Academic Calendar: மாணவர்கள், ஆசிரியர்களுக்கு அசத்தல் அறிவிப்பு; இந்த நாட்களில் விடுமுறை- திருத்தப்பட்ட நாட்காட்டி வெளியீடு

Revised Academic Calendar 2024 - 25: இரண்டு சனிக்கிழமைகளைத் தவிர பிற சனிக்கிழமைகள் அனைத்தும் விடுமுறை அளித்து பள்ளிக் கல்வி இயக்குநர் அறிவித்துள்ளார்.

மாணவர்கள் | கோப்புப்படம்

Source : சிறப்பு ஏற்பாடு

பள்ளி மாணவர்களுக்கான திருத்தப்பட்ட ஆண்டு நாட்காட்டியை தமிழ்நாடு பள்ளிக் கல்வித்துறை வெளியிட்டுள்ளது.

ஆண்டு முழுவதும் ஒரு கல்வியாண்டில் பள்ளி செயல்படும் வேலை நாட்கள், தேர்வு தேதிகள், விடுமுறைகள், உயர் கல்வி வழிகாட்டி முகாம் உட்பட பல்வேறு விவரங்கள் அடங்கிய கல்வியாண்டு நாட்காட்டியை ஆண்டுதோறும் பள்ளிக் கல்வித்துறை வெளியிட்டு வருகிறது. 2018ஆம் ஆண்டு முதல் இந்த நாட்காட்டி வெளியாகி வருகின்றது. இதற்கிடையே 2024-25ஆம் கல்வி ஆண்டுக்கான நாள்காட்டியை பள்ளிக் கல்வித்துறை வெளியிட்டது.

கடந்த ஆண்டு ஆசிரியர்களுக்கு 217 வேலை நாட்கள் நிர்ணயிக்கப்பட்ட நிலையில், இந்த ஆண்டு மூன்று நாட்கள் அதிகரித்து, 220 நாட்கள் ஆக அறிவிக்கப்பட்டது. தொடர்ந்து ஆசிரியர்களின் கோரிக்கைக்கு ஏற்ப 10 நாட்கள் குறைக்கப்பட்டு, 210 நாட்கள் ஆக அறிவிக்கப்பட்டுள்ளது.

வேலை நேரம் எப்படி?

பாட வேளைகளுக்கான நேரத்தைப் பொறுத்தவரை, காலை 9:00 மணிக்கு பள்ளி வேலை நேரம் துவங்க வேண்டும். முதல், 30 நிமிடங்கள் காலை வணக்கக் கூட்டம் நடத்தப்படும். காலை 9:30 முதல், 10:10 மணி வரை முதல் பாட வேளையில், தமிழ் கற்பிக்க வேண்டும். 10ம் வகுப்பு வரை இந்த நடைமுறை பின்பற்றப்பட வேண்டும் என்று தெரிவிக்கப்பட்டுள்ளது.

ஒவ்வொரு வாரமும் உயர் கல்வி வழிகாட்டி வகுப்புகள், மொழிகள் ஆய்வகம், மனநலம் மற்றும் வாழ்வியல் திறன் ஆகியவையும் நடத்தப்பட உள்ளது.

இந்த நிலையில், இரண்டு சனிக்கிழமைகளைத் தவிர பிற சனிக்கிழமைகள் அனைத்தும் விடுமுறை அளித்து பள்ளிக் கல்வி இயக்குநர் அறிவித்துள்ளார். அதாவது சனிக்கிழமைகள் டிசம்பர் 21ஆம் தேதியும் 2025ஆம் ஆண்டு மார்ச் 22ஆம் தேதியும் பள்ளிகள் செயல்பட உள்ளன.

அரையாண்டு தேர்வு எப்போது?

அரையாண்டு மற்றும் 2-ம் பருவத்தேர்வு டிசம்பர் 16 முதல் 23-ம் தேதி வரை நடத்தப்படும். தொடர்ந்து டிசம்பர் 24-ல் தொடங்கி ஜனவரி 1-ம் தேதி வரை மாணவர்களுக்கு அரையாண்டு விடுமுறை வழங்கப்படும் என்று தெரிவிக்கப்பட்டுள்ளது. அதேபோல், 1 முதல் 9-ம் வகுப்புகளுக்கு ஏப்ரல் 9 முதல் 17ஆம் தேதி வரை முழு ஆண்டுத் தேர்வுகள் நடத்தப்பட உள்ளன.

பள்ளி வேலை நாள் ஏப்ரல் 27-ம் தேதியுடன் முடிகிறது. அதன்பின் கோடை விடுமுறை ஏப்ரல் 28-ம் தேதி முதல் வழங்கப்படும். திருத்தி அமைக்கப்பட்ட மொத்த பள்ளி வேலை நாட்கள் 210 என்று தெரிவிக்கப்பட்டுள்ளது.

அக்.14 பொதுத்தேர்வு அட்டவணை வெளியீடு

இதற்கிடையே 10, 11, 12ஆம் வகுப்பு பொதுத்தேர்வு தேதிகள் அக்டோபர் 14ஆம் தேதி வெளியிடப்பட உள்ளதாக அமைச்சர் அன்பில் மகேஸ் பொய்யாமொழி தெரிவித்துள்ளார்.