விக்கிரவாண்டி வேல்ஸ் பயண வழி உணவகத்தில் பேருந்து நிற்க தடை

விழுப்புரம்: விக்கிரவாண்டி வேல்ஸ் பயண வழி உணவகத்தில் பேருந்து நிற்க தடை

வேல்ஸ் பயண வழி உணவகம்

விழுப்புரம்: விக்கிரவாண்டி வேல்ஸ் உணவகத்தில் பேருந்து நிற்க தடை விதிக்கப்பட்டு போக்குவரத்து துறை அமைச்சர் நடவடிக்கை எடுத்துள்ளார். பொதுமக்கள் அளித்த புகாரின்‌ அடிப்படையில்‌, போக்குவரத்துக்‌ கழக உயர்‌ அலுவலர்கள்‌ திடீர்‌ ஆய்வு மேற்கொள்ளும் போது, பயணிகளுக்கு சுகாதாரமற்ற மற்றும்‌ தரமற்ற உணவு வழங்கிய வேல்ஸ்‌ பயண வழி உணவகத்தில்‌ அரசுப்‌ பேருந்துகள்‌ நின்று செல்ல தடை விதிக்கப்பட்டுள்ளது என போக்குவரத்துத்துறை அமைச்சர்‌ சா.சி.சிவசங்கர்‌ தெரிவித்தார். குறிப்பாக சுகாதாரமற்ற உணவுப் பொருட்கள் விற்பனை காரணமாக விக்கிரவாண்டி அருகே உள்ள அண்ணா, உதயா, வேல்ஸ், ஹில்டா, அரிஸ்டோ ஆகிய 5 உணவகங்களில் அரசுப்பேருந்துகள் நிற்க கடந்த சில மாதங்களுக்கு முன்பு தடை விதிக்கப்பட்டு மீண்டும் திறக்கப்பட்டது. இந்த நிலையில் தற்போது வேல்ஸ் உணவகம் உணவு பொருட்கள் விலை உயர்த்தியும், தரமற்ற முறையில் விற்பனை செய்து வந்தது உணவு பாதுகாப்பு துறை அதிகாரிகள் ஆய்வில் அம்பலமாகியுள்ளது.

செய்தி குறிப்பில் கூறியதாவது:-

சமீப காலமாக அரசுப்‌ போக்குவரத்துக்‌ கழகப்‌ பேருந்துகள்‌ நிறுத்தம்‌ செய்யும்‌ பயண வழி உணவகங்கள்‌ மற்றும்‌ கடைகளில்‌ தரமற்ற உணவுகள்‌ மற்றும்‌ கூடுதல்‌ விலைக்கு தின்பண்டங்கள்‌ விற்பனை செய்யப்படுவது மற்றும்‌ சுகாதாரமற்ற முறையில்‌ கழிவறைகள்‌ பராமரிக்கப்படுவது தொடர்பாக போக்குவரத்துத்‌ துறை அமைச்சர்‌ சா.சி.சிவசங்கர்‌ அவர்களுக்கு வரப்பெற்ற புகாரின்‌ அடிப்படையில்‌, அவர்களின்‌ உத்தரவின்படி சாலையோர உணவகங்களின்‌ செயல்பாட்டினை கடந்த இரண்டு நாட்களாக போக்குவரத்துக்‌ கழக உயர்‌ அலுவலர்களால்‌, தீடீர்‌ ஆய்வு மேற்கொள்ளப்பட்டது. 19.01.2023 அன்று போக்குவரத்துக்‌ கழக உயர்‌ அலுவலர்கள்‌ தீடீர்‌ ஆய்வு மேற்கொள்ளும்‌ போது, விக்கிரவாண்டி அருகே சாலைகள்‌ ஒருபுறமும்‌ உள்ள வேல்ஸ்‌ உணவகம்‌ பயணிகளுக்கு சுகாதாரமற்ற முறையில்‌ தரமற்ற உணவு மற்றும்‌ கூடுதல்‌ விலைக்கு தின்பண்டங்கள்‌ வழங்கியதை கண்டறியப்பட்டதன்‌ அடிப்படையில்‌, வேல்ஸ்‌ உணவகத்தில்‌ அரசுப்‌ பேருந்துகள்‌ நின்று செல்லும்‌ உரிமம்‌ ரத்து செய்யப்படுகிறது.அதனைத்‌ தொடர்ந்து, எதிர்வரும்‌ காலங்களில்‌, அங்கீகரிக்கப்பட்ட சாலையோர பிற உணவகங்களும்‌ ஆய்வு செய்யப்பட்டு, குறைகள்‌ கண்டறியப்பட்டால்‌, அதனடிப்படையில்‌ நடவடிக்கை மேற்கொள்ளப்படும்‌ என்பதனை தெரிவித்துக்‌ கொள்ளப்படுகிறது என செய்தி குறிப்பில் தெரிவிக்கப்பட்டுள்ளது.