RTE Admission: தனியார் பள்ளிகளில் இலவச மாணவர் சேர்க்கை; எப்போது ஆர்டிஇ குலுக்கல்; கலந்துகொள்வது எப்படி?
RTE Admission 2026-27: ஆர்டிஇ சேர்க்கைக்கு விண்ணப்பித்த பெற்றோர்கள் 22.05.2026 அன்று நடைபெற உள்ள குலுக்கலில் இணைய வழியில் பதிவேற்றம் விண்ணப்பத்துடன் கலந்துகொள்ள வேண்டும்- சென்னை ஆட்சியர்.
இலவச மற்றும் கட்டாயக் கல்வி உரிமை விதிகள் 2011-ன்படி 25% இட ஒதுக்கீட்டின் கீழ் 2026-2027 ஆம் கல்வி ஆண்டிற்கு 22.05.2026 அன்று குலுக்கல் நடைபெறவுள்ளது, என சென்னை மாவட்டஆட்சித் தலைவர் கீதா தெரிவித்துள்ளார்.
அது என்ன இலவச, கட்டாயக் கல்வி உரிமைச் சட்டம்?
ஆர்டிஇ எனப்படும் இலவச மற்றும் கட்டாயக் கல்வி உரிமைச் சட்டத்தின்படி, நாடு முழுவதும் அனைத்து தனியார் சுயநிதிப் பள்ளிகளில், வாய்ப்பு மறுக்கப்பட்ட மற்றும் நலிவடைந்த பிரிவினரின் குழந்தைகளுக்கு நுழைவு நிலை வகுப்பில் (LKG / I Std) குறைந்த பட்சம் 25% இட ஒதுக்கீடு வழங்கப்பட வேண்டும். இதற்கு குழந்தையின் இருப்பிடம் 1 கிலோ மீட்டர் சுற்றளவுக்குள் இருக்க வேண்டும். எனினும் இது சிறுபான்மை பள்ளிகளுக்குப் பொருந்தாது.
2013-14 ஆம் கல்வியாண்டு முதல் இந்த நடைமுறை பின்பற்றப்பட்டு வருகிறது. இந்த மாணவர் சேர்க்கை நடைமுறை, ஒவ்வொரு ஆண்டும் ஏப்ரல் 2 ஆம் தேதி தொடங்கி மே 29-க்குள் முடிக்கப்பட வேண்டும் என தெரிவிக்கப்பட்டுள்ளது.
சென்னை ஆட்சியர் அழைப்பு
இந்த நிலையில் மே 22ஆம் தேதி குலுக்கல் நடைபெறுவதாக சென்னை ஆட்சியர் தெரிவித்துள்ளார். இதுகுறித்து மேலும் அவர் தெரிவித்துள்ளதாவது:
குழந்தைகளுக்கான இலவச மற்றும் கட்டாயக் கல்வி உரிமைச் சட்டம் 2009 மற்றும் தமிழ்நாடு குழந்தைகளுக்கான இலவச மற்றும் கட்டாயக் கல்வி உரிமை விதிகள் 2011-ன்படி வாய்ப்பு மறுக்கப்பட்ட மற்றும் நலிவடைந்த பிரிவினர் குழந்தைகளுக்கு 25% இட ஒதுக்கீட்டின் கீழ் 2026-2027 ஆம் கல்வி ஆண்டில் சென்னை மாவட்டத்தில் செயல்பட்டு வரும் 609 சிறுபான்மையற்ற தனியார் சுயநிதி பள்ளிகளில் சேர்க்கை மேற்கொள்ள 20.04.2026 முதல் 18.05.2026 வரை இணைய வழியில் விண்ணப்பங்கள் பெறப்பட்டது.
அவ்வாறு பெறப்பட்ட 7004 விண்ணப்பங்களாக விண்ணப்பங்களில் 5386 தகுதியான கண்டறியப்பட்டுள்ளது. பள்ளிகளின் Intake Capacity விட அதிகமாக இணைய வழியில் விண்ணப்பங்கள் பதிவேற்றம் செய்யப்பட்டு உள்ளன.
மே 22ஆம் தேதி குலுக்கல்
அந்த எண்ணிக்கையின் அடிப்படையில் 609 பள்ளிகளில் 22.05.2026 அன்று காலை 10.00 மணிக்கு குலுக்கல் முறையில் மாணவர்கள் தேர்ந்தெடுக்கும் நிகழ்வு நடைபெற உள்ளது.
கலந்துகொள்வது எப்படி?
ஆர்டிஇ சேர்க்கைக்கு விண்ணப்பித்த பெற்றோர்கள் 22.05.2026 அன்று நடைபெற உள்ள குலுக்கலில் இணைய வழியில் பதிவேற்றம் விண்ணப்பத்துடன் கலந்துகொள்ள வேண்டும். தேவையான சான்றிதழ்களுடன் சார்ந்த பள்ளிகளில் நேரில் கலந்து கொள்ள வேண்டும் என்று சென்னை மாவட்ட ஆட்சியர் தெரிவித்துள்ளார்.
இதேபோல பிற மாவட்டங்களிலும் மாணவர் சேர்க்கைக்கான குலுக்கல் நடைபெற உள்ளது.
தலைப்பு செய்திகள்
ட்ரெண்டிங் செய்திகள்
