நெஞ்சில் திக்.. திக்.. நடுரோட்டில் பெண்ணிடம் 8 சவரன் பறிப்பு: தொழில்நுட்பத்தால் சிக்கிய கொள்ளையர்கள்!
திருவெண்ணெய்நல்லூர் அருகே பெண்ணிடம் 8 சவரன் தாலிச் செயினைப் பறித்துச் சென்ற வழக்கில் போலீசார் 48 மணி நேரத்திற்குள் சிறார் உட்பட மூன்று பேரைக் கைது செய்துள்ளனர்.
விழுப்புரம்: திருவெண்ணெய்நல்லூர் அருகே பெண்ணிடம் 8 சவரன் தாலிச் செயினைப் பறித்துச் சென்ற வழக்கில் போலீசார் 48 மணி நேரத்திற்குள் சிறார் உட்பட மூன்று பேரைக் கைது செய்துள்ளனர்.
8 சவரன் தாலிச் செயின் பறிப்பு
விழுப்புரம் மாவட்டம் திருவெண்ணெய்நல்லூர் அருகே பெண்ணிடம் 8 சவரன் தாலிச் செயினைப் பறித்துச் சென்ற வழக்கில், தனிப்படை போலீசார் தீவிர விசாரணை நடத்தி 48 மணி நேரத்திற்குள் சிறார் உட்பட மூன்று பேரைக் கைது செய்துள்ளனர். அவர்களிடமிருந்து 55 கிராம் தங்க நகை, 3 லட்சம் ரூபாய் ரொக்கம் மற்றும் ஒரு இருசக்கர வாகனம் பறிமுதல் செய்யப்பட்டுள்ளது.
திருவெண்ணெய்நல்லூர் கிராமத்தைச் சேர்ந்த அறிவழகன் என்பவரின் மனைவி கோவிந்தம்மாள் (56). இவர் கடந்த 12.07.2026 அன்று தனது வீட்டின் அருகே நடந்து சென்று கொண்டிருந்தார். அப்போது மோட்டார் சைக்கிளில் வந்த அடையாளம் தெரியாத இருவர், கோவிந்தம்மாள் கழுத்தில் அணிந்திருந்த 8 சவரன் தாலிச் செயினை கண் இமைக்கும் நேரத்தில் பறித்துக் கொண்டு தப்பி ஓடினர். இதுகுறித்து திருவெண்ணெய்நல்லூர் காவல் நிலையத்தில் புகார் அளிக்கப்பட்டது.
தனிப்படை அமைப்பு:
இச்சம்பவம் குறித்து வழக்குப் பதிவு செய்யப்பட்டு, விழுப்புரம் மாவட்ட காவல் கண்காணிப்பாளர் (SP) திரு. S. மதிவாணன் IPS அவர்களின் உத்தரவின் பேரில் குற்றவாளிகளைப் பிடிக்கத் தனிப்படை அமைக்கப்பட்டது. திருவெண்ணெய்நல்லூர் காவல் நிலைய ஆய்வாளர் திரு. சங்கர், உதவி ஆய்வாளர் திரு. மாதவன் மற்றும் காவலர்கள் அடங்கிய தனிப்படையினர் தீவிர தேடுதல் வேட்டையில் இறங்கினர்.
சிசிடிவி மற்றும் தொழில்நுட்ப விசாரணை:
தனிப்படை போலீசார் சம்பவ இடத்தில் இருந்தும், அப்பகுதியைச் சுற்றியுள்ள முக்கிய சாலைகளில் இருந்தும் பல்வேறு சிசிடிவி (CCTV) கேமரா காட்சிகளை ஆய்வு செய்தனர். அதில், செயின் பறிப்பில் ஈடுபட்ட நபர்கள் திருவண்ணாமலை நோக்கித் தப்பிச் சென்றது தெரியவந்தது. இதையடுத்து, தொழில்நுட்பப் பகுப்பாய்வு மற்றும் கண்காணிப்புக் கேமராக்களின் உதவியோடு குற்றவாளிகளின் நடமாட்டத்தைக் கண்காணித்து துப்பு துலக்கினர்.
மின்னல் வேகக் கைது:
போலீசாரின் விசாரணையில், திருவண்ணாமலை மாவட்டம் செல்லாங்குப்பம் கிராமத்தைச் சேர்ந்த பாண்டியன் என்பவரின் மகன் பாலாஜி (27) மற்றும் ஒரு 17 வயது சிறுவன் ஆகிய இருவர் இக்குற்றத்தில் ஈடுபட்டது கண்டுபிடிக்கப்பட்டது. அவர்கள் இருவரையும் பிடித்து விசாரித்தபோது, திருடப்பட்ட தாலிச் செயினை திருவண்ணாமலை மாவட்டம் கீழ்பெண்ணாத்தூர் தாலுகா, ஆவூர் கிராமத்தைச் சேர்ந்த சையது முஸ்பர் என்பவரின் மகன் ஜாகீர் பாட்ஷா (34) என்பவரிடம் விற்றதாக ஒப்புக் கொண்டனர். இதையடுத்து, திருட்டு நகையை வாங்கிய ஜாகீர் பாட்ஷாவையும் போலீசார் உடனடியாகக் கைது செய்தனர்.
பறிமுதல் மற்றும் சிறைவாசம்:
கைது செய்யப்பட்டவர்களிடமிருந்து 55 கிராம் எடையுள்ள தங்க நகை, 3 லட்சம் ரூபாய் ரொக்கப் பணம் மற்றும் செயின் பறிக்கப் பயன்படுத்திய ஒரு இருசக்கர வாகனம் ஆகியவை பறிமுதல் செய்யப்பட்டன. கைது செய்யப்பட்ட மூன்று எதிரிகளும் நீதிமன்றக் காவலுக்கு அனுப்பி வைக்கப்பட்டனர்.
புகார் அளிக்கப்பட்ட 48 மணி நேரத்திற்குள் குற்றவாளிகளைக் கண்டறிந்து, நகையையும் மீட்ட திருவெண்ணெய்நல்லூர் தனிப்படை போலீசாரின் இந்த விரைவான நடவடிக்கையைப் பொதுமக்கள் மற்றும் உயர் அதிகாரிகள் வெகுவாகப் பாராட்டியுள்ளனர்.
தலைப்பு செய்திகள்
ட்ரெண்டிங் செய்திகள்
