மாவட்ட ஆட்சியர் அலுவலகத்தில் வேலைவாய்ப்பு: பத்தாம் வகுப்பு, எட்டாம் வகுப்பு படித்தவர்களுக்கு வாய்ப்பு!
மயிலாடுதுறை மாவட்ட இளைஞர் நீதிக்குழுமத்தில் இளநிலை உதவியாளர் மற்றும் அலுவலக உதவியாளர் தற்காலிகப் பணியிடங்களுக்கு அறிவிப்பு வெளியிடப்பட்டுள்ளது.
மயிலாடுதுறை: மயிலாடுதுறை மாவட்டத்தில் சமூகப் பாதுகாப்புத் துறை மற்றும் குழந்தைகள் நலன் மற்றும் சிறப்புச் சேவைகள் துறையின் கீழ் இயங்கி வரும் இளைஞர் நீதிக்குழுமத்தின் தற்காலிகக் கூடுதல் தேவைகளை நிறைவேற்றும் பொருட்டு, இரண்டு முக்கியப் பணியிடங்களுக்கு ஆட்கள் தேர்வு செய்யப்பட உள்ளதாக மாவட்ட நிர்வாகம் சார்பில் அதிகாரப்பூர்வ அறிவிப்பு வெளியாகியுள்ளது.
மயிலாடுதுறை மாவட்ட மக்களின் நலன் மற்றும் இளைஞர் நீதிக்குழுமத்தின் செயல்பாடுகளை மேலும் துரிதப்படுத்தும் நோக்கில் இந்தப் பணியிடங்கள் தற்காலிக அடிப்படையில் நிரப்பப்பட உள்ளன. இதில் இளநிலை உதவியாளர் உடன் இணைந்த பதிவறை எழுத்தர் பணியிடம் ஒன்றும், அலுவலக உதவியாளர் பணியிடம் ஒன்றும் காலியாக இருப்பதாகத் தெரிவிக்கப்பட்டுள்ளது. இந்த வேலைவாய்ப்பு தொடர்பான முழு விவரங்களையும் கல்வித் தகுதிகளையும் வெளியிட்டுள்ள மாவட்ட நிர்வாகம், தகுதியுள்ள நபர்கள் உரிய நேரத்திற்குள் விண்ணப்பிக்குமாறு கேட்டுக்கொண்டுள்ளது.
கல்வி மற்றும் பணிசார்ந்த இதரத் தகுதிகள்
இந்தப் பணியிடங்களுக்கான தகுதிகளைப் பொறுத்தவரை, இளநிலை உதவியாளர் உடன் இணைந்த பதிவறை எழுத்தர் (Junior Assistant cum Record Clerk) பதவிக்கு விண்ணப்பிக்க விரும்பும் நபர்கள் மத்திய அல்லது மாநில அரசால் அங்கீகரிக்கப்பட்ட வாரியத்தின் மூலம் நடத்தப்படும் பத்தாம் வகுப்பு (SSLC) பொதுத் தேர்வில் அல்லது அதற்கு இணையான தேர்வில் கட்டாயம் தேர்ச்சி பெற்றிருக்க வேண்டும்.
அத்துடன் அடிப்படை கணினி இயக்கத் திறனும், கணினி சார்ந்த பணி அனுபவமும் பெற்றிருப்பது அவசியமான ஒன்றாகும். இந்தப் பதவிக்குத் தேர்வு செய்யப்படும் நபருக்கு மாதம் தொகுப்பூதியமாக இருபதாயிரம் ரூபாய் (ரூ. 20,000/-) வழங்கப்படும்.
அதேபோல், அலுவலக உதவியாளர் (Office Assistant) பணியிடத்திற்கு விண்ணப்பிப்பவர்கள் அரசு அல்லது தனியார் பள்ளி வாரியத்தால் அங்கீகரிக்கப்பட்ட ஏதேனும் ஒரு கல்வி நிறுவனத்தில் எட்டாம் வகுப்பு (VIII Standard) தேர்ச்சி பெற்றிருக்க வேண்டும். இப்பதவிக்குத் தேர்ந்தெடுக்கப்படும் நபருக்கு மாதத் தொகுப்பூதியமாக பதிமூன்றாயிரம் ரூபாய் (ரூ. 13,000/-) நிர்ணயிக்கப்பட்டுள்ளது. விண்ணப்பதாரர்களின் வயதானது 42 வயதிற்கு மிகாமல் இருக்க வேண்டும் என்பது முக்கியமான நிபந்தனையாகும்.
பணி நிபந்தனைகள் மற்றும் விதிமுறைகள்
மேற்கண்ட இரண்டு பணியிடங்களுமே முற்றிலும் தற்காலிக அடிப்படையிலானவை என்பதால், தேர்வு செய்யப்படும் பணியாளர்கள் வருங்காலத்தில் எந்தவித நிரந்தரப் பணி உரிமையையும் கோர முடியாது. மேலும் நிர்வாகக் காரணங்கள் மற்றும் தேவைகளின் அடிப்படையில், முன்னறிவிப்பு ஏதுமின்றி பணியாளர்களைப் பணியில் இருந்து விடுவிப்பதற்கான முழு அதிகாரமும் மாவட்ட நிர்வாகத்திற்கு உண்டு. இவ்வாறு பணிநீக்கம் செய்யப்படும் பட்சத்தில், அதுதொடர்பாக எவ்வித சட்டப்பூர்வ உரிமைகோரலையோ அல்லது இழப்பீட்டையோ பணியாளர்கள் கோர முடியாது என்ற நிபந்தனையின் அடிப்படையிலேயே இந்த ஆள்சேர்ப்பு நடைமுறைப்படுத்தப்படுகிறது.
விண்ணப்பிக்கும் முறை மற்றும் கடைசி நாள்
இப்பணியிடங்களுக்கு விண்ணப்பிக்க விரும்புவோர், பூர்த்தி செய்யப்பட்ட விண்ணப்பப் படிவத்துடன் தங்களின் கல்விச் சான்றிதழ்கள் மற்றும் தேவையான இதர ஆவணங்களின் சுய சான்றொப்பமிடப்பட்ட (Self-Attested) நகல்களை இணைத்துச் சமர்ப்பிக்க வேண்டும். விண்ணப்பங்களைச் சமர்ப்பிக்க 12-10-2026 அன்று மாலை 05:30 மணி வரை மட்டுமே அவகாசம் அளிக்கப்பட்டுள்ளது.
பூர்த்தி செய்யப்பட்ட விண்ணப்பங்களை "மாவட்ட குழந்தைகள் பாதுகாப்பு அலுவலர், மாவட்ட குழந்தைகள் பாதுகாப்பு அலகு, 5-ஆம் தளம், மாவட்ட ஆட்சியர் அலுவலகம், மயிலாடுதுறை மாவட்டம் - 609 305" என்ற முகவரிக்கு நேரிலோ அல்லது அஞ்சல் மூலமாகவோ அனுப்பி வைக்கலாம்.
குறிப்பிட்ட கடைசி நேரத்திற்குப் பிறகு பெறப்படும் விண்ணப்பங்கள், அரைகுறையாகப் பூர்த்தி செய்யப்பட்ட விண்ணப்பப் படிவங்கள் மற்றும் உரிய சான்றிதழ் நகல்கள் இணைக்கப்படாத விண்ணப்பங்கள் கண்டிப்பாக பரிசீலனைக்கு எடுத்துக்கொள்ளப்பட மாட்டாது. எனவே தகுதியும் விருப்பமும் உள்ள விண்ணப்பதாரர்கள் காலக்கெடுவுக்குள் உரிய ஆவணங்களுடன் விண்ணப்பித்து இ வாய்ப்பினைப் பயன்படுத்திக் கொள்ளுமாறு மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த், வெளியிட்டுள்ள செய்திக்குறிப்பில் தெரிவித்துள்ளார்.
தலைப்பு செய்திகள்
ட்ரெண்டிங் செய்திகள்
