"கொடுத்தா பாரத ரத்னா கொடுங்க எனக்கு என் ரசிகர்கள் போதும்" S ஜானகி வைரல் வீடியோ

இந்தியாவின் பழம்பெரும் பின்னணி பாடகியான எஸ்.ஜானகி நேற்று காலமான நிலையில், 2013-ல் மத்திய அரசு அவருக்கு அறிவித்த பத்ம பூஷன் விருதை அவர் துணிச்சலாக வேண்டாமென்று மறுத்த வீடியோ சமூக வலைத்தளங்களில் தற்போது வைரலாகி வருகிறது.

இந்திய இசையுலகில் கடந்த 70 வருடங்களாக தன் வசீகர குரலால் ரசிகர்களைக் கட்டிப்போட்ட பின்னணி பாடகி எஸ்.ஜானகி வயது மூப்பு காரணமாக நேற்று உயிரிழந்தார்.

மைசூரில் அவரது இல்லத்தில் வைக்கப்பட்டுள்ள அவரின் உடலுக்கு திரைப் பிரபலங்கள், ரசிகர்கள் என ஏராளமானோர் நேரில் அஞ்சலி செலுத்தி வருகின்றனர்.

தமிழ், தெலுங்கு, கன்னடம், மலையாளம், இந்தி, பெங்காலி உட்பட 17 இந்திய மொழிகளிலும், ஜப்பான், ஜெர்மன், அரபு, சிங்களம், ஆங்கிலம் ஆகிய வெளிநாட்டு மொழிகளிலும் இவர் பாடியுள்ளார்.

தனது வாழ்நாளில் மொத்தமாக 48,000-க்கும் மேற்பட்ட பாடல்களை பாடியுள்ள இவர், 4 முறை தேசிய விருதுகளையும், 33 வெவ்வேறு மாநில விருதுகளையும் வென்றுள்ளார்.

இசைத்துறையில் இவரின் பங்களிப்புக்காக இவரை கவுரவிக்கும் வகையில், 2013-ல் மத்திய அரசு இவருக்கு பத்ம பூஷன் விருது அறிவித்தது.

ஆனால், அந்த விருதை அவர் அப்போது ஏற்க மறுத்துவிட்டார். இந்த நிலையில் பத்ம பூஷன் விருதை மறுத்தது குறித்து அவர் பேசிய வீடியோ தற்போது சமூக வலைத்தளங்களில் வைரலாகி வருகிறது.

அந்த வீடியோவில் அவர், "55 வருஷமா சினிமா துறைல பாடிட்டு இருக்கேன். எத்தனையோ மொழிகளில் விதவிதமாகப் பாடியிருக்கேன்.

நேட்டிவிட்டியோடு பாடுறேன்னு எல்லோரும் பாராட்டியிருக்காங்க. உங்களைப்போல மலையாளிகள் கூட உச்சரிக்கல என்று மலையாளிகளே சொல்லியிருக்காங்க.

இந்த அளவுக்கு பாடியிருக்கேன்னா அதுக்கு எத்தனை விருது கொடுக்கணும். பாரத ரத்னா கொடுத்தா வாங்குறேன். இல்லனா வேணாம்.

எனக்கு எந்த விருது மேலயும் ஆர்வம் இல்ல. என்னோட ரசிகர்களுக்காகத் தான் நான் பாடுனேன். அரசுக்கு விருப்பம் இருந்தா எனக்கு பாரத ரத்னா கொடுக்கட்டும். இல்லனா எந்த விருதும் வேணாம்.

என்னோட ரசிகர்கள் மனசுல நான் இருக்கேன். அதைவிட பெரிய விருது எதுவும் இல்ல. இந்த அரசாங்கத்தின் மீது எனக்கு எந்தப் புகாரும் இல்லை.

அரசாங்கம் தவறு செய்ததாக நான் நினைக்கல. ஆனால், இந்த பத்ம பூஷன் விருது வேணாம்" என்று அவர் வெளிப்படையாகக் கூறினார். இந்த வீடியோ தற்போது சமூக வலைத்தளங்களில் வைரலாகி வருகிறது.