Second Marriage: இரண்டாவது திருமண யோகம் யாருக்கு? பரிகாரம் செய்யாதீர்கள்..! ஜோதிடம் சொல்வது என்ன?
Second marriage - Astrology: ஜாதகத்தில் நீங்கள் பிறக்கும் லக்னத்திற்கு ஏழாம் பாவம்தான் நீங்கள் திருமணம் செய்து கொள்ளும் நபர் என்று எடுத்துக் கொள்ளலாம்.
அன்பார்ந்த abp நாடு வாசகர்களே திருமணத்தைப் பொறுத்தவரை பெற்றோரால் நிச்சயிக்கப்பட்ட திருமணம், காதல் திருமணம் என திருமணத்தில் பல முறைகள் இருந்தாலும் பொதுவாக திருமணம் என்பது இரு மனங்கள் இணைவது என்று தான் கூறுவார்கள்.
நான் அயல் நாட்டில் நடக்கும் திருமணங்களைப் பற்றியோ, அவர்களின் உறவுமுறைகளை பற்றியோ பெரிதாக பேச விரும்பவில்லை. மாறாக நம் இந்திய திருநாட்டில், குறிப்பாக தமிழகத்தில் நடைபெறுகிற திருமணங்களை பற்றியும், உறவு முறைகளை மட்டும் வைத்து இந்த ஜோதிட கருத்துக்களை உங்களிடம் பகிர்ந்து கொள்கிறேன். காலங்கள் மாற, மாற திருமணத்தின் விதிமுறைகளும் மாறுகிறது என்பதை நம்மால் பார்க்க முடிகிறது. ( நவீன கால திருமணம் பற்றி கூற வருகிறேன்) அதைப் பற்றி நான் விரிவாக சொல்ல விரும்பவில்லை.
ஜாதகத்தில் நீங்கள் பிறக்கும் லக்னத்திற்கு ஏழாம் பாவம்தான் நீங்கள் திருமணம் செய்து கொள்ளும் நபர் அல்லது நீங்கள் பார்த்து பழகி அவரோடு ஒன்றாக உண்டு, உறங்கி, வாழுகின்ற ஒரு நபர் என்று எடுத்துக் கொள்ளலாம். ஏழாம் பாவம் கெட்டு விட்டால் நிச்சயமாக அவருக்கு முதல் திருமணம் என்பது நிக்காது, நீடிக்காது.
ஏழாம் பாவம் என்னும் முதல் திருமணம்:
வாசகர்களே ஏற்கனவே சொன்னது போல லக்னத்திற்கு ஏழாம் பாவம், ஏழாம் அதிபதி, ஏழாம் வீட்டில் அமர்ந்த கிரகம். இவை தவிர வேறு எந்த பாவத்தாலும் உங்களின் வாழ்க்கைத் துணையை பற்றி சொல்லவே முடியாது. சிலர் கூறுவது போல மற்ற பாவங்களை வைத்து வாழ்க்கை துணையை கணிக்கலாம் என்றால் அது மிகத் தவறு. உங்கள் வீட்டில் ஜாதகம் புத்தகம் இருக்குமாயின், அதை சோதித்துப் பார்த்தால் ’ல’ என்று போட்டிருக்கும். அந்த இடம்தான் நீங்கள் பிறந்த வீடு அந்த வீட்டிலிருந்து எண்ணி சரியாக 7-வது வீட்டில் உங்கள் மனைவி பற்றி சொல்லும். அவர் எப்படிப்பட்டவர் என்ன செய்கிறார், அவரின் குண நலன்கள் என்ன? அவர் உங்களுக்கு பிடித்தவரா? பிடிக்காதவரா? போன்றவற்றை தெரிந்துகொள்ள முடியும்.
ஏழாம் வீடு என்பது12 பாவங்களில் மிக முக்கியமான பாவமாக பார்க்கப்படுகிறது. காரணம் ஒரு மனிதன் தனியாகவே வாழ்ந்து விட முடியாது, அவருக்கென்று தாய், தந்தையைத் தவிர துணை மிகவும் முக்கியமான ஒன்றாக இருப்பதால் அவர்களின் மூலமாக சந்ததிகள் விருத்தியாவதால் லக்னத்தை எந்த அளவுக்கு பார்க்கிறோமோ, அதே அளவுக்கு ஏழாம் பாவத்தையும் பார்க்க வேண்டும்.
ஏழாம் பாவம் கெட்டிருந்தால்:
உங்களின் ஏழாம் பாவம் கெட்டிருந்தால், நீச்சமாக இருந்தால் அல்லது பகை பெற்று இருந்தால்... மிக கடினமான போராட்டம் உள்ள ஒரு திருமண வாழ்க்கை தான் உங்களுக்கு அமையும். அது முதல் திருமணத்தைப் பற்றி மட்டும் சொல்லும். உதாரணத்திற்கு மீன லக்னம் ஏழாம் அதிபதி ’புதன்’ லக்னத்திலேயே நீச்சமடைந்திருக்கிறார் என்று வைத்துக் கொண்டால் நிச்சயமாக அவரால் நிம்மதியாக வாழ முடியாது. விவாகரத்து ஆகும் என்று நான் கூறவில்லை... ஆனால் நிம்மதியான வாழ்க்கை இருப்பது மிக மிகக் கடினம். ஒருவேளை அந்த வாழ்க்கைத் துணை அவரை விட்டுவிட்டு வேறு மாநிலத்திலோ, வேறு நாட்டிற்கோ சென்றுவிட்டால் விவாகரத்து பெறாமல் வாழலாம். ஆனால் ஒன்றாக வாழும் பொழுது பல சங்கடங்களை ஜாதகர் அனுபவித்து ஆக வேண்டும். ஒருவேளை மீன லக்கினம் ஏழாம் அதிபதி புதன் உச்சம் பெற்று லக்னத்தில் அமரும் போது உடன் சுக்கிரன் உச்சம் பெற்று இருந்தால். நிச்சயமாக ஏதோ ஒரு வகையில் வாழ்க்கையை சமாளித்துக் கொண்டு அப்படியே ஓட்டி விடலாம் ஆனால் ராஜயோகம் கிடைக்காத பட்சத்தில் நிச்சயமாக மனம் முறிவு ஏற்படலாம் சிலருக்கு விவாகரத்து கூட ஆகலாம்.
இதற்கு பரிகாரம் உண்டா என்று கேட்டால் நிச்சயமாக கிடையாது ஒரு மனிதன் அவர் ஜாதகத்தில் இருப்பதை வாழ்நாளில் அனுபவித்து ஆக வேண்டுமே தவிர அதற்கு காரணம் தேடவோ அல்லது பரிகாரம் தேடவோ நிச்சயமாக முடியாது. அப்படி எவ்வளவு பணத்தை செலவு செய்து பரிகாரம் செய்தால் கூட அவை பலிப்பது இல்லை என்பது தான் என்னுடைய அனுபவ கருத்து. முதல் திருமணம் சரியாக அமையவில்லை இரண்டாவது திருமணம் ஆவது எப்படி இருக்கும் என்று கேட்கிறவர்களுக்கு அடுத்ததாக என்னுடைய பதில் உங்கள் ஜாதகத்தில் லக்கினத்தில் இருந்து எண்ணி பதினோராம் வீட்டை பாருங்கள்.
இரண்டாவது திருமணம் என்னும் 11-ம் வீடு:
ஏழாம் பாவம் கெட்டிருந்து ஏழாம் அதிபதியும் வலுவிழந்து இருந்தால் அவருடைய 11 ஆம் பாவத்தை பார்க்க வேண்டும் ஒரு வேலை 11 ஆம் பாவகம் மிக வலிமையாக இருக்கும் பட்சத்தில் அவருக்கு இரண்டாம் திருமணம் சாத்தியப்படும். அந்த வாழ்க்கை அவருக்கு நன்றாக அமைந்து எந்த பிரச்சனையும் இல்லாமல் செல்லும். முதல் திருமணம் வெற்றிகரமாக முடியாதவர்கள் பரிகாரம் செய்து பின்பு திருமணம் செய்வார்கள், அந்த திருமணம் வெற்றிகரமாக அமைந்து விடும் அவர்கள் நினைப்பது பரிகாரம் செய்ததால் தான் 2வது திருமணம் வெற்றி ஆனது என்று ... ஆனால் ஜாதகத்திலேயே இரண்டாம் திருமணத்திற்கான பாவம் 11 மிக வலிமையாக இருந்ததால் அவருக்கு இப்படிப்பட்ட வாழ்க்கை துணை அமைந்தது என்று கூறலாம்.
வம்பு வழக்குகளில் சிக்கும் திருமணம் :
பெற்றோர் பார்த்து திருமணம் செய்து வைத்த சில திருமணங்கள் நீதிமன்றம் வரை சென்று போராடிக் கொண்டிருக்கும். அப்படிப்பட்டவர்களுக்கு நிச்சயமாக எவ்வளவு போராடினாலும் விவாகரத்து ஆகியே தீரும். ஒருவேளை விவாகரத்து, ஆனால் பதினோராம் பாகம் வலிமையாக இருந்தால்... தாராளமாக நீங்கள் வழக்குகளில் போராடாமல்... ஒரு நல்ல ஜோதிடரை அணுகி ஆக வேண்டிய அடுத்த காரியத்தை பார்க்கலாம். இதிலும் சில விதிவிலக்குகள் உண்டு முதல் திருமணத்திலேயே வழக்குகள் வரை போய் அவை நின்று நல்லபடியான முதல் திருமணம் வாழ்க்கை வாழ்ந்தவர்களையும் நான் பார்த்திருக்கிறேன். ஆகையால் சரியான ஜோதிடரை அணுகி உங்கள் ஜாதகத்தின் படி என்ன நடக்கிறது என்பதை தெரிந்து கொண்டு பின்பு செயல்படுத்துங்கள் .
இந்த தகவலானது, ஜோதிடரான “ ஜோதிட ரத்னா சிம்ம ஷ்யாம்” என்பவரின் கருத்தாகும். இதற்கு ஏபிபி நாடுவின் கருத்தில்லை என்பதை தெரிவித்துக் கொள்கிறோம்.
தலைப்பு செய்திகள்
ட்ரெண்டிங் செய்திகள்
