Sam Curran: "அன்று கம்மின்ஸ், இன்று நான்" மீண்டும் ஒரு 'சைலண்ட்' சவால்! அதிர்ச்சியில் இந்திய ரசிகர்கள்!

இங்கிலாந்து வீரர் சாம் கரன், "வியாழக்கிழமை இரவு வான்கடே மைதானம் மிகவும் அமைதியாக இருக்கும் என்று எதிர்பார்க்கிறேன்" எனக் கூறியிருப்பது, இந்திய ரசிகர்களிடையே பெரும் விவாதத்தை ஏற்படுத்தியுள்ளது.

டி20 உலகக்கோப்பை 2026

Source : PTI

2023 ஒருநாள் உலகக் கோப்பை இறுதிப் போட்டியின் போது, அகமதாபாத் மைதானத்தில் கூடியிருந்த ஒரு லட்சம் இந்திய ரசிகர்களை நோக்கி, "மைதானத்தில் இருக்கும் கூட்டத்தை அமைதிப்படுத்துவதை விட சிறந்த திருப்தி வேறு எதுவுமில்லை" என்று ஆஸ்திரேலிய கேப்டன் பாட் கம்மின்ஸ் கூறினார். அதேபோல அவர் இந்தியாவை வீழ்த்தி கோப்பையை வென்றார்.

தற்போது அதே பாணியில் இங்கிலாந்து வீரர் சாம் கரன், "வியாழக்கிழமை இரவு வான்கடே மைதானம் மிகவும் அமைதியாக இருக்கும் என்று எதிர்பார்க்கிறேன்" எனக் கூறியிருப்பது, இந்திய ரசிகர்களிடையே பெரும் விவாதத்தை ஏற்படுத்தியுள்ளது.

சாம் கரன் சொன்னது என்ன?

போட்டிக்கு முந்தைய செய்தியாளர் சந்திப்பில் பேசிய சாம் கரன், "இது ஒரு அற்புதமான மற்றும் ஐகானிக் மைதானம். வியாழக்கிழமை இரவு இங்கு மிகவும் அமைதியாக இருக்கும் என்று நான் எதிர்பார்க்கிறேன். ஒரு இளம் கிரிக்கெட் வீரராக, இந்தியாவுக்கு எதிராக உலகக் கோப்பை அரையிறுதியில் விளையாட வேண்டும் என்று நீங்கள் கனவு காண்கிறீர்கள். இங்குள்ள விக்கெட் பொதுவாக பேட்ஸ்மேன்களுக்கு ஏற்றதாக இருக்கும். இது ஒரு சிறிய மைதானம், எனவே அதிக ஸ்கோரிங் போட்டி எதிர்பார்க்கப்படுகிறது" என்றார்.

பாட் கம்மின்ஸ் சம்பவம்:

2023 ஒருநாள் உலகக் கோப்பை இறுதிப் போட்டிக்கு முன்பு ஆஸ்திரேலிய கேப்டன் பாட் கம்மின்ஸ் இதேபோன்ற அறிக்கையை வெளியிட்டார். மைதானத்தில் கூட்டத்தை அமைதிப்படுத்துவதாக கம்மின்ஸ் கூறினார். அரையிறுதியில் இந்தியாவுக்கு எதிராக இங்கிலாந்து அணி எவ்வாறு செயல்படுகிறது என்பதைப் பார்ப்பது சுவாரஸ்யமாக இருக்கும். 

2022 டி20 உலகக் கோப்பை: 

2022 டி20 உலகக் கோப்பையின் அரையிறுதியிலும் இந்தியாவும் இங்கிலாந்தும் மோதின. அந்தப் போட்டியில் இங்கிலாந்து 10 விக்கெட் வித்தியாசத்தில் வெற்றி பெற்றது. அதன் பின்னர் 2024 ஆம் ஆண்டு வெஸ்ட் இண்டீஸில் நடந்த டி20 உலகக்கோப்பையில் இரு அணிகளும் அரையிறுதியில் மோதின, அந்தப்போட்டியில் இந்திய அணி வெற்றிப்பெற்றது. தற்போது மூன்றாவது முறையாக  இரு அணிகளும் அரையிறுதியில் மோதவுள்ளன என்பது குறிப்பிடத்தக்கது.