தமிழ்நாடு கல்விக்கொள்கை: அமைச்சர் அன்பில் மகேஷ் பேச்சு! மாணவர்களின் எதிர்காலம் குறித்த முக்கிய அறிவிப்பு
மத்திய அரசு ஒரு புதிய தேசிய கல்விக் கொள்கையை அறிமுகப்படுத்தும்போது, அதை நாங்கள் கண்மூடித்தனமாக நிராகரிக்க மாட்டோம். அதில் நல்ல கூறுகள் இருந்தால், அது மாணவர்களுக்கு பயனளிக்கும் என்றால், அதை ஏற்றுக்கொள்ள நாங்கள் தயாராக இருக்கிறோம்.
“கல்வித்துறையில் நாம் சவால்களை எதிர்கொள்வதால்தான், இந்தியாவிலேயே தமிழ்நாடு மட்டுமே அதன் சொந்த மாநில கல்விக் கொள்கையை செயல்படுத்துகிறது” என்று தமிழக பள்ளிக்கல்வித்துறை அமைச்சர் அன்பில் மகேஷ் கூறியுள்ளார்.
ABP Southern Rising Summit 2025: ஏபிபி குழுமம் நடத்திய ஏபிபி சதர்ன் ரைசிங் மீட்டிங் இன்று சென்னையில் நடந்தது. இதில் பங்கேற்று பள்ளிக்கல்வித்துறை அமைச்சர் பேசினார்.
தமிழ்நாடு பள்ளிக் கல்வி அமைச்சர் அன்பில் மகேஷ், பள்ளிக் கல்வியில் மொழியின் பங்கு மற்றும் கல்வி சீர்திருத்தத்திற்கான மாநிலத்தின் தனித்துவமான அணுகுமுறை குறித்து பேசினார். அரசாங்கம் கல்வி ரீதியாகத் தேவையானவற்றில் கவனம் செலுத்தும் அதே வேளையில், மாணவர்கள் தங்கள் படிப்பு மொழியைத் தேர்வுசெய்ய சுதந்திரமாக இருக்க வேண்டும் என்று கூறினார்.
மேலும், “மொழி என்பது அறிவுத்திறனை அளவிடும் அளவுகோல் அல்ல. எங்கள் மாணவர்கள் என்ன வேண்டுமானாலும் படிக்கலாம்; நாங்கள் ஒருபோதும் கட்டுப்பாடுகளை விதிப்பதில்லை. ஆனால் கல்வியைப் பொறுத்தவரை, தேவையானது போதுமானது என்று நாங்கள் நம்புகிறோம். நாங்கள் எந்த மொழியையும் எதிர்க்கவில்லை. அனைத்து மொழிகளையும் நாங்கள் வரவேற்கிறோம். ஒவ்வொரு மொழிக்கும் அதன் சொந்த பெருமை உண்டு. ஆனால் அது திணிக்கப்படும்போது மட்டுமே நாங்கள் அதை எதிர்க்கிறோம்” என்றார்.
தொடர்ந்து பேசிய அமைச்சர், “கல்வித்துறையில் நாம் சவால்களை எதிர்கொள்வதால்தான், இந்தியாவிலேயே தமிழ்நாடு மட்டுமே அதன் சொந்த மாநில கல்விக் கொள்கையை செயல்படுத்துகிறது. மத்திய அரசு ஒரு புதிய தேசிய கல்விக் கொள்கையை அறிமுகப்படுத்தும்போது, அதை நாங்கள் கண்மூடித்தனமாக நிராகரிக்க மாட்டோம். அதில் நல்ல கூறுகள் இருந்தால், அது மாணவர்களுக்கு பயனளிக்கும் என்றால், அதை ஏற்றுக்கொள்ள நாங்கள் தயாராக இருக்கிறோம். ஆனால் அதில் உள்ள சில அம்சங்கள் பிற்போக்குத்தனமானவை. எல்லாவற்றையும் கவனமாக பகுப்பாய்வு செய்ய விரும்புகிறோம். அதனால்தான் எதிர்கால கல்வி கட்டமைப்பை சீர்திருத்துவது தொடர்பான ஆலோசனைக் கூட்டத்தை நடத்தினோம். இஸ்ரோ தலைவர் நாராயணன் முதல் கிரிக்கெட் வீரர் ரவிச்சந்திரன் அஸ்வின் வரை பலர் பங்கேற்று தங்கள் கருத்துக்களைப் பகிர்ந்து கொண்டனர்.
நாங்கள் ஏற்கனவே 'தமிழ்நாடு பள்ளி செயற்கை நுண்ணறிவு, ரோபாட்டிக்ஸ் மற்றும் ஆன்லைன் அறிவுத் திட்டத்தை' தொடங்கியுள்ளோம். மெதுவாகக் கற்கும் மாணவர்களின் திறன்களை மையமாகக் கொண்ட ஒரு திட்டத்தை நாங்கள் படிப்படியாகப் பின்பற்றி வருகிறோம். இதையெல்லாம் நாங்கள் செய்து கொண்டிருக்கும்போது, தயவுசெய்து எங்கள் மாணவர்களின் கால்களில் சங்கிலிகளைக் கட்டி, அவர்கள் முன்னேறுவதைத் தடுக்காதீர்கள். அவர்களுக்காக நாங்கள் இன்னும் நிறைய செய்ய விரும்புகிறோம். அடுத்த பத்து ஆண்டுகளில் இந்த மாணவர்கள் எங்கே நிற்பார்கள் என்பது பற்றி நாங்கள் ஏற்கனவே யோசித்து வருகிறோம், ” என்று அன்பில் மகேஷ் கூறினார்.
தலைப்பு செய்திகள்
ட்ரெண்டிங் செய்திகள்
