TNPSC Group 2 Result: வெளியானது டிஎன்பிஎஸ்சி குரூப் 2 முதன்மைத் தேர்வு முடிவுகள் : பார்ப்பது எப்படி?

ஜனவரி 12ஆம் தேதி குரூப் 2 முதன்மைத் தேர்வு முடிவுகள் வெளியாகும் என்று டிஎன்பிஎஸ்சி அறிவித்த நிலையில், தேர்வு முடிவுகள் இன்று வெளியாகி உள்ளன.

குரூப் 2 தேர்வு முடிவுகள்

நீண்ட எதிர்பார்ப்புக்குப் பிறகு டிஎன்பிஎஸ்சி குரூப் 2, 2 ஏ முதன்மைத் தேர்வு முடிவுகள் இன்று (ஜன.11) வெளியாகி உள்ளன. குறிப்பாக, நேர்காணல் கொண்ட, அல்லாத பதவிகளுக்கான தேர்வு முடிவுகள் வெளியாகி உள்ளன. இதைப் பார்ப்பது எப்படி என்று பார்க்கலாம்.

அரசுத் துறைகளில் குரூப் 2 மற்றும் 2ஏ பணி நிலையில் காலியாக உள்ள 6,151 பணியிடங்களை நிரப்புவதற்காக குரூப் 2 மற்றும் 2ஏ முதல்நிலைத் தேர்வு கடந்த 2022ஆம் ஆண்டு மே மாதம் 21 ஆம் தேதி நடைபெற்றது. இந்தத் தேர்வுக்கு 11 லட்சத்துக்கும் மேற்பட்டோர் விண்ணப்பித்த நிலையில், சுமார் 9 லட்சம் பேர் தேர்வை எழுதினர். இவர்களுக்கான முதல்நிலைத் தேர்வு முடிவுகள் ஜூன் மாதம் வெளியாகும் என்று அறிவிக்கப்பட்டு, அக்டோபர் மாதத்துக்குத் தள்ளி வைக்கப்பட்டது. தொடர்ந்து கடந்த 2022ஆம் ஆண்டு நவம்பர் மாதம் தேர்வு முடிவுகள் வெளியாகின.  

முதல்நிலைத் தேர்வில் 57,641 பேர் தேர்ச்சி அடைந்த நிலையில், 55,071 தேர்வர்கள் முதன்மைத் தேர்வுக்கு விண்ணப்பித்தனர். இவர்களுக்கான தேர்வு கடந்த 2023ஆம் ஆண்டு பிப்ரவரி 25ஆம் தேதி நடைபெற்றது. இந்த முதன்மைத் தேர்வு முடிவுகள் வெளியாவதில் தொடர்ந்து தாமதம் ஏற்பட்டது. 

ஜனவரியில் தேர்வு முடிவுகள்

முதன்மைத் தேர்வு முடிவுகளும் தாமதமான நிலையில், 8 மாதங்கள் கழித்து டிசம்பர் மாதம் முதல் வாரத்தில் வெளியாகும் என்று அமைச்சர் தங்கம் தென்னரசு அறிவித்தார். எனினும் குறிப்பிட்ட நேரத்தில் தேர்வு முடிவுகள் வெளியாகவில்லை.

தேசிய அளவில் ட்ரெண்ட்

டிஎன்பிஎஸ்சி தேர்வு முடிவுகள் வெளியாவதில் தொடர்ந்து தாமதம் ஏற்பட்டு வருவதாக அரசியல் தலைவர்கள் குற்றம்சாட்டினர். தாமதம் குறித்து, தேர்வர்கள் சமூக வலைதளங்களிலும் தேசிய அளவில் ட்ரெண்டாக்கினர். 

ஆண்டுக்கணக்கில் தாமதம் ஏற்பட்டு வருவதால், குரூப் 2, 2ஏ பணிகளுக்கான காலிப் பணியிடங்களை அதிகரிக்க வேண்டும் என்றும் கோரிக்கை விடுக்கப்பட்டது. இந்த நிலையில், ஜனவரி 11ஆம் தேதி குரூப் 2 தேர்வு முடிவுகள் வெளியாகும் என்று டிஎன்பிஎஸ்சி அறிவித்தது. இதைத் தொடர்ந்து தேர்வு முடிவுகள் இன்று (ஜன.11) வெளியாகி உள்ளன.

இதை அறிந்துகொள்வது எப்படி?

* தேர்வர்கள் https://www.tnpsc.gov.in/ என்ற இணைப்பை க்ளிக் செய்ய வேண்டும்.

* அதில் https://www.tnpsc.gov.in/english/latest_results.aspx?c=4593 பக்கத்தைத் தேர்வு செய்ய வேண்டும்.

* அல்லது https://www.tnpsc.gov.in/document/Certificateverification/2022_03_GR_II_MAINS_OT_PUB_LIST_2K24.pdf

என்ற இணைப்பைப் பதிவிட்டு, நேர்காணல் கொண்ட பதவிகளுக்கான தேர்வு முடிவுகளை அறிந்துகொள்ளலாம்.

நேர்காணல் கொண்ட 161 பதவிகளுக்கு மட்டும் 1:3 என்ற அளவில், 483 தேர்வர்கள் தேர்ந்தெடுக்கப்பட்டு, இன்று அறிவிக்கப்பட்டுள்ளனர். 

நேர்காணல் அல்லாத பதவிகளுக்கான கணினி வழி சான்றிதழ்‌ சரிபார்ப்புக்கான முடிவுகள்‌ தேர்வாணைய வலைதளத்தில்‌ இருவழித்‌ தொடர்பு முறையில் (Interactive Mode) வெளியிடப்பட்டுள்ளது.

மேலும்‌, நேர்முகத்‌ தேர்வு பதவிகளுக்கான தெரிவு முடிவடைந்த பின்னர்‌ தேர்வர்கள்‌ முதன்மைத் தேர்வில்‌ பெற்ற மதிப்பெண்கள்‌, தரவரிசை உள்ளிட்ட விவரங்கள்‌ தேர்வாணைய வலைதளத்தில்‌ இருவழித்‌ தொடர்பு முறையில்‌ நேர்முக சான்றிதழ்‌ சரிபார்ப்பு மற்றும்‌ கலந்தாய்வுக்கு முன்னர்‌ வெளியிடப்பட உள்ளது.

கூடுதல் தகவல்களுக்கு: https://www.tnpsc.gov.in/