eVitara vs Windsor: இவிதாரா, விண்ட்சர் கார்களை மலிவாக்கும் சூப்பரான பேட்டரி ஆப்ஷன்; வாடகை எவ்வளவு.? எது குறைவு.?

eVitara vs Windsor Battery Rental Price: இவி கார்களில், மாருதி சுசூகி இவிதாரா மற்றும் எம்ஜி விண்ட்சர் கார்களில் மட்டும் தான் பேட்டரி வாடகைக்கு வழங்கப்படுகிறது. இதில் எது மலிவானது என்பதை பார்க்கலாம்.

எம்ஜி விண்ட்சர் Vs இவிதாரா பேட்டரி வாடகை எவ்வளவு.?

Source : Social Media

இந்திய கார் சந்தையில், இவி கார்களில் பிரபலமான கார்களாக இருப்பது, மாருதி சுசூகியின் இவிதாரா மற்றும் எம்ஜி விண்ட்சர் ஆகிய கார்கள். இந்த கார்களில் சிறப்பு என்னவென்றால், பேட்டரியை நீங்கள் வாடகைக்கு எடுக்க முடியும். அதாவது, சேவை அடிப்படையில் பேட்டரியை பெறும் BAAS (Battery as a Service) எனும் திட்டம். இதனால், காரின் விலை மலிவாகிறது. ஆனால், பேட்டரிக்கு தனியாக வாடகை செலுத்த வேண்டும். இந்த இரண்டு கார்களின்  விலை மற்றும் பேட்டரி வாடகைகளில் எது மலிவாக உள்ளது என்பதை இப்போது பார்க்கலாம்.

இவிதாரா மற்றும் விண்ட்சரின் விலை என்ன.?

மாருதி சுசுகி இறுதியாக இந்தியாவில் அதன் முதல் மின்சார காரான இவிதாராவின் தொடக்க விலையை சமீபத்தில் வெளியிட்டுள்ளது. இதன் எக்ஸ் ஷோரூம் விலை BAAS (Battery as a Service) திட்டத்துடன் 10.99 லட்சம் ரூபாயில் தொடங்குகிறது. இவிதாரா தொடக்க டெல்டா வேரியண்டுடன் மூன்று வகைகளில் வருகிறது. அதே நேரத்தில் ஒரு நடுத்தர ஜீட்டா வேரியண்ட் உள்ளது. மூன்றாவதாக டாப் என்ட் ஆல்பா வேரியண்ட் உள்ளது. இதில், டெல்டா வேரியன்ட் தவிர பிற வேரியன்ட்டுகளின் விலை இன்னும் வெளியிடப்படவில்லை. இந்த காருக்கான முன்பதிவிற்கு 21,000 ரூபாய் செலுத்த வேண்டும்.

மறுபுறம், எம்ஜி விண்ட்சர் கார் 9.99 லட்சம் ரூபாயில் தொடங்குகிறது. இந்த காரில், 5 வேரியன்ட்டுகள் உள்ள நிலையில், டாப் என்ட் வேரியன்ட்டான விண்ட்சர் இவி எஸ்ஸன்ஸ் ப்ரோவின் விலை 18.50 லட்சம் ரூபாயாக உள்ளது. இவை எக்ஸ் ஷோரூம் விலைகள்.

பேட்டரிக்கான வாடகை எவ்வளவு.?

பேட்டரியை சேவையாகக் கொண்டு மாருதி சுசூகி இவிதாராவின் தொடக்க விலை 10.99 லட்சம் ரூபாயாக நிர்ணயிக்கப்பட்டுள்ள நிலையில், பேட்டரி வாடகையாக கிலோ மீட்டருக்கு 3.99 ரூபாய் கூடுதல் விலையும் வசூலிக்கப்படுகிறது. இது 49kwh பேட்டரி பேக் கொண்ட டெல்டா டிரிமிற்கானது. 61kwh பேட்டரி பேக்கும் இதில் உள்ள நிலையில், மற்ற வேரியன்ட்டுகளின் விலை விவரங்கள் வெளியாகும்போது, அதில் உள்ள பேட்டரி பேக்கை பொறுத்து விலை நிர்ணயிக்கப்படும் என்று தெரிகிறது.

அதே வேளையில், பேட்டரியை சேவையாகக் கொண்டு எம்ஜி விண்ட்சர் இவியின் தொடக்க விலை 9.99 ரூபாயாக நிர்ணயிக்கப்பட்டுள்ள நிலையில், இந்த காருக்கு பேட்டரி வாடகையாக கிலோ மீட்டருக்கு 3.50 ரூபாய் கூடுதல் விலை வசூலிக்கப்படுகிறது. விண்ட்சரில் 38kwh மற்றும் 52.9kwh என இரண்டு பேட்டரி பேக் ஆப்ஷன்கள் உள்ளன. மேலும், மாதத்திற்கு குறைந்தபட்சம் 1,500 கிமீ ஓட்டத்திற்கு, பேட்டரி வாடகை சுமார் 5,250 ரூபாயாக இருக்கும். இந்த வாடகைத் தொகையுடன், தினசரி சார்ஜிங் கட்டணத்தையும் வாடிக்கையாளர்கள் செலுத்த வேண்டும்.

காரின் ஆரம்ப விலையிலும் சரி, பேட்டரி வாடகை என்று பார்க்கும்போதும் சரி, இவிதாராவை விட, விண்ட்சரின் விலை குறைவாக உள்ளது. இந்நிலையில், விண்ட்சருக்கு இவிதாரா ஈடு கொடுக்குமா என்பதை பொறுத்திருந்துதான் பார்க்க வேண்டும்.