SIR பட்டியல் குளறுபடி: ஷமி, தேவ் உட்பட முக்கிய பிரபலங்களுக்கு சம்மன்! தேர்தல் ஆணையம் அதிரடி நடவடிக்கை

கொல்கத்தா நகராட்சியின் 93-வது வார்டில் (ராஸ்பிஹாரி சட்டமன்றத் தொகுதி) வாக்காளராக உள்ள முகமது ஷமி மற்றும் அவரது சகோதரர் தாக்கல் செய்த படிவங்களில் சில பிழைகள் இருப்பது கண்டறியப்பட்டது.

முகமது ஷமி

Source : Facebook

இந்திய கிரிக்கெட் அணியின் நட்சத்திர வேகப்பந்து வீச்சாளர் முகமது ஷமி மற்றும் அவரது சகோதரர் முகமது கைஃப் ஆகியோருக்கு, வாக்காளர் பட்டியலில் உள்ள குளறுபடிகள் தொடர்பாக நேரில் ஆஜராக மேற்கு வங்க தேர்தல் ஆணையம் சம்மன் அனுப்பியுள்ளது.

மேற்கு வங்கத்தில் தற்போது சிறப்பு தீவிர திருத்தப் பிரச்சாரம் (SIR) நடைபெற்று வருகிறது. வாக்காளர் பட்டியலைப் புதுப்பிக்கும் இந்த நடவடிக்கையின் போது, கொல்கத்தா நகராட்சியின் 93-வது வார்டில் (ராஸ்பிஹாரி சட்டமன்றத் தொகுதி) வாக்காளராக உள்ள முகமது ஷமி மற்றும் அவரது சகோதரர் தாக்கல் செய்த படிவங்களில் சில பிழைகள் இருப்பது கண்டறியப்பட்டது. இதனைச் சரிசெய்யுமாறு இருவருக்கும் அதிகாரிகள் நோட்டீஸ் அனுப்பியிருந்தனர்.

விசாரணை தேதி மாற்றம்:

முதலில் திங்கட்கிழமை விசாரணைக்கு வருமாறு ஷமிக்கு உத்தரவிடப்பட்டிருந்தது. இருப்பினும், அன்று ராஜ்கோட்டில் நடைபெற்ற விஜய் ஹசாரே கோப்பை கிரிக்கெட் போட்டியில் பெங்கால் அணிக்காக அவர் விளையாடிக் கொண்டிருந்ததால், அவரால் நேரில் ஆஜராக முடியவில்லை.

இதனைத் தொடர்ந்து, மாற்றுத் தேதியைக் கோரி ஷமி விடுத்த வேண்டுகோளைத் தேர்தல் ஆணையம் ஏற்றுக்கொண்டது. இதன்படி, அவரது விசாரணை வரும் ஜனவரி 9 முதல் ஜனவரி 11-க்குள் நடைபெறும் என அதிகாரிகள் தெரிவித்துள்ளனர்.

வங்காளத்துடனான பிணைப்பு:

உத்தரபிரதேசத்தைப் பூர்வீகமாகக் கொண்ட முகமது ஷமி, தனது கிரிக்கெட் பயிற்சிக்காக இளம் வயதிலேயே கொல்கத்தாவுக்கு குடிபெயர்ந்தார். முன்னாள் வங்காள ரஞ்சி கேப்டன் சம்பரன் பானர்ஜியின் வழிகாட்டுதலில் வளர்ந்த அவர், பல ஆண்டுகளாக கொல்கத்தாவிலேயே வசித்து வருகிறார் என்பது குறிப்பிடத்தக்கது.

முக்கியப் புள்ளிகளுக்கும் நோட்டீஸ்:

வாக்காளர் பட்டியலை முழுமையாகச் சுத்திகரிக்கும் நோக்கில் மேற்கொள்ளப்படும் இந்த நடவடிக்கையில், பிரபலங்களும் விதிவிலக்கல்ல என்பதை தேர்தல் ஆணையம் உறுதிப்படுத்தியுள்ளது. முகமது ஷமி தவிர:திரிணாமுல் காங்கிரஸ் எம்.பி.யும் நடிகருமான தேவ் திரையுலக தம்பதிகளான லபோனி சர்க்கார் மற்றும் கௌசிக் பந்தோபாத்யாய் ஆகியோரின் பெயர்களும் இந்த சரிபார்ப்புப் பட்டியலில் இடம்பெற்றுள்ளதோடு, அவர்களுக்கும் விசாரணைக்கான நோட்டீஸ் அனுப்பப்பட்டுள்ளது.

சாதாரண குடிமக்கள் முதல் விஐபிக்கள் வரை அனைவரும் தேர்தல் ஆணையத்தின் சரிபார்ப்பு விதிகளுக்கு உட்பட்டவர்களே என்பதை இந்த நடவடிக்கை தெளிவுபடுத்துவதாக அதிகாரிகள் தரப்பில் தெரிவிக்கப்பட்டுள்ளது.