Crime: டெலிவரி பாயுடன் தொடர்பு.. தடம் மாறிய தாய்.. கழுத்தை அறுத்துக் கொன்ற மகன்!

உதயஸ்ரீ மற்றும் ராஜசேகர் இருவரும் தங்கள் குடும்பத்தை விட்டு வெளியேறி ஒன்றாக வாழ முடிவு செய்தனர். இந்த விஷயம் தோரபாபுவுக்கு தெரிய வரவும், அவர் தன் தாயுடன் வாக்குவாதம் செய்தார்

கொலை செய்யப்பட்ட உதயஸ்ரீ

Source : ABP

தெலங்கானா மாநிலத்தில் தகாத உறவு காரணமாக தனது தாயை கல்லூரி மாணவன் ஒருவர் கொலை செய்த சம்பவம் பெரும் அதிர்ச்சியை ஏற்படுத்தியுள்ளது. 

இந்த சம்பவம் அம்மாநிலத்தின் ஹனுமக்கொண்டா  மாவட்டம், காசிப்பேட்டையில் நடைபெற்றுள்ளது. அங்குள்ள பாலாஜி நகரில் உதய ஸ்ரீ என்ற 40 வயது கொண்ட பெண் ஒருவர் தனது கணவர், 20 வயதில் மகன், 18 வயதில் மகள் என குடும்பத்துடன் வசித்து வந்தார். இதனிடையே நேற்று முன்தினம் தனது வீட்டில் உதய ஸ்ரீ கொலைச் செய்யப்பட்டு கிடந்தார். அவர் ரத்த வெள்ளத்தில் கிடப்பதைக் கண்ட அக்கம் பக்கத்தினர் உடனடியாக காசிபேட் காவல் நிலையத்துக்கு புகார் அளித்தனர். உடனடியாக சம்பவ இடத்திற்கு வந்த போலீசார் உதய ஸ்ரீ உடலைக் கைப்பற்றி விசாரணை நடத்தினர். மேலும் மருத்துவக் குழு, தடயவியல் நிபுணர்கள் வந்து ஆய்வு செய்ததில் அவர் இரும்புக் கம்பியால் தாக்கப்பட்டதற்கும், கத்தியால் கழுத்து அறுக்கப்பட்டதற்கும் தடயங்கள் இருந்துள்ளது. இதனைத் தொடர்ந்து முதலில் குடும்ப உறுப்பினர்களிடம் விசாரணை நடைபெற்றது. 

இதில் அதிர்ச்சியளிக்கும் வகையில் உதயஸ்ரீ மகன் தோரபாபு தான் அம்மாவை கொலை செய்ததாக போலீசாரிடம் தெரிவிக்க, அனைவரும் அதிர்ச்சியடைந்தனர். இதனைத் தொடர்ந்து அவனிடம் நடைபெற்ற தீவிர விசாரணையில் இந்த கொலைக்கான காரணம் தெரிய வந்தது. அதாவது தன் குடும்பத்தோடு மிகுந்த மகிழ்ச்சியாக வாழ்ந்து வந்த உதயஸ்ரீ கடந்த சில மாதங்களாகவே எப்போதும் செல்போனில் மூழ்கியுள்ளார். அவருக்கு இன்ஸ்டாகிராம் மூலம் ராஜசேகர் என்ற ஆன்லைன் பொருட்களை டெலிவரி செய்யும் நபர் அறிமுகமாகியுள்ளது. ஆரம்பத்தில் சகஜமாக பேச தொடங்கிய அவர்கள் ஒரு கட்டத்தில் திருமணத்தை மீறிய உறவை கொண்டிருந்தனர். 

ராஜசேகருக்கும் திருமணமாகி குழந்தைகள் உள்ளனர். ஆனால் உதயஸ்ரீ மற்றும் ராஜசேகர் இருவரும் தங்கள் குடும்பத்தை விட்டு வெளியேறி ஒன்றாக வாழ முடிவு செய்தனர். இந்த விஷயம் தோரபாபுவுக்கு தெரிய வரவும், அவர் தன் தாயுடன் வாக்குவாதம் செய்தார். நீங்கள் செய்வது தவறு, அந்த உறவை கைவிடுங்கள் என எவ்வளவோ மன்றாடி கேட்டும் மகனின் பேச்சை உதயஸ்ரீ சட்டை செய்யவில்லை. இந்த நிலையில் தன் வாழ்க்கையை  விட தன் கௌரவமே முக்கியம் என்று நினைத்த தோரபாபு பொறுமையை இழந்து, தன் தாயைக் கொடூரமாகக் கொலை செய்தான். இரும்புக் கம்பியால் அடித்து, கத்தியால் கழுத்தில் குத்தினான். பின் கழுத்தை அறுத்த நிலையில் சம்பவ இடத்திலேயே உதயஸ்ரீ உயிரிழந்தார். இதனைத் தொடர்ந்து தோரபாபுவை கைது செய்த போலீசார், தலைமறைவான டெலிவரி நபர் ராஜசேகரை தேடி வருகின்றனர். இந்த சம்பவம் தெலங்கானாவில் பெரும் பரபரப்பை ஏற்படுத்தியுள்ளது.