IND vs SA 1ST TEST : கே.எல்.ராகுல் அபார சதம்..! முதல் இன்னிங்சில் இந்தியா 3 விக்கெட் இழப்பிற்கு 272 ரன்கள்..!
தென்னாப்பிரிக்க அணிக்கு எதிரான முதல் டெஸ்ட் போட்டியின் முதல் இன்னிங்சில் இந்தியா 3 விக்கெட் இழப்பிற்கு 272 ரன்களை எடுத்துள்ளது.
இந்திய அணி மற்றும் தென்னாப்பிரிக்க அணிகள் மோதும் முதல் டெஸ்ட் கிரிக்கெட் போட்டி செஞ்சூரியனில் இன்று தொடங்கியது. இந்த போட்டியில் டாஸ் வென்ற விராட்கோலி முதலில் பேட்டிங்கைத் தேர்வு செய்தார். பேட்டிங்கைத் தொடங்கிய கே.எல்.ராகுலும்- மயங்க் அகர்வாலும் ஆட்டத்தை தொடங்கினர்.
கே.எல்.ராகுல் நிதானமாக ஆட மயங்க் அகர்வால் அதிரடியாக ஆடினார். இருவரும் இணைந்து உணவு இடைவேளை வரை விக்கெட் இழப்பின்றி ஆடினர். சிறப்பாக ஆடிய மயங்க் அகர்வால் உணவு இடைவேளைக்கு பிறகு அரைசதம் அடித்தார். அரைசதம் அடித்த சிறிது நேரத்தில் அவர் லுங்கி நிகிடி பந்தில் ஆட்டமிழந்தார். அவர் 123 பந்தில் 9 பவுண்டரிகளுடன் 60 ரன்களுடன் ஆட்டமிழந்தார்.
அடுத்து மிகவும் எதிர்பார்க்கப்பட்ட புஜாரா களமிறங்கினார். நியூசிலாந்து தொடரில் சிறப்பாக ஆடாததால் இந்த தொடரில் சிறப்பாக ஆடுவார் என்று எதிர்பார்க்கப்பட்ட நிலையில், புஜாரா தான் சந்தித்த முதல் பந்திலே ஆட்டமிழந்தார். இதையடுத்து, கேப்டன் கோலி களமிறங்கினார். அவரும் கே.எல்.ராகுலும் இணைந்து மிகவும் நிதானமாக ஆடினர். இருவரும் ஏதுவான பந்துகளில் மட்டும் ரன்களை சேர்த்தனர். அவ்வப்போது பந்துகளை பவுண்டரிகளுக்கும் விரட்டினார்.
அணியின் ஸ்கோர் 199 ரன்களை எட்டியபோது கேப்டன் விராட்கோலி ஆட்டமிழந்தார். அவர் 94 பந்துகளில் 4 பவுண்டரிகளுடன் 35 ரன்களை எடுத்தபோது லுங்கி நிகிடி பந்தில் மல்டரிடம் கேட்ச் கொடுத்து ஆட்டமிழந்தார். அடுத்து முன்னாள் துணை கேப்டன் ரஹானே களமிறங்கினார்.
ரஹானே களமிறங்கிய முதல் பந்தையே பவுண்டரிக்கு விளாசினார். ரஹானே – கே.எல்.ராகுல் கூட்டணி துரிதமாக ரன்களை சேர்த்தனர். கேசவ் மகாராஜ் பந்தில் பவுண்டரி அடித்து கே.எல்.ராகுல் சதத்தை பூர்த்தி செய்தார். தென்னாப்பிரிக்க மண்ணில் கே.எல்.ராகுல் அடிக்கும் முதல் சதமாகும்.
முதல் நாள் ஆட்டநேர முடிவில் இந்திய அணி 90 ஓவர்களில் 3 விக்கெட் இழப்பிற்கு 272 ரன்களுடன் களத்தில் உள்ளது. கே.எல்.ராகுல் 248 பந்தில் 122 ரன்களை குவித்துள்ளார். அதில் 16 பவுண்டரிகளும், 1 சிக்ஸர்களும் அடங்கும். ரஹானே 81 பந்தில் 8 பவுண்டரிகளுடன் 40 ரன்களுடன் களத்தில் உள்ளார். தென்னாப்பிரிக்க அணி தரப்பில் லுங்கி நிகிடி 17 ஓவர்களில் 4 ஓவர்களை மெய்டனாக்கி வீசி 3 விக்கெட்டுகளை கைப்பற்றினார்.
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
