ஆசிரியர் தகுதி தேர்வில் 14% பேர் மட்டுமே தேர்ச்சி - ஆசிரியர் தேர்வு வாரியம் வெளியிட்ட அதிர்ச்சி தகவல்

ஆசிரியர் தகுதி தேர்வுத் தாள் 1 எழுதிய 1,53,233 பேரில் 21,543 பேர் மட்டுமே தேர்ச்சி பெற்றுள்ளனர்.

ஆசிரியர் தகுதித் தேர்வெழுதிய தேர்வர்கள்

தமிழ்நாட்டில் ஆசிரியர் தகுதி தேர்வு தாள் 1இல் 14.06% பேர் மட்டுமே தேர்ச்சி பெற்றுள்ளதாக ஆசிரியர் தேர்வு வாரியம் தெரிவித்துள்ளது. தேர்ச்சி பெற்றோர் இடைநிலை ஆசிரியர்களாக 1ஆம் வகுப்பு முதல் 5ஆம் வகுப்பு வரை உள்ள மாணவர்களுக்கு பாடம் எடுக்கத் தகுதியானவர்கள் ஆவார்கள்.

நடப்பு ஆண்டு தேர்வு

நடப்பு ஆண்டுக்கான ஆசிரியர் தகுதித் தேர்வு தாள் 1 மற்றும் தாள் 2 ஆகியவற்றுக்கான அறிவிப்பு கடந்த மார்ச் மாதம் வெளியிடப்பட்டது. விண்ணப்பதாரர்கள்‌ இணையதளம்‌ வாயிலாக ஏப்ரல் 26ஆம் தேதி வரை விண்ணப்பித்தனர். ஆசிரியர்‌ தகுதித்‌ தேர்வு தாள் ‌1-க்கு 2,30,878 பேரும்‌ மற்றும்‌ தாள் 2-க்கு 4,01,886 பேரும்‌ என மொத்தமாக 6,32,764 பேர் விண்ணப்பித்தனர்‌.

அதையடுத்து ஆசிரியர் தகுதித் தேர்வு முதல் தாள் அக்டோபர் 14 முதல் 19 வரை இரு வேளைகளில்‌ நடத்தப்பட்டது. கணினி வழியில் நடைபெற்ற தேர்வை சுமார் 2 லட்சம் பேர் எழுதினர். இவர்களுக்கான விடைக் குறிப்புகள் அக்டோபர் 28ஆம் தேதி வெளியாகின. 31.10.2022 பிற்பகல்‌ 5.30 மணி வரை தேர்வர்கள்‌ இணையவழியில்‌ தங்களது ஆட்சேபனைகளைத் தெரிவிக்க வாய்ப்பு வழங்கப்பட்டது. 

அதன்‌ அடிப்படையில்‌ பெறப்பட்ட அனைத்து ஆட்சேபனைகளையும்‌ பாடவாரியாக வல்லுநர் குழு
அமைக்கப்பட்டு முழுமையாக ஆய்வு செய்யப்பட்டது. ஆய்வுக்குப் பின்‌ பாட வல்லுநர் குழுவால்‌ இறுதி செய்யப்பட்ட விடைக் குறிப்புகளின்‌ அடிப்படையில்‌ தேர்வர்களது கணினி வழித்‌ தேர்வினை மதிப்பீடு செய்து மதிப்பெண்கள்‌ கணக்கிடப்பட்டன. முன்னதாக இறுதி விடைக் குறிப்புகள் டிசம்பர் 7ஆம் தேதி வெளியாகி உள்ளன.

தேர்ச்சி சதவீதம்

அதன்படி ஆசிரியர் தகுதி தேர்வுத் தாள் 1 எழுதிய 1,53,233 பேரில் 21,543 பேர் மட்டுமே தேர்ச்சி பெற்றுள்ளனர். இந்நிலையில், தமிழ்நாட்டில் ஆசிரியர் தகுதி தேர்வு தாள் 1இல் 14.06% பேர் மட்டுமே தேர்ச்சி பெற்றுள்ளதாக ஆசிரியர் தேர்வு வாரியம் தெரிவித்துள்ளது.

மேலும் தேர்ச்சி பெற்றவர்கள், சான்றிதழ்களை http://trb.tn.nic.in/ என்ற இணையதளத்தில் மூன்று மாதம் வரை பதிவிறக்கம் செய்யலாம் என்றும் தெரிவிக்கப்பட்டுள்ளது.

டெட் தேர்வு

அரசு கொண்டுவந்த இலவசக் கட்டாயக் கல்வி உரிமைச் சட்டப்படி அனைத்து வகையான பள்ளிகளிலும் ஆசிரியராகப் பணியில் சேர மத்திய அரசு, மாநில அரசுகள் நடத்தும் ஆசிரியர் தகுதித் தேர்வில் தேர்ச்சி பெற வேண்டும்.

அதன்படி நடத்தப்படும் ஆசிரியர் தகுதித் தேர்வு (TAMILNADU TEACHER ELIGIBILITY TEST (TNTET)) மொத்தம் 2 தாள்களைக் கொண்டது. முதல் தாளில் தேர்ச்சி பெறுபவர்கள் இடைநிலை ஆசிரியராகவும், 2-ம் தாளில் தேர்ச்சி அடைபவர்கள் பட்டதாரி ஆசிரியராகவும் பணிபுரியலாம்.

இதற்கிடையே டெட் தேர்வில் தேர்ச்சி பெற்றவர்களின் சான்றிதழ்கள் 7 ஆண்டுகளுக்கு மட்டுமே செல்லுபடியாகும் என்ற நிலை இருந்தது. அந்நிலையை மாற்றி ஆயுள் முழுவதும் டெட் சான்றிதழ் செல்லும் என்று மத்தியக் கல்வி அமைச்சகம் அண்மையில் அறிவித்தது. இந்த அறிவிப்பு 2011-ல் இருந்து தேர்வு எழுதியவர்களுக்கும் பொருந்தும்.