Gold Silver Rate Mar.1st: 1-ம் தேதியே இப்படியா.! தங்கம் விலை எங்கயோ போயிடுச்சேய்யா.! இன்றும் அதிரடி உயர்வு; எவ்வளவு.?

தங்கம் விலை நேற்றே தாறுமாறாக உயர்ந்த நிலையில், இன்றும் அதிரடியாக சவரனுக்கு 1,800 ரூபாய் உயர்ந்துள்ளது. தங்கம் மற்றும் வெள்ளியின் இன்றைய விலை என்ன என்பதை இப்போது பார்க்கலாம்.

தங்கம், வெள்ளியின் விலை உயர்வு

Source : ai

சென்னையில் ஆபரணத் தங்கத்தின் விலை நேற்றே தாறுமாறாக உயர்ந்த நிலையில், மார்ச் 1-ம் தேதியான இன்று அதிரடியாக சவரனுக்கு 1,800 ரூபாய் விலை உயர்ந்து அதிர்ச்சி கொடுத்துள்ளது. இதேபோல் வெள்ளியின் விலையும் கிலோவிற்கு 5 ஆயிரம் ரூபாய் உயர்ந்துள்ளது. தங்கம் மற்றும் வெள்ளியின் இன்றைய விலை நிலவரம் குறித்து பார்க்கலாம்.

2 நாட்களில் அதிரடியாக விலை உயர்ந்த தங்கம்

தங்கத்தின் விலை இந்த வாரத்தில் தொடக்கத்தில், அதாவது 24-ம் தேதி, கிராம் 14,890 ரூபாய்க்கும், ஒரு சவரன் 1,19,120 ரூபாய்க்கும் விற்பனை செய்யப்பட்டது. 25-ம் தேதி விலை உயர்ந்து, ஒரு கிராம் 14,930 ரூபாயாகவும், ஒரு சவரன் 1,19,440 ரூபாயாகவும் விற்கப்பட்டது.

தொடர்ந்து, 26-ம் தேதி கிராமிற்கு வெறும் 10 ரூபாய் விலை குறைந்து ஒரு கிராம் 14,920 ரூபாய்க்கும், ஒரு சவரன் 1,19,360 ரூபாய்க்கும் விற்பனையானது. பின்னர், 27-ம் தேதியும் சற்று விலை குறைந்து ஒரு கிராம் 14,900 ரூபாய்க்கும், ஒரு சவரன் 1,19,200 ரூபாய்க்கும் விற்பனை செய்யப்பட்டது.

இந்நிலையில், 28-ம் தேதி சனிக்கிழமையான நேற்று அதிரடியாக கிராமிற்கு 650 ரூபாய் விலை உயர்ந்து, ஒரு கிராம் 15 ஆயிரத்தை கடந்து, 15,550 ரூபாய்க்கு விற்கப்பட்டது. அதன்படி, சவரனுக்கு 5,200 ரூபாய் விலை உயர்ந்து, ஒரு சவரன் 1,24,400 ரூபாய்க்கு விற்பனை செய்யப்பட்டது.

இன்றும் அதிரடி காட்டிய தங்கம்

இந்த நிலையில், இன்றும் தங்கத்தின் விலை அதிடியாக சவரனுக்கு 1,800 ரூபாய் உயர்ந்துள்ளது. அதன்படி, ஒரு கிராமிற்கு 225 ரூபாய் விலை உயர்ந்து, கிராம் 15,775 ரூபாய்க்கும், ஒரு சவரன் 1,26,200 ரூபாய்க்கும் விற்பனை செய்யப்படுகிறது.

கிலோவிற்கு ரூ.5,000 உயர்ந்த வெள்ளி

இதேபோல் வெள்ளி விலையும் இன்று கிலோவிற்கு 5 ஆயிரம் ரூபாய் உயர்ந்துள்ளது. கடந்த 24-ம் தேதி வெள்ளியின் விலை கிராம் 290 ரூபாயாக இருந்த நிலையில், 25-ம் தேதி 5 ரூபாய் விலை உயர்ந்து, ஒரு கிராம் 295 ரூபாய்க்கு விற்கப்பட்டது.

26 மற்றும் 27-ம் தேதிகளில் அதே விலையில் நீடித்த நிலையில், 28-ம் தேதியான நேற்று கிராமிற்கு 25 ரூபாய் விலை உயர்ந்து, ஒரு கிராம் 320 ரூபாயாக விற்பனையானது.

இந்நிலையில், இன்று கிராமிற்கு மேலும் 5 ரூபாய் விலை உயர்ந்து, ஒரு கிராம் 325 ரூபாயாகவும், ஒரு கிலோ பார் வெள்ளியின் விலை 3 லட்சத்து 25 ஆயிரம் ரூபாய்க்கும் விற்பனை செய்யப்படுகிறது.

மத்திய கிழக்கில் அமெரிக்க இஸ்ரேல் படைகள் மற்றும் ஈரான் இடையே போர் நடைபெற்று வரும் நிலையில், நேற்றும், இன்றும் தங்கத்தின் விலை அதிரடியாக 7,000 ரூபாய் உயர்ந்துள்ளது. போர் தொடரும் பட்சத்தில் மேலும் விலை உயருமே என்ற அச்சம் எழுந்துள்ளது.