TNPSC Group 2, 2A: டிஎன்பிஎஸ்சி குரூப் 2, 2 ஏ தேர்வு முடிவுகள் வெளியீடு; காண்பது எப்படி? முதன்மைத் தேர்வில் முக்கிய மாற்றம்!
TNPSC Group 2, 2A results 2025: குரூப் 2 , 2 A பணிகளுக்கான முதன்மை தேர்வுக்கு தற்காலிகமாக அனுமதிக்கப்பட்ட தேர்வர்களின் பதிவெண் கொண்ட பட்டியல்கள் இன்று வெளியிடப்பட்டுள்ளன.
குரூப் 2, 2 ஏ முதல்நிலைத் தேர்வுகளுக்கான முடிவுகள் தமிழ்நாடு அரசுப் பணியாளர் தேர்வாணையத்தால் இன்று (டிசம்பர் 22) வெளியிடப்பட்டு உள்ளன. இதைக் காண்பது எப்படி? கீழே காணலாம்.
இதுகுறித்து டிஎன்பிஎஸ்சி கூறி உள்ளதாவது:
ஒருங்கிணைந்த குடிமைப் பணிகள் தேர்வு-II (தொகுதி II & IIA பணிகள்) (அறிவிக்கை எண்.11/2025) முதன்மைத் தேர்வுக்கான பட்டியல்கள் வெளியீடு
தமிழ்நாடு அரசுப் பணியாளர் தேர்வாணையம், ஒருங்கிணைந்த குடிமைப் பணிகள் தேர்வு-II (தொகுதி II & IIA பணிகள்) உள்ளடக்கிய பதவிகளின் நேரடி நியமனத்திற்காக 15.07.2025 அன்று அறிவிக்கை வெளியிட்டது. இதற்கான முதல்நிலைத் தேர்வு 28.09.2025 அன்று முற்பகலில் நடைபெற்றது. இந்தத் தேர்விற்கு 5,53,634 தேர்வர்கள் தேர்வு எழுத அனுமதிக்கப்பட்டனர். மேற்படி தேர்வினை 4,20,217 தேர்வர்கள் எழுதினர்.
இத்தெரிவிற்கான தேர்வு முடிவுகள் டிசம்பர் மாதம் 2025-இல் வெளியிடப்படும் என தேர்வாணைய வலைதளத்தில் தெரிவிக்கப்பட்டது. அவ்வாறே, மேற்கண்ட அறிவிக்கையில் குறிப்பிடப்பட்டுள்ள விதிகளின்படி, குரூப் 2 மற்றும் குரூப் 2 A பணிகளுக்கான முதன்மை தேர்வுக்கு தற்காலிகமாக அனுமதிக்கப்பட்ட தேர்வர்களின் பதிவெண் கொண்ட பட்டியல்கள் தேர்வாணைய (www.tnpsc.gov.in) இன்று (22.12.2025 அன்று) வெளியிடப்பட்டுள்ளன.
எழுத்துத் தேர்வு மூலம் முதன்மைத் தேர்வு
குரூப் 2 A பணிகளில் உள்ளடக்கிய பதவிகளுக்கான முதன்மைத் தேர்வு (கொள்குறி வகை), தாள்-II (பொது அறிவு, பொது நுண்ணறிவு மற்றும் பகுத்தறிவு) கணினி வழித் தேர்வாக நடத்தப்படும் என அறிவிக்கையில் (Notification) தெரிவிக்கப்பட்டிருந்தது. ஆனால், நிர்வாகக் காரணங்களுக்காக குரூப் 2 A பணிகளின் தாள்-II -ற்கான முதன்மைத் தேர்வு OMR முறையில் நடத்தப்படும் எனத் தெரிவிக்கப்படுகிறது.
முதன்மைத் தேர்வு பிப்ரவரி மாதம் 8ஆம் தேதி நடைபெற உள்ளது. தேர்வர்கள், தேர்வாணைய வலைதளத்தினை (www.tnpsc.gov.in) தொடர்ந்து பார்வையிடுமாறு அறிவுறுத்தப்படுவதாக டிஎன்பிஎஸ்சி செயலாளர் தெரிவித்துள்ளார்.
தேர்வு முடிவுகளைக் காண்பது எப்படி?
https://tnpsc.gov.in/document/certificateverification/11_2025_GROUP_II_PUBLIST.pdf என்ற இணைப்பை தேர்வர்கள் க்ளிக் செய்யவும்.
அதில் கீழே உள்ள எண்களை க்ளிக் செய்து, குரூப் 2 தேர்வு முடிவுகளைக் காணலாம். அதேபோல https://tnpsc.gov.in/document/certificateverification/11_2025_GROUP_IIA_PUBLIST.pdf என்ற இணைப்பில், குரூப் 2 ஏ தேர்வு முடிவுகளைக் காண முடியும்.
828 பணியிடங்களுக்கு தேர்வு நடைபெற்ற நிலையில், குரூப் 2 முதன்மைத் தேர்வுக்கு 1,126 பேரும் குரூப் 2 ஏ தேர்வுக்கு 9,457 பேரும் தேர்வு செய்யப்பட்டுள்ளது குறிப்பிடத்தக்கது.
தலைப்பு செய்திகள்
ட்ரெண்டிங் செய்திகள்
