Gujarat Congress Candidates List: சூடு பிடிக்கும் குஜராத் தேர்தல் களம்.. வெளியிடப்பட்ட இரண்டாம் வேட்பாளர் பட்டியல்..

குஜராத் மாநிலத்தில் நடைபெறவுள்ள சட்டப்பேரவைத் தேர்தலில் போட்டியிடும் 46 வேட்பாளர்களைக் கொண்ட இரண்டாவது வேட்பாளர் பட்டியலை காங்கிரஸ் வியாழக்கிழமை வெளியிட்டது.

காங்கிரஸ் கட்சி (கோப்பு புகைப்படம்)

குஜராத் மாநிலத்தில் நடைபெறவுள்ள சட்டப்பேரவைத் தேர்தலில் போட்டியிடும் 46 வேட்பாளர்களைக் கொண்ட இரண்டாவது வேட்பாளர் பட்டியலை காங்கிரஸ் வியாழக்கிழமை வெளியிட்டது. நவம்பர் 4 ஆம் தேதி அக்கட்சி தனது முதல் பட்டியலை வெளியிட்டது, அதில் 43 வேட்பாளர்கள் அறிவிக்கப்பட்டனர். அக்கட்சி தனது இரண்டாவது பட்டியலை நேற்று வெளியிட்டது. 182 வேட்பாளர்களில் அறிவிக்கப்பட்ட மொத்த வேட்பாளர்களின் எண்ணிக்கை 89 ஆக உயர்ந்துள்ளது. 

மாநிலத்தில் உள்ள 182 சட்டப்பேரவைத் தொகுதிகளுக்கு இரண்டு கட்டங்களாக தேர்தல் நடத்தப்பட உள்ளது. 89 தொகுதிகளுக்கு முதல் கட்டமாக  டிசம்பர் 1-ஆம் தேதியும், 93 தொகுதிகளுக்கு இரண்டாவது கட்டமாக  டிசம்பர் 5- ஆம் தேதி தேர்தல் நடைபெறுகிறது. தேர்தலில் பதிவாகும் வாக்குகள்  டிசம்பர் 8- ஆம் தேதி எண்ணப்படுகிறது. 

டெல்லியில் உள்ள இந்திய தேர்தல் ஆணையத்தின் தலைமையகத்தில் நடைபெற்ற செய்தியாளர் சந்திப்பில் தலைமைத் தேர்தல் ஆணையர்  ராஜீவ் குமார் தேர்தல் தேதியை அறிவித்தார். 

தேர்தல் ஏற்பாடுகள்:

மாநிலத்தில் 51,700 வாக்குச்சாவடிகள் அமைக்கப்பட உள்ளது. குஜராத் சட்டமன்றத் தேர்தலில் 4.6 லட்சம் புதிய வாக்காளர்கள் வாக்களிக்க உள்ளதாக தேர்தல் ஆணையம் தெரிவித்துள்ளது. இந்தத் தேர்தலில் 4.90 வாக்காளர்கள் வாக்களிக்க தகுதி பெற்றுள்ளதாக தெரிவிக்கப்பட்டுள்ளது.

மேலும், இளைஞர்களை ஊக்குவிக்கும் வகையில் 33 வாக்குச்சாவடிகளில் வாக்குச்சாவடி அலுவலர்களாக இளைஞர்கள் பணியமர்த்தப்பட உள்ளனர். 

மாநிலத்தில் 1,274 வாக்குச்சாவடி மையங்கள் பெண் அலுவலர்களால் நிர்வகிக்கப்பட உள்ளது. குஜராத்தில் இரண்டு கட்டங்களாக தேர்தல் நடைபெற உள்ளது.

குஜராத் மாநிலத்தில் 1998-ஆம் ஆண்டு முதல் பாஜக ஆட்சியில் இருந்து வருகிறது. 24 ஆண்டுகளாக குஜராத்த்தில் ஆட்சியில் தொடரும் பா.ஜ.க. கட்சிக்கு இம்முறை சவால் மிகுந்த தேர்தலாக இருக்கும். பஞ்சாப் மாநிலத்தில் ஆட்சியைக் கைப்பற்றிய ஆம் ஆத்மி கட்சி, குஜராத்திலும் வரும் தேர்தலில் ஆட்சியைக் கைப்பற்றும் முனைப்பில் தீவிரமாக செயல்பட்டு வருகிறது. பாஜக - காங்கிரஸ் - ஆம் ஆத்மி கட்சிகளுக்கிடையே மும்முனைப் போட்டி நடைபெற்று வரும் நிலையில் இம்முறை தேர்தல் களம் பரபரப்பாக இருக்கும் என்று எதிர்பார்க்கப்படுகிறது. 

ஹிமாச்சல பிரதேச தேர்தலுக்கான தேதி அறிவிக்கப்பட்ட போதே குஜராத் தேர்தல்  தேதி ஏன் அறிவிக்கப்படவில்லை என்ற கேள்வி எழுந்தது. அதற்கு பதிலளித்த இந்திய தலைமைத் தேர்தல் ஆணையர்  ராஜீவ் குமார்,” ஹிமாச்சல பிரதேசத்தின் காலநிலையை கருத்தில் கொண்டே அம்மாநிலத்தின் தேர்தல் தேதி முதலில் அறிவிக்கப்பட்டது.” என்று தெரிவித்திருந்தார். 

இந்நிலையில் தேர்தலில் போட்டியிடும் 46 வேட்பாளர்களைக் கொண்ட இரண்டாவது வேட்பாளர் பட்டியலை காங்கிரஸ் நேற்று வெளியிட்டது. 

 

கட்சியின் பொதுச் செயலாளர் முகுல் வாஸ்னிக் கையொப்பமிட்டு வெளியிடப்பட்ட வேட்பாளர்கள் பட்டியலில், மமத்பாய் ஜங் ஜாட் (அப்தாசா), ராஜேந்தர்சிங் ஜடேஜா (மாண்ட்வி), அர்ஜன்பாய் பூடியா (புஜ்), நௌஷாத் சோலங்கி (தசாதா - எஸ்சி), கல்பனா கரம்சிபாய் மக்வானா (லிம்ப்டி) ஆகியோர் இடம்பெற்றுள்ளனர்.

லிம்ப்டியைச் சேர்ந்த கல்பனா கரம்சிபாய் மக்வானா, டெடியாபாடா -எஸ்டியைச் சேர்ந்த ஜெர்மாபென் சுக்லால் வாசவா மற்றும் கரஞ்சிலிருந்து பார்தி பிரகாஷ் படேல் ஆகியோர் அடங்கிய பட்டியலில் மொத்தம் மூன்று பெண் தலைவர்கள் இடம் பெற்றுள்ளனர்.