Vinayagar Chaturthi 2026: விநாயகர் சதுர்த்தி வழிபாடு.. பூஜையில் இடம்பெற வேண்டிய பொருட்கள் என்னென்ன?

Vinayagar Chaturthi Pooja Items in Tamil: விநாயகர் சதுர்த்தி மட்டுமல்ல விநாயகரை நீங்கள் எப்போது வழிபட்டாலும் பல பொருட்கள் கண்டிப்பாக இடம் பெற வேண்டும். அதனைப் பற்றிக் காணலாம்.

விநாயகர் சதுர்த்தி வழிபாடு

Source : ABP

விநாயகர் சதுர்த்தி பண்டிகையை முன்னிட்டு பிள்ளையாரை வழிபடும் மக்கள் என்னென்ன பொருட்களை எல்லாம் கண்டிப்பாக வைத்து படைக்க வேண்டும் என்பதைக் காணலாம். 

விநாயகருக்கு உகந்த சதுர்த்தி திதி

விநாயகருக்கு உகந்ததாக ஒவ்வொரு மாதமும் வளர்பிறை மற்றும் தேய்பிறையில் சதுர்த்தி திதி வரும். இது சங்கடஹர சதுர்த்தியாக கொண்டாடப்படும். இந்நாளில் ஒவ்வொரு ஆலயத்திலும் விநாயகருக்கு விசேஷ வழிபாடு நடைபெறுவது வழக்கம். அப்படியான நிலையில் ஆவணி மாதம் வரும் வளர்பிறை சதுர்த்தி திதி நாள் விநாயகர் சதுர்த்தியாக கொண்டாடப்படுகிறது. இந்நாள் விநாயகப் பெருமான் அவதரித்த தினமாக பார்க்கப்படுகிறது. இந்த நாளில் நாம் விநாயகரை வழிபட்டால் வாழ்க்கையில் ஏற்படும் தடைகள் அனைத்தும் நீங்கி நல்லறிவு, செல்வம், அதிர்ஷ்டம் ஆகியவை கிடைக்கும் என நம்பப்படுகிறது. 

விநாயகர் வழிபாட்டில் இடம்பெற வேண்டிய பொருட்கள்

2026ம் ஆண்டு விநாயகர் சதுர்த்தி பண்டிகை வரும் செப்டம்பர் 14ம் தேதி திங்கட்கிழமை கொண்டாடப்படுகிறது. இதனை முன்னிட்டு வீதியெங்கும் விதவிதமான விநாயகர் சிலைகள் பிரதிஷ்டை செய்ய தயாராகி வருகிறார். இந்நாளில் வீடுகளில் களிமண்ணாலான விநாயகர் சிலைகளை வீட்டில் வாங்கி வைத்து பூஜை செய்வார்கள். 

இந்நாளில் விநாயகர் வழிபாட்டில் மணைப் பலகை, சிவப்பு அல்லது மஞ்சள் துணி, மாவிலை தோரணம், பூக்கள் மற்றும் மாலைகள் ஆகியவை கண்டிப்பாக அலங்கார பொருட்கள் பிரிவில் இடம்பெற வேண்டும். மேலும் வழிபாட்டில் மஞ்சள், குங்குமம், விபூதி, மஞ்சள் கலந்த அரிசி, இரட்டை அருகம்புல், எருக்கம்பூ ஆகியவை இருக்க வேண்டும். மேலும் தீப ஆராதனை காட்ட அகல் விளக்கு, நல்லெண்ணெய், நெய், திரி, ஊதுபத்தி, சாம்பிராணி, கற்பூரம் ஆகியவை இருக்க வேண்டும். 

விநாயகர் சதுர்த்தி வழிபாட்டில் அவல், பொறி, பால், பழங்கள், மோத்தி லட்டு, கொழுக்கட்டை, மோதகம் கொழுக்கட்டை,  வெற்றிலை, பாக்கு, கரும்பு ஆகியவையும் கட்டாயம் இடம் பெற வேண்டும். விநாயகர் சதுர்த்தி பூஜைக்கு உகந்த நேரமாக செப்டம்பர் 14ம் தேதி காலை 10.51 மணி முதல் மதியம் 1.18 மணி வரை என பஞ்சாங்கம் தெரிவிக்கின்றனர். அதனைத் தவிர ராகுகாலம், எமகண்டம், குளிகை இல்லாத நேரங்களிலும் நாம் வழிபடலாம். விநாயகர் சதுர்த்தி நாளில் வீட்டில் வழிபட்டு கண்டிப்பாக அருகில் உள்ள ஏதேனும் ஒரு கோயிலில் இருக்கும் விநாயகரை வழிபட வேண்டும். இந்நாளில் உங்களால் முடிந்த அளவுக்கு தானம் செய்யுங்கள். களிமண் சிலை வைத்து வழிபடுபவர்கள் 3,5, 7வது நாளில் அதனை அருகில் உள்ள நீர்நிலைகளில் கரைத்து விட வேண்டும். இல்லாவிட்டால் வீட்டிலேயே விதிகளை பயன்படுத்தி கரைக்கலாம் எனவும் தெரிவிக்கப்பட்டது.