கும் கட்சியின் நிலைப்பாடு தொடரும் எனக் குறிப்பிட்டார். மேலும், இந்த இடைத்தேர்தல் மக்கள் மீது திணிக்கப்பட்ட ஒன்று எனக் குற்றம்சாட்டிய அவர் இடதுசாரிகள் இணைந்து இத்தேர்தலைச் சந்திக்க உள்ளதாகத் தெரிவித்தார்.
தொகுதிப் பங்கீட்டின்படி தாராபுரம் தொகுதியில் இந்திய கம்யூனிஸ்ட் கட்சியும் மதுராந்தகம் தொகுதியில் மார்க்சிஸ்ட் கம்யூனிஸ்ட் கட்சியும் போட்டியிடுகின்றன. தாராபுரம் தொகுதிக்கான வேட்பாளர் வரும் செப்டம்பர் 15-ஆம் தேதி நடைபெறும் அறிமுகக் கூட்டத்தில் இடதுசாரி கட்சிகள் இணைந்து அறிவிக்கப்படுவார் என்றும் அவர் கூறினார்.
அரசுக்கு வெளியில் இருந்து அளித்து வரும் ஆதரவு தொடரும் எனக் குறிப்பிட்ட அவர் அரசின் தவறுகளையும் குறைபாடுகளையும் மக்களிடம் வெளிப்படுத்தும் வகையில் தேர்தல் பிரச்சாரம் அமையும் என்றும் சுட்டிக்காட்டினார். இடதுசாரிகள் இணைந்து போட்டியிடும் இந்த அறிவிப்பு, தாராபுரம் மற்றும் மதுராந்தகம் தொகுதி இடைத்தேர்தல் களத்தில் புதிய அரசியல் விறுவிறுப்பை ஏற்படுத்தியுள்ளது.
ஏன் தவெகவிற்கு ஆதரவு இல்லை?
அதிமுக சார்பில் வெற்றி பெற்றுவிட்டு எம்எல்ஏ பதவியை ராஜினாமா செய்வது ஆரோக்கியமற்ற அரசியல் என்றும் அதிமுக எம்எல்ஏக்கள் பதவியை ராஜினாமா செய்துவிட்டு ஆளுங்கட்சியில் இணைவது எந்த விதத்தில் நியாயம்? எனக் கேள்வி எழுப்பிய சிபிஎம் மாநில செயலாளர் சண்முக , இடைத்தேர்தல் என்பது திணிக்கப்பட்ட தேர்தல்; இதில் தனித்து போட்டியிடுவது கம்யூனிஸ்ட் கட்சிகளின் முடிவு என்று கூறினார். மேலும், இடைத்தேர்தலில் தனித்து போட்டியிட்டாலும் தவெக ஆட்சிக்கான ஆதரவு தொடரும் என்றும் அதேபோல, தவெகவுக்கு ஆதரவளிக்காமல் இடதுசாரிகள் போட்டியிடுவது திமுகவுக்கு ஆதரவான நிலைப்பாடல்ல என்றும் கூறினார்.
தலைப்பு செய்திகள்
ட்ரெண்டிங் செய்திகள்
