Dindigul TVK | ”மா.செ-வை உடனே மாத்துங்க” தவெகவில் கோஷ்டி பூசல்! அமைச்சரை சந்திப்பதில் சண்டை

திண்டுக்கல் வந்துள்ள மதுவிலக்கு துறை அமைச்சர் விக்னேஷை சந்திப்பதில் தவெகவினரிடையே கோஷ்டி பூசல் ஏற்பட்டு மாவட்ட செயலாளருக்கு எதிராக ஒரு தரப்பினர் முழக்கங்களை எழுப்பியதால் பரபரப்பு ஏற்பட்டது.

தவெகவில் சில மாவட்டங்களில் உட்கட்சி பூசல் வெடிக்க ஆரம்பித்துள்ளது. மாவட்ட செயலாளர்கள் சிலர் தங்களுடைய ஆதரவாளர்களுக்கு மட்டும் முக்கியத்துவம் கொடுத்து மற்றவர்களை ஓரங்கட்டுவதாக குற்றச்சாட்டு எழுந்து வருகிறது. இந்தநிலையில் திண்டுக்கல் தவெகவில் உட்கட்சி பூசல் வெளிப்படையாகவே தெரிய ஆரம்பித்துள்ளது.

திண்டுக்கல் வந்துள்ள மதுவிலக்கு துறை அமைச்சர் விக்னேஷை சந்திப்பதில் 2 தரப்பாக பிரிந்து வாக்குவாதத்தில் ஈடுபட்டனர். மாவட்ட, மாநகர தவெக தொண்டர்களிடையே வாக்குவாதம் ஏற்பட்டதால் அந்த இடமே பரபரப்பாக மாறியது. அமைச்சரை சந்திக்க விடாமல் தொண்டர்களையும் நிர்வாகிகளையும் திண்டுக்கல் கிழக்கு மாவட்ட செயலாளர் தர்மராஜ் தடுப்பதாக கூறி தனியார் ஹோட்டலில் ஒரு தரப்பினர் கோஷமிட்டனர். மாவட்ட செயலாளரை மாற்ற வேண்டும் என முழக்கங்களை எழுப்பினர். மாவட்ட செயலாளருக்கு எதிராக கட்சி நிர்வாகிகளே போர்க்கொடி தூக்கியுள்ள சம்பவம் எதிர் தரப்பினரின் விமர்சனத்தில் சிக்கியுள்ளது.