Half Yearly Leave: பள்ளிகளுக்கு அரையாண்டு விடுமுறை எப்போது?- தேதி அறிவிப்பு

மாநிலக் கல்வி வாரியத்தின்கீழ் படிக்கும் மாணவர்களுக்கு டிசம்பர் 24ஆம் தேதி முதல் விடுமுறை அளிக்கப்பட உள்ளது. ஜனவரி 1 வரை விடுமுறை அளிக்கப்பட்டு, ஜனவரி 2ஆம் தேதி பள்ளிகள் திறக்கப்பட உள்ளன. 

மாணவர்கள் | கோப்புப்படம்

தமிழகத்தில் மாநிலக் கல்வி வாரியத்தின்கீழ் படிக்கும் மாணவர்களுக்கு டிசம்பர் 24ஆம் தேதி முதல் விடுமுறை அளிக்கப்பட உள்ளது. ஜனவரி 1 வரை விடுமுறை அளிக்கப்பட்டு, ஜனவரி 2ஆம் தேதி பள்ளிகள் திறக்கப்பட உள்ளன. 

அரையாண்டு தேர்வுகள்:

அரசு, அரசு உதவிபெறும் மற்றும் தனியார் பள்ளி மாணவ, மாணவிகளில், 9 முதல் 12-ம் வகுப்பு வரையிலான மாணவர்களுக்கு டிசம்பர் 15ஆம் தேதி அன்று அரையாண்டு தேர்வு தொடங்கி, நடைபெற்று வருகிறது. 6 முதல் 8-ம் வகுப்பு மாணவர்களுக்கு, டிச.19  தொடங்கும் தேர்வு டிசம்பர் 23ஆம் தேதி வரை நடைபெற உள்ளது. 

மொத்தமாக 6 முதல் 12ஆம் வகுப்பு மாணவர்களுக்கு அரையாண்டு தேர்வு நடைபெற உள்ள நிலையில், 6, 8, 10, 12 ஆம் வகுப்புகளுக்கு காலையிலும், 7, 9, 11 ஆம் வகுப்புகளுக்கு பிற்பகலிலும் தேர்வு நடைபெற்று வருகிறது. 

2022- 2023 ஆம் கல்வியாண்டில் அனைத்து வகை உயர்நிலை, மேல்நிலைப் பள்ளிகள் மற்றும் தனியார் பள்ளிகளில் பயிலும் 6 ஆம் வகுப்பு முதல் 12 ஆம் வகுப்பு வரை பயிலும் மாணவ / மாணவியர்களுக்கு இந்தத் தேர்வு நடைபெறுகிறது. அனைத்து வகை உயர்நிலை, மேல்நிலைப் பள்ளிகள் மற்றும் தனியார் பள்ளிகளில் உள்ள 6 முதல் 12 ஆம் வகுப்புகளுக்கு சார்ந்த வினாத்தாள் கட்டுக்காப்பு மண்டல மையப்பள்ளி தலைமையாசிரியர்கள் மூலமாக வினாத் தாள்கள் வழங்கப்பட்டு வருகின்றன.

முன்னதாக தேர்வு நாட்களுக்குரிய வினாத் தாள்களை பெற தங்கள் பள்ளி சார்பாக ஒரு நபரைத் தேர்ந்தெடுத்து, அவ்விவரத்தினை சார்ந்த வினாத்தாள் கட்டுக்காப்பு மண்டல மையப் பள்ளித் தலைமையாசிரியருக்கு முன்கூட்டியே தகவல் தெரிவித்தல் வேண்டும் என்று கூறப்பட்டது. 

கடந்த காலாண்டுத் தேர்வில் பள்ளிகளே வினாத் தாள்களைத் தயாரித்துக்கொள்ள பள்ளிக் கல்வித் துறை உத்தரவிட்டிருந்த நிலையில், தற்போது அரையாண்டுத் தேர்வுக்கு தமிழ்நாடு முழுவதும் பொதுவான வினாத்தாள் அடிப்படை பின்பற்றப்பட்டு வருகிறது. 

அரையாண்டு விடுமுறை

ஏற்கெனவே தொடங்கி நடைபெற்று வரும் அரையாண்டுத் தேர்வு டிசம்பர் 23 அன்று முடிகிறது. 24ஆம் தேதி முதல் மாணவர்களுக்கு விடுமுறை அளிக்கப்பட உள்ள நிலையில், 9 நாட்கள் அரையாண்டு விடுமுறை அளிக்கப்பட உள்ளது. 

ஆங்கிலப் புத்தாண்டான ஜனவரி 1 வரை விடுமுறை அளிக்கப்படும் நிலையில், விடுமுறை முடிந்து ஜனவரி 2ஆம் தேதி பள்ளிகள் திறக்கப்பட உள்ளன. மாநிலக் கல்வி வாரியத்தைப் போல சிபிஎஸ்இ பள்ளி மாணவர்களுக்கும் தற்போது பருவத் தேர்வுகள் தொடங்கி, நடைபெற்று வருவது குறிப்பிடத்தக்கது.